حق الليلة أو حق الله

[RAKBOY783]

بسم الله الرحمن الرحيم


السلام عليكم ورحمة الله وبركاته


اليوم بنكتب لكم عن حق الليله أو حق الله مثل ما يتداول عندنا في الامارات وباقي الدول


تختلف المسميات طبعاً في بعض الدول في اللي يسمونه قرقعان ولا قريقعان



وتختلف أوقاته عند بعض الدول في دول يحتفلون بحق الله او حق الليلة قبل رمضان و في دول في رمضان نفسه كما سمعت وشفت



طبعن عندنا نحن غير خصوصا في منطقة شعم وضواحيها ... يطلعون اليهال (( يقدحون )) يعني يدورون البيوت ... معاهم (( الخرّيطة )) مثل اليونيه الصغيره وتختلف الحين هالايام اشكالها والوانها وحتى بالحجم ... طبعن على ايامنا (( مرتقدين )) نشل (( خريطة )) عودة نمزرها مزار ... ولا يوم نتعب نفضي جزء منها وندور على البيوت ... يحطون لنا فيها جميع انواع المكسرات + النمكي والعصاير ... النمكي تخلص قبل لا نرد البيت لانه ناكلها بالدرب هاهاها النمكي = انواع الجيبس
اما العصير الميلكو نبرد على الفواد يوم نهلك بالحر ... اهم ما في الموضوع (( الخرده )) الربية ولا الربتين اللي تحصلها من البيوت ...


طبعن يبتدي القداح = يعني الحواطه على البيوت قبل العصر بشوي ... عاد المرتقدين = يعني المخترعين والميوع من الظهر يتغدى ويظهر بخريطه هاهاها ...



المهم ترجع البيت قبل المغرب او المغرب بالضبط ... اذكر في ناس اظل لين العشا تقدح هاهاها


ارجوا من العوايل والاخوان تنبيه اليهال والصغاريه على ان يلتزمون بالرصيف ويقدحون بين البيوت القريبه ولا يقطعون الشوارع العامه .. ومن الاخوان اصحاب السيايير عدم السرعه وانتباه


السموحه طولت عليكم بس هاي مناسبة معروفة عندنا في الامارات وخاصه عند اهالي المناطق الشمالية ...


كنوع من الاحتفال برمضان والترحيب فيه


م،ن
فمــ الله ـــــان

[بومنصور]

الله يبغلنا وياكم رمضان ويتقبله منا قبول حسن ،،

أشكرك يا ولد راس الخيمة ع هالمعلومات عن حق الليلة ..

في نفس ليلة حق الله أو حق الليلة عندكم يكون عندنا في قطر (ليلة النافلة)

يوزعون البيوت على بعضهم بعض الأكلات الشعبية ويرحبون برمضان ويبدأ الأستعداد له من ليلة النافلة


لكن ليلة القرنقعوه أو القرقيعان عندنا في ليلة النصف من رمضان ..


ومبارك عليكم الشهر مقدما وأعانكم الله على صيامه وقيامه وختم كتابه وصالح الأعمال ..

[RAKBOY783]

الله يبارك فيك اخوي بو منصور وشكرا لك ع المرور

[Her Highness]

جــــــــــــــــــــــــان زيــــــــــــــــــــــــــــن الزمـــــــــــــــــــن يرد


احلا ايام ايام الطفوله صح كنا نطلع عقب طلعت الروح لا وبعد 4 او 5 بيوت ونرد عسب الوالده ومرت الخال موصينا


الحيــــــــــن تطور اليهال يدورون بالسيارات


ان شاء الله نشوف اليهال منورين بيوتنا والله يحفظهم ان شاء الله

[RAKBOY783]

شكرا لج اختي ام دحماني ع المرور

[ملاك المشاعر@]

http://www.up.x2x3.com/uploads/be6a09356c.gif


هي والله أيام حق الله وااايد حلوه كنا نستانس أنا وبنت أخوي وان لف البيوت لين المسيان مانطول انخاف ههههه
ربي يسعدك ياخوي ع الطرح الحلو تحياتي لك

[RAKBOY783]

ويسعدج اختي ملاك وشكرا لج ع المرور

[بو عبود101]

الله يرد ايام زمان

[RAKBOY783]

شكرا لكم ع المرور

[الأميرة الحسناء]

صح ايام كانت حلوه الصراحه لكن كل شي تغير في وفتنا هذا
الله يعطيك العافيه اخوي
بس نسيت اقولك اريد حق الليله لاتنساني ههههههههه

[RAKBOY783]

صح ايام كانت حلوه الصراحه لكن كل شي تغير في ورفتنا هذا
الله يعطيك العافيه اخوي
بس نسيت اقولك اريد حق الليله لاتنساني ههههههههه


الله يعافيج اختي وافا عليج انتي تامرين امر عقب اسبوعين بيييييب لج خخخخخخخخخ

[قَصِآيُد . , *]

اي يوم حق الله

[بو حشر]

ايام حلوه وليتها اترد

[نبض انسان]

هههههههههه
ها الحق الليله الى كانت على اصول هب الحين.
اول كان كل شي حلو وله طعم أما الحين فمبالغين بها السوالف وايد

[reasonboy]

هيه و الله زمان كنا انحوص و بالفعل النمكي يخلص و نرجع البيت انفضي عشان يوم يشوفون الخريطة مال مب متروسه يعطونك ازيد و البيوت الراهية يعطونك خمس و على هذيك الايام الخمس تشتري فيها الدكان كله ههههههه