عطوني ملاحضاتكم بكل شفافيه لسير عمل الأنتخاب ..

[TOY STORY]

أشحالهم .. انا بصراحه ماطبيت قاعة لجان الإنتخابات لأنه أسمي ماظهر .. لكن يالربع ياللي سار
يخبرنا عن الأجواء هناك .. زحمه ماشي زحمه .. العمل منظم ولا عالبركه .. طريقة الإختيار سهله ولا
الجهاز يعلق ويختبص 66 مره .. حد من المرشحين واقف عالباب ويترشى ويترجى ولا ممنوع .. شي
خدمه من اللجنه .. مزة القهوه والشاي والماي متوفره .. الأجواء بارده .. كل اللي بخاطركم هذا مكانه ..
نرجو التفاعل وذلك للأهميه ..

[الروح 85]

اشكر لك هذه المبادرة الطيبة منكـ

وبما اني كنت سايرة اصوت .. كانت الاجواء طيبة وكنت سايرة على فترة الظهر كان في زحمة بس بسيطة وكان في تفتيش قبل ماتدخل والتاكد من الهويه
وماشالله الشباب والبنات اللي متواجدين كانوا يخدمون كل حد وفي كل مكان تحصلهم
ومن دخلنا سيده لين طلعنا يمكن ما كملنا عشر دقائق
يعني كل شي كان منظم ومرتب ،، والنظام واايد سهل وبسيط يعني اي حد بامكانه يسخدمة وبدون تعقيد

يزاهم الله خير وكل الشكر لهم والله يعطيهم العافيه

[حلو الاطباعي]

والله ياخوي انا ماكنت موجود
بس الله يوفق الجميع لكل خير

[TOY STORY]

تسلم يالحلو على الردود الطيبه اللي عودتنا اياها .. ودومك متفاعل وتشجع الواحد ..

[Just_me]

من وجهة نظري ان التنظيم كان سيء

والاجهزة وايد تعطي انك صوتت وانت توك مدخل البطاقة وبعدك ما رشحت يعني لازم ترجع ورا عسب يرتبولك اياه مع انه مجيكين وقالو اان البطاقة اوكي

التعامل سيء من البعض عدم توفير كراسي للجلوس والاستراحة الا بالقاعة اللي ما تكفي العدد الكبير المتواجد

الخلط بين الرجال والنساء صح مسوين مكان خاص لتصويت الحريم بس عشان الحرمة توصل لهالمكان لازم تطوف على اكثر من خمسمائة ريال واكثر وسبحان الله شي بنات يايات جنهم يايين عرس مب مكان تصويت

وقت اعلان النتائج كان مجحف بحق الجمهور اللي كانوا واقفين برع واعلنوا النتائج وهم بالخارج

البعض يشكك بنتائج التصويت لكن من وجهة نظري اوكي لكن يمكن ها لاني من الرمس

في اشياء جيه ما اعرف اكتبها او ما اقدر اعبرها المهم بشكل عام سيء من وجهة نظري

وشكرا

[غـريب الـدار]

الخلط بين الرجال والنساء صح مسوين مكان خاص لتصويت الحريم بس عشان الحرمة توصل لهالمكان لازم تطوف على اكثر من خمسمائة ريال واكثر وسبحان الله شي بنات يايات جنهم يايين عرس مب مكان تصويت

يعطيك العافية على الملاحظات وبالاخص هذه !!

[رذاذ عبدالله]

سبب العطل بأن الناخب بعد أن ينتهي من طباعة ورقته لا يضغط على زر تمت الطباعة،،!!
هذا ما لاحظته وغيري على شاشات الاقترااع صباح أمس،،
حيث قمت بضغط زر تمت الطباعة ثم أدخلت بطاقة الهوية وانتظرت حتى أضاء الضوء الأخضر بعدها الضغط على استمرار ثم متابعة خطوات التصويت باختيار المرشحين،،
والضغط على تصويت،،!
وبعد الطباعة وإخراج بطاقة الهوية لزم الضغط على تمت الطباعة،،!
التنظيم والاستقبال جيد جدا،،
أتممت عملية التصويت في غضون 10 دقائق بعد التأكد من إدراج إسمي ضمن الهيئة الانتخابية،،
وانتهيت من التصويت في الساعة 8 وربع صباح أمس،،
شكـرا لجهود وتكاتف الجميع ،،

[محمد سليمان]

الله يوفق الجميع

[ياسر الشحي]

السلام عليكم ورحمة الله

امس التقية بقناة سمبا دبي

بموضع سير الانتخابات

وكيفية التعامل مع الناس

واتكلمت الوضع سيء في الانتخابات

كان الترتيب غلط بشكل مباشر تداخل النساء من ناحية الدخول والخروج مع الرجال هذا اكبر غلط وبعدي لا انتو بكرامه كيس الزباله ولا ماي ولا اي شي والله حرام ما توقع انه يصير هالشي في راس الخيمه

وانا لقيت تعامل سيء من قبل الموظفين والكل يشهد في خورخوير كل واحد شايف عمره حق شو ليش كل هذا حتى والكلام بعضهم ما يعرفون يتكلمون

بس الله المستعان

[noorarak]

انا اسمي طلع .. لكن ما رحت .. وراي درب ولم أقتنع بالبرامج الانتخابية للمرشحين ..

اخوي راح . وقال انه المكان بشكل عام منظم .. فيه بعض الانفلات .. ولكن ترجع الامور لطبيعتها ..

والمشكلة من الأشخاص اللي أسامهيم مش مدرجة بقائمة الناخبين .. لأنهم مش فاهمين ليش هم ما يحق لهم يصوتون .. هذا كلام أخوي ..

لكن ..

لكا شفت أرض المعارض في بوظبي بالتلفزيون .. قلت فــــــــــــــــــــــرق السما والأرض


والحمد الله

الشكر .. نورة

[العين الساهره]

أول مرة كنت أحضر ...الصراحة كان شعوووووور في قمة الرووووووووعة ....والاجواء جدا جميلة ...

[بو راشد الطنيجي]

بالنسبه لي انا كنت موجود ع الساعه الثالثه مساءا ،، وكانت الخدمه مرموقه وسهله و سريعه .. وماشي زحمه ( يعني هناك تنظيم ) وانتهى التصويت في غضون دقائق .. يجوز الفترة الصباحيه كانت مزحزمه شوي ,, بس الامور بشكل عام كانت ميسره و منظمه ولله الحمد

[حرم علي]

كان بودي احضر الانتخابات لكني بعيد في الشارجة
بس عيبتتي تفاحة وههي تتكلم في التلفزون .. صدق انها مال راس الخيمة

[&&البارونهـ الخيماويهـ&&]

أولا أحب أهني كل اللي تم عليهم الاختيار وعلى راسهم الوالد أحمد الأعماش ...تستاهلون وموفقين:sm133:

ثانيا بخبركم اللي صار معاي طبعا انا ماحب أظهر بروحي في اماكن الزحمه فخذيت الوالده الله يحفظها ..:sm151:

رحنا قبل المغرب بساعه تقريبا...دخلنا القسم الخاص بالنساء كانت في بنت واقفه امره عند الباب قالت

لو سمحتو المرافقين ممنوع يدخلون...توها الوالده بتظهر جان تسألها وحده ثانيه أنتي مرافقه قالت لها هيه انا مع

بنتي جان تقولها ((المرافقين برع لا وبصوت عالي وماشي أدب ولا احترام وكذا مره تعيدها وتطالع أمي مب جنه إللي وراي يايبين اثنين وأكثر معاهم))...

...:aa_mo6reqa:

عاد الوالده عبرت عن شعورها شرشحتها يعني

المهم دخلونا في زاويه مغطيينها بستاره سوده عسبت يعلمونا طريقة التصويت وكانت البنت اللي هناك صراحه

حبوبه وخدومه الله يعطيها العافيه ماقصرت :waaaw:

المهم خلصت شرح طلعنا بندخل القاعه بنروح على الاجهزه نصوت طبعا كانو في بنات على يمينا ويسارنا ياخذون بطايق الهويه يتاكدون من الأسماء من الاشكال وانا رايحه متنقبه

جان تقول لي لو سمحتي رفعي النقاب قتلها هني :sm11:قالت هيه عادي قتلها في رياييل وراج قالت لازم اشوف ويهج:sm86: ((يمكن اعجبت بشكلي من تحت النقاب ))هههههه

المهم قلت ما ابا اضاربها ولا اسوي سالفه جلبت ويهي صوب الحريم وقتلها تبين تشوفين شكلي تعالي جدامي

رفعت نقابي وصديت جنب ويهي لها جان تقول خلاص

قتلها الله يهداج بس خلاص بعد ما الاربعه اللي وراج شافوني ....قالت هاي قوانين:sm145:

نزلت نقابي ورحت صوت وخلصت الحمدلله ماتعطلت وأموري فالسليم...طلعت من القاعه شليت الوالده وردينا البيت

بالنسبه لأسالتك اخوي ,,,,,,

زحمه وايد ناس ماشاء الله حريم ورياييل

وبالنسبه للخدمه شرحت عن البعض فوق

وسالفة الماي وقهوه ماشي

والتصويت كان سهل الحمدلله:sm122:

[TOY STORY]

أشكر تفاعلكم بالموضوع .. أخواني وخواتي .. ويشهد الله أنه للمصلحه العامه .. لأني التقيت مع شخص بعد الترشيح وقالي معاناه وخربطه .. ومش عارف انا رشحت ولا راحت علي .. هذا اول الوقت .. لكن عل بعدين تعدل ولا لا .. من كلام اخونا فيه سلاسه وعلى طول .. الله يعين الجميع ومبروك للفايزين وهارد لك للي ماحالفهم الحظ .. بس بصراحه تونسنا معاهم خلال هالمده بالصور والشعارات والمقالات واللقاءات وغيره .. وصدقوني بنفتقدهم وبنفتقد الجو الجميل هذا .. تمام عيل ..

[الكابتن]

معليش يالربع

دامكم فتحتوا الموضوع تحمّلوا كلامي...

أعزائي المرَشَّحين...الحينه هذي نسبة تسمونها!!!

28% فقط من اجمالي المسموح بهم بالانتخاب شاركوا...


والباجين؟

وين وطنيتكم؟، وين حبكم لبلادكم؟ وين طاعتكم لولي أمركم؟...عيب والله عيب عليكم

مب عشان المرشح والترشيح...لكن عشان خاطر شيوخكم...تيجان رؤوسكم...طلبوكم طلبه عشان تختارون ممثليكم بالمجلس...هذا ردكم...أفا

اتمنى هالشيء ما يتكرر بعد أربعة سنوات يوم يي الانتخابات القادمة للمجلس الوطني

[حرم علي]

[quote=الكابتن;1059329761]


شيوخكم...تيجان رؤوسكم...

ما جنك بالغت شوي ؟؟؟

[الناقد]

مع احترامي :

كان المفروض قبل الانتخابات بشهرين يكون في دورات للمرشحين وتثقيفهم على :

1- عن عمله فالمجلس
2- طريقة الاعلان وكيفية استخدامه
3- عدم اعطاء الوعود التي لا تخص المجلس
4- عمل موقع على الانترنت لكل مرشح وسيرته الذاتيه
5-قاعة الاجتماعات تكون في اماكن معروفه لحضور الناخبين

[الكابتن]

[quote=الكابتن;1059329761]


شيوخكم...تيجان رؤوسكم...

ما جنك بالغت شوي ؟؟؟

والله يا حجّيه حرم علي ..انا أعتبر شيوخنا تاج راسنا وعزوتنا..طبعا غير قدوتي اللي هو رسولنا محمد عليه أفضل الصلاة واتم التسليم

للعلم، ما حصلت من برنامج الشيخ زايد فلس أحمر عالرغم من أني متقدم للطلب من عام 2000، وساكن بيت بالايجار حالي حال الكثيرين من عيال البلاد.
صندوق الزواج...راحت علي...تزوجت قبل ما ينشؤونه
ما عندي الا راتبي..ولله الحمد والمنّه

ولكن

لفّي على الآخبار واقرأي اللي يحصل حوالينا من البلادين العربية والغير عربية..حتى جيراننا ما سلموا من المشاكل الداخلية...الامن في هاي البلادين معدوم، الفقر والفساد والرشوة وسوء القيادة سماتهم، بلادنا ولله الحمد عندها القليل من تلك، ولكن في المقابل...الآمن وحسن القيادة والتفاف الشعب مع شيوخنا وحب الناس فيما بينهم ، تراكم في نعمه يالربع..انتم محسودون من أقوام كثيرة....حافظو على تلك النعم بالشكر والثناء والحمد لخالقنا دائماًو أبداً

أنا وأعوذ بالله من كلمة أنا...لو أقول الحمد لله على نعمه الكثيرة وعلى الخير والعز اللي عايشينه حتى ينقطع نفسي وأنزل القبر ما أعتبر أني وفيت حق الله على تلك النعم.

[Fake news]

رحت قبل ما اطلع للمطار وقفت في الصف وشفت السالفة طولت وباقي القليل عن السفر فرحت بدون ما أصوت للي في بالي

اقترح يكون التصويت على ٣ ايام يعني يوم محدد ماتعرف شو ظروف الي ماصوتوا في اليوم نفسه فالتصويت يروح عليهم وهذا اتوقع احد اسباب الي سببه نسبة المصوتين طلعت ضعيفة جداً.

اتمنى من الي فازوا في الانتخابات ان يمثلوا الشعب لا انفسهم وسنلتمس ذلك من خلال جلسات المجلس الوطني.


من كان يطمح للشعب ومن كان يلهث للوجاهه*