الدراجات النارية مشكلة تتطلب وقفة الأهالي للحد منها في الرمس

[بو هند]

السلام عليكم ورحمة الله وبركاته

عندي ملاحظة يبغالها وقفة جادة إن كان من أهل الرمس أو من المسئولين وهي كثرة الدراجات في الرمس أنا دايماً يوم أتمشى بالرمس أشوف أطفال أعمارهم أقدر أقول تحت العشر سنوات وهم ايسوقون دراجات والمشكلة أنك أتشوفهم أمركبين وياهم أطفال أصغار ويتنقل بالشوارع دون حسيب أو رقيب احيد يوم كنت صغير إذا سقت دراجة أو سويت أي مشكلة يوم أوصل البيت يكون الخبر واصل للوالد أو الوالدة.
الشي الثاني يزاهم الله خير الشرطة أتحاول تحد من هذه الظاهرة ولكن هل يسمح لهم بمطاردة سائقي الدراجات المخالفة لأني يوم السبت بعد المغرب وبالتحديد في الشارع خلف النادي كانت بتستوي مصيبة لكن الله ستر شفت دراجة فيها أثنين طالعين من هذا الشارع بسرعة وكانت سيارة بيضاء بتدعمهم لكن الله ستر وراها دورية شرطة تلحق هذه الدراجة بالعقل أخواني تقدر سيارة شرطة اتلاحق دراجة في منطقة الرمس على كثرة السكيك اللي فيها ما أتوقع.
خلاصة كلامي هذا أتمنى من جميع أهالي الرمس اللي أيشوف مشكلة بأنه ايحاول حلها وإذا ما قدر أيبلغ أهل صاحب المشكلة لحلها.
وشكراً..............

[رمساوي4]

جزاك الله خير على حرصك للأطفال...

[الغلا كله]

الله يحفظ الجميع إن شاء الله

أنا أشوف أن الأهل هم المسؤولين عن خروج أبنائهم من البيت

لازم يراقبونهم وينصحونهم

مشكور أخوي ع الموضوع

[مواطن حر]

يا اخي الكريم لو اتكلم الحجر بيسمعك

انت اتكلم قلوب ميته لا احساس ولا مراعاة للغير

ان كنت مب مهتم لعيالك او اخوانك

راعي شعور الناس

واذا بتلوم لوم مركز الشرطه اللي نايمين في العسل ومرور راس الخيمه

كم من حوادث صارت وكم من حوادث بتصير ونسالالله العفو والعافيه لكل المسلمين

[راع خمسات]

اقول هايل اطفال شو بسوي فيهم لو تتكلم من اليوم جنك ماتكلم بشر

[راع خمسات]

شـكــ وبارك الله فيك ـــرا لك ... لك مني أجمل تحية .

[لولا الامل]

المرور نايمه وشوارعنا كلها لعبه الداخله و الخارجه من دراجات الي تريلات الي تكاسي ومواتر 2

[القلم العابر]

اشكرك يالحبيب ..............
بس اتمنى من كل اب,ام,اخ,اخت,عم.....................ايشووووووف الغلط يحاول ايصلحه.
في هالحاله والله والله بنعيش بسلام والشرطه بينلغي دورها
واشكرك مره ثانيه

[JetaimeO]

موضوع زاد عن حده في الفترة الأخيرة ..

المشكلة إنه الآباء هم اللي يوفرون لأبنائهم مثل هذه الدراجات ويقولوهم توكلوا واستانسوا بس لا سمح الله وصارلهم شي شو بينفع الندم ..

ولا لازم حد من الصغار يصير له شي عقب يتعلمون ..

شكرا أخوي عالموضوع المهم ..

[رمساويهـ قمر]

الله يحفظ اليميع إن شاء الله..

[فتى الرمس]

للاسف هذا المشهد كل يوم اشوفه في شوارع الرمس واكثر الليسوقون يهال اعمارهم بين السبع والعشر ويوم يصير شي في اليهال يردون اللوم على الشرطه المفروظ التربيه اتكون في البيت والشرطه كم بتلحق الدراجات ماشاء الله بالاف الدراجات عدنا كل هذا بصوب والهنود بصوب ثاني لو اتكلم ما اظن اني بخلص لين باجر والسموحه على الاطاله بس صدق لازم نشوف حل حق الدراجات.
والحين اذا بسير اتخبر اهل الولد بقولولك انت مايخصك انا صارلي هذا الموقف كلمت احدى العائلات في الرمس عن ولدهم والنتيجه ماشي هم يجتلون اعيالهم بايدهم.
أخوكم فتى الرمس

[مواطن حر]

ارجع واقول مركز شرطة الرمس له دخل في الموضوع هذا
يصدرون امر ويعممونه في المساجد وبعد صلاة الجمعه يقرون التعميم
وبعدها يتخذون الاجراء

[patchena]

الله يحفظ الجميع ويكفينا شر الحوادث

[الشاكي83]

اخواني اعضاء منتدى مجالس الرمس ابغي احد يجاوبني على السؤال


ليش دائما نحط اللوم على الشرطه والمرور ؟

ليش ما نحط اللوم على الاب والام والي اكبر عن الشباب او الاطفال الي يسوقون هذي الدرجات ؟

الدراجات مب مشكلين ازمه في منطقه وااحد بالاماره ( الرمس) بل مشكله ازمه في جميع انحاء الاماره

خلونا نتسلسل نقطه نقطه


1- الطفل او الشاب العاطل عن العمل كيف حصل على الدراجه ؟


2- منو الي شجع الولد على قيادة الدراجه ؟


3- وين الرقابه من قبل الاهل ؟


طبعا هذا الطفل او الشاب فلوسه مب يايه من السما او الدراجه وصلت له هديه من الشارع فاكيد بيكون مشترنها واقل دراجه قيمتها 700 درهم تقريبا الي هي (بوشراع ) واغلب الاطفال يسوقونها الحين منو اعطى الطفل الفلوس منو اشترى الدراجه له اكيد ابوه او امه بس ليش ؟ شو الجواب
اكيد عشان لا يزعل الولد لانه اخر العنقود او وحيد ابوه وامه او البكر او او او او ...............الخ


فيوم يستوي شي لهذا الولد حطوا اللوم على الشرطه
وللعلم الطفل او الشاب مستحيل يوقف للشرطه ومستعد يعرض نفسه والاخرين للخطر والدوريه في اغلب الاحيان مستحيل تطارد هذا الشاب اذا شافوه مستهتر وبيعرض نفسه ولاخرين للخطر

بعطيكم موقف شفته بعيني من ولي امر طالب في الجولان


كنت اتمشى بالسياره وشفت دخان اسود كثيف قريب من مدرسة زيد بن حارثه فسرت باتجاه الدخان فشفت رجل كبير بالسن تقريبا قاعد يحرق الدراجه الناريه التابعه لولده والدراجات الهوائيه الي بالمنزل فسالته ليش تحرقهم فجاوبني ان ابنه استواله حادث وهو الي كان متسبب بالحادث ودخل المستشفى وكانت اصابته متوسطه وعند خرجوه تكفل بتصليح المركبه ومن خوفه على ابنه حلف يمين انه يوصل البيت ويحرق الدراجات بالبيت وما تدخل اي دراجه البيت


شوفوا متى اسوى هذا الموقف بعد ما استوى لابنه حادث مروري والله ستر عليه واعطاه عمر فكيف لو مات

ليش الواحد ينتظر لي يطيح الفاس بالراس وعقب يقول ياريت لو

شوفوا بحر المعيريض محد يقدر يرتاح او يستانس على البحر من كثر الغبار الي سببه الدراجات البانشي

انا ما احط اي لوم على الشرطه الشرطه قايمه بواجبها على اكمل وجه


واحط اللوم كله على اولياء الامووور الي مب مهتمين ولا يعرفون شي عن عيالهم الابالمصائب

والسمووووووووووووووحه وتقبل مروري

[ابن الإمارات]

بتكاتف الأهالي فقط تنحل هاي المشكله

[مواطن حر]

شوف اعمار الاطفال اللي يسوقون الدرجات هذي
اساله منو اشترالك الدراجه بيجاوبك واحد من والديه
واذا حد قاله شي وخبر اهله الرد بيكون وانت وشلك
لهذا السبب ارجع الموضوع للشرطه
يعني محتاجين لقرار حازم
والقرار هذا يباله امر من مسؤول كبير اما قائد الشرطة او من نائبه

[بو هند]

السلام عليكم ورحمة الله وبركاته
أشكركم جميعاً على الردود الطيبة ومثل ما قريت بأن الكل أجمع بأن المشكلة الأساسية هي تساهل الأهل ( أولياء الأمور ) أحنا في الرمس كلنا أهل ونقرب لبعض لو كل واحد بيحاول أيحل المشكلة صدقوني خلال فترة وجيزة بنقدر أنحل مشكلة الدراجات أو على الأقل بنقلل منها ومن آثارها السلبية أنا أطلب من كل أعضاء المنتدى من أهل الرمس الوقوف بحزم لهذه المشكلة .
وأشكركم مرة ثانية.

[ساحرة القلوب]

هيه صح كلامك أخوي
صرااااااح صوت درجات نارية هو اخس منهاااا عور رأسي من كثر ما أسمع صوتهااااا
ففي فريجنا واحد دوم أربع وعشرين ساعة ويا دراجته من بداية الشارع لين نهايته وفوق كل هذا يهال
ع عموم يسلموو أخوي ع موضوع

[!! الــعــنــيــد !!]

كلامك صحيح 100%

انا استغرب يوم اشوف هالشي ف الرمس

و المشكله الدراجات حتى ليت مافيهآآ

يعني لو واحد لا سمح الله
اي و يدعم واحد منهم بالغلط
مابيحس حتى


هذي مب غلطه المرور
هذي غلطه الأهل

عيل صغاريه
اعمارهم 8 مادري 9 سنوات
تعطونهم دراجات و يمشون ع الشارع ؟!

بايعين عيالهم هذيل شو ؟
المفروض لو بيطلعون

بس ف الفريج
او للدكان و يردون للفريج مره ثانيه

شو بنقول بعد
...