قصة : أسيرة حبك من كتاباتي

[ميزتي بدلعي]

السلام عليكم ...



شحالكم يا حلوين ...



اليوم يبت لكم اخر قصصيه و اتمنى انها اتعيبكم ... الصراحه الحمدلله لقيت تجاوب عليه قبل و اتمنى اني القى ردود طيبه منكم و خاصة " تفاعل و حماس " ...





المهم ما بطول عليكم و بنزل الحين شخصيات القصه اما اول بارت بنزله عقب الردود ...








هالقصه في بوظبي





عايلة ابو خليفه


ابو خليفه : انسان طيب و زين ... ما يشوف لانه اعمى ...


ام خليفه : طيبه بس عصبيه و ما تحب حد يعاندها و يرفض اوامرها ...


مها : اكبر بنت فالبيت و عمرها 30 ... معرسه و عندها ثلاث اولاد و بنت وحده ... ساكنه شويه بعيد عن اهلها و دوم اتزورهم فالويك اند ...


خليفه : صايع دومه و يحب الحواطه فالمولات و المغازله ... يشتغل فالجيش و عمره 28 .. عصبي وااايد و عنيد ...


امنه : اصغر من خليفه بسنتين يعني 26 ... معرسه و ريلها من العين ... مطلقه و عندها بنت وحده و تشتغل في قطاع حكومي ... تكره اخواتها من الابو خاصة الريم و دوم اتسويلها مشاكل و ضرايب ويا ام خليفه






اما الاخوات من الابو


الريم : اكبر وحده بين اخواتها و عمرها 23 ... تشتغل في بنك بوظبي ... امها برع البلاد لانها هنديه و هي ساكنه ويا اخواتها في بيت ابوها و مرت ابوها ... دومها متاذيه من اختها امنه بس متحمله ...


شما : بنوته حلوه و شكلها خبال ... عمرها 21 و تدرس بالتقنيه و هاي اخر سنه لها ... ما تحب ترفض طلب حد خاصة اوامر مرت ابوها ...


عليا : بنت عنيده واااااااايد و مشاكسه ... عمرها 18 يعني توها مخلصه الثنويه و بدش التقنيه ... اتحب الحواطه ... اتحب اتغصص في مرت ابوها و ذياب ولد عمها ...






عايلة ابو علي : اخو ابو خليفه


ابو علي : انسان في قمة الروعه و طيب وااايد ... من كمن سنه و هو طايح عالفراش بسبة مرضه


ام علي : انسانه هاديه و مالها حايه بحد ... دومها اتساعد ريلها و عيالها و ما اشتكت ابدا لحد ...


علي : اكبر عيال ابو علي و هو المسؤول عن الكل فالبيت ... عمره 28 و يشتغل في ادنوك ... يموت في بنت عمه الريم من صغره ...


نوره : انسانه طيوبه و كيوت .. عمرها 26 معرسه و عندها ولد و بنت ...


ذياب : انسان عديم الفايده و النفع ... عمره 24و صايع بالقو ... دومه برع البيت و نادرا ما يكون بيت عمه ...


حصه : نفس عمر عليا بنت عمها و هي وياها في الصفات الا بس انها تغصص في ذياب و اتحب تيلس عالنت






عايلة ابو ليلى


يدة ليلى : انسانه عصبيه واااااااااايد بس دوم حنونه على ولدها و على ليلى ... ما اداني ام ليلى موليه و ان طرتها ليلى تعصب ...


ابو ليلى : يحب بنته الوحيده و هو مطلق حرمته الي هي ام ليلى ... متقاعد من شغله و يالس فالبيت ... صح ترى ابو خليفه و ابو ليلى ربع من زمان


ليلى : انسانه طيبه و خلوقه مثل الريم و هم نفس العمر و نفس الشغل ... دومها ويا الريم مثل الاخوات ... دلوعه درجه فضيعه و اتحب الحواطه فالمولات و الشوبنق خاصة ...






شخصيات اخرى


طيف : انسانه ما اتحب الخير لحد .. تشتغل ويا الريم و ليلى في البنك و ما ادانيهم موليه ... صح ترى طيف بنت خالة احمد ...


راشد : ولد عمة ليلى و يحبها واااااااااااااايد ... ربيع ذياب و هو وياه دوم ...


سهيل : اخو ربيعت عليا من بوظبي و هو يدرس برع البلاد . اما غايه : ربيعت عليا و اخت سهيل


احمد : انسان طيب و حبوب ... عمره نفس عمر علي و هو ربيعه الروح بالروح ... يشتغل فالبنك الي فيه الريم و ليلى ...










تابع عقب الردود

[ميزتي بدلعي]

فوووووووووووووووووووق

[مسكينة يا انا]

اتريا القصة ^-* ~~ ان شاء الله حماس

الشكر تابع بعد القصة :sm115:

[ميزتي بدلعي]

اتريا القصة ^-* ~~ ان شاء الله حماس

الشكر تابع بعد القصة :sm115:





يسلموووووووو مسكينه و ان شا الله عقب ما القى كمن رد بنزل لكم اول بارت ولا اقولج الحين بنزل البارت الاول

[ميزتي بدلعي]

ها اول بارت للقصه و اتمنى انه يعيبكم ...










@ البــدايه @

يوم الاحد يعني عقب اجازة الويك اند ... في بوظبي ... في بيت ابو خليفه ... الساعه 7 الصبح ... في غرفة قوم الريم ... كانن البنات راقدات الا الريم لانها كانت يالسه تقرا قران و شوي يرن المنبه ... قامت الريم و سارت صوب شبرية البنات لانهن كانن يرقدن على شبريه وحده ...

الريم : حبيباتي شما علايه يلا قومو . شموه علايه قومو وراكم دوام

شما و هي مخدره : بلاج مريوم والله تراني مصدعه

الريم : شو بلاج ؟ ليش ناسيه وراج تقنيه

نشت عليا : اوووف بلاكم . ليش ما تخلون الواحد يرقد ؟ تراني مليت من هالحاله

شما : لا والله اتقولين جنه نحنا مرتاحات . و بعد لا تنسين انج بداومين اليوم فالتقنيه

عليا : سيري عني لاه . ريموه تراني بغيب اليوم من التقنيه

الريم : لا حبيبتي بتسيرين دوامج غصبا عنج . يلا قومن الحين

دخلت الريم الحمام علشان تتغسل ... قامت شما الا عليا الي تمت طايحه عالفراش ...

شما : علايه يلا قومي

عليا : مابا . ابا ارقد

شما : الريم شوفي عليوه هب طايعه اتقوم على الشبريه

عليا : يالسوده

شما : محد غيرج

طلعت الريم : عليا تراني بخبر عليج ابويه

عليا : اوووف يالله . خلاص خلاص قايمه . شو هالحاله محد يروم يرتاح

شما : بسج لا تتحرطمين

عليا : جب

شما : انتي جب

عليا : لا والله

عصبت الريم : بسكم يلا قومو اتغسلو و انزلو تحت علشان تتريقون . اقول عليا اول ما تنزلين اسلمين و اتبوسين راس ابويه و

عليا : و منو ؟

الريم : تعرفين منو اقصد

بوزة عليا : اوووف . انزين انزين

طلعت الريم من غرفتها و نزلت عالدري ... كانو كلهم يالسين يتريقون وياهم ابو خليفه الي كان يالس على كرسيه و هو يتريا يسمع صوت بنته الريم ...

الريم : السلام عليكم

اول ما سمع ابو خليفه صوت الريم استانس و ابتسم لها ...

امنه : الحمدلله عالسلامه . ما بغيتي تنزلين يا ست الحسن

الريم في خاطرها و هي تبتسم جدام الكل [ وابويه بدينا الحين ] : صباح الخير

ابو خليفه : صبحج الله بالخير الغاليه

سارت الريم و باست راس ابوها و ام خليفه ...

الريم : شحالكم

ابو خليفه : بخير الله يسلمج

امنه : ها وينهن اخواتج . شو هب ناويات ينزلن ولا بعد لازم نزقرهن

الريم : الحين بيون

نزلن عليا و شما : صباح الخير

الكل رد السلام الا امنه الي كانت مبوزه ... سارن البنات و باسن راس ابوهن و عقبها سارت شما علشان اتبوس راس ام خليفه ... وقفت عليا بعيد لانها ما تبا اتبوس راس مرت ابوها ...

الريم اتشوف عليا : عليا

اشوف عليا اختها و بوزة : ان شا الله

سارت عليا و باست راس ام خليفه ... يلسن البنات يتريقن ...

ابو خليفه : ها بنات تبون بيزات ؟

الريم : لا ابويه ما يحتاي البيزات الي عندنا اتكفي

عليا : هيه اتكفيج انتي لانج تشتغلين هب نحن يحليلنا

الريم اشوف عليا بنظره عصبيه ...

عليا : ابويه ابا 100

ابو خليفه : حاظر الغاليه . ها شما تبين بيزات شي ناقصنج ؟

شما : لا ابويه الحمدلله كل شي عندي بس اباك تدعيلي دوم اني اتوفق

ابو خليفه : دوم قلبي داعيلج الغاليه و عسى الله يحفظكن و يوفقكن امين

الريم و شما : اميـــــــن

انقهرت ام خليفه من ريلها : ابو خليفه بخبرك متى بنسير العمره ؟

ابو خليفه : جريب ان شا الله بس خلي اجازة السنه تي و بنسير

الريم : ان شا الله

رن فون الريم و ترد على الدريول : الوو . ها بابو وصلت ؟ اوكيه الحين بنظهر

سكرت الريم و قالت لاخواتها يجهزون بسرعه علشان ما يتاخرون عالدوام ... عقب ما طلعن البنات ... ركبن شما و عليا السياره و شوي كانت الريم بتركب الا اشوف حصه و علي يايين صوبهم ( العايلتين ساكنين حذال بعض يعني بينهم بس الايدار ) ... كانت حصه تمشي شوي شوي لانها هب مهتمه و مالها خلق في شي اما علي فكان مستعيل علشان يلحق يشوف الريم ...

علي : حصوه يلا سرعي

حصه : بلاك علاوي مستعيل تراهم ما بطيرون

علي : انتي بتمشين بسرعه ولا ايي اشلج

حصه : خلاص خلاص . وابويه منك

وصلو حصه و علي عقب ما حن الاخ على راس اخته ههههههههه ...

علي و حصه : السلام عليكم

البنات : عليكم السلام

علي : ها مريم طالعات الحين ؟

الريم و هي مستحيه : هيه طالعات . ها حصوه بتين ويانا بنوصلج بالدرب

حصه : لا فديتج ما يحتاي علي بوصلني

علي : هيه صح دامني بوصلها بوصلكم بعد شو رايج الريم

الريم : ما يحتاي اتعبك ويانا يا ولد عمي

علي : بالعكس بطمن عليكم و بعد بوصلكم

حصه ترفع حاجبها : اوه غريبه هالمكرمه يت منك يا اخوي المحترم !؟

علي : نعم شو قلتي ؟؟

تبتسم حصه ابتسامه عريضه : ولا شي فديتك

علي : ها الريم شو قلتي ؟

شما : الريم يلا بنتاخر

الريم : يايه . اسمحلي ولد عمي مستعيله ان شا الله المره اليايه هب الحين

بوز علي : خلاص اوكيه على راحتج الغاليه ( يقول لحصه ) حصوه انتي سيري الحين وياهم و فالرده انا ييج

بوزة حصه : لا والله ليش ؟؟

علي : لاني ابا الحق على دوامي . يلا مع السلامه

ركبت حصه و عقبها الريم و تم علي يشوفها ... اول ما ركبت الريم السياره شمة ريحة الزقاده ...

حصه و هي لايعه جبدها من الريحه : اوووف شو هالريحه الزفته

الريم : بابو ليش انت يدخن فالسياره

الدريول : ماما شو يسوي انا . انا يهاول ما يدخن بس ساب والله

عليا : الله يغربلك لازم تحلف و انت كافر . حمار

الريم : عليوه عن هالطولت اللسان عيب

عليا : لا والله و ليش عيب يعني تراه يالس يحلف بالله و هو بعده ما اسلم

شما : لا حول لله . اقول بابو طنش هالغبيه و سير الله يخليك ترانا تاخرنا وايد عالدوام

عليا : منو الغبيه يا الابقره

شما : منو غيرج يعني و بعد بخبرج اني احسن عنج و لساني هب وسخ نفس لسانج

الريم : و بعدين وياكم بتمون تضاربون دوم

عليا : هي الي بدت

الريم : اذا هي بدت انتي لازم تسكتين عنها لانها اكبر منج

بوزة عليا و طلع الدريول من البيت ... كان الدريول مشغل اغنيه هنديه ... شافت شما عليا و حصه الي كانن يبتسمن ابتسامه شيطانيه ...

شما : الله يستر

الريم : شو قلتي ؟

شما : شوفي اختج و بنت عمج

شافت الريم البنتين : صدقج الله يستر

.. السالفه ان يوم يبتسمن البنات هالابتسامه معناها بيلسون يطفرون بحد ..

عليا : اقول بابو انا ما يشوفك يحط اغاني عربيه مول ليش ؟

حصه : انا بقولج ليش لانه يحب حد و بعد الاغاني الهنديه شاعريه اكثر من الاغاني العربيه

عليا : هيه والله صدقج حصوووه . بابو انت يحب منو يلا قول

الدريول يحليله ولا فاهم شي من البنات ...

الريم : اقول خلو الريال يسوق ولا تيلسون اطفرون فيه

عليا : بلاج يالسين نمزح وياه

الريم : هب وقته

في الصوب الثاني ... صوب بيت ابو ليلى ... كانت طالعه من غرفتها و اشوف يدتها و هي يالسه ...

ليلى : يلا امايه انا بظهر الحين شكلي هالمره بتاخر عالدوام

اليده : محد قالج ما تنشين بسرعه

تبتسم ليلى و اسير اتبوس راس يدتها : فديتج والله حياتي لولاج ما كنت بقوم الحين

اليده : هيه الحمدلله اني موجوده عندج هب امج الي خلتج و سارت

سكتت ليلى و هي اشوف يدتها ...

ليلى : المهم يلا انا سايره . تامريني بشي

اليده : ما يامر عليج عدو الغاليه

طلعت ليلى و هي متحسسه من رمست يدتها ... يلست ليلى في سيارتها و اطيح دموعها ... يلست ليلى اصيح و هي هب حاسه في عمرها ... شوي و يرن فونها البيبي يعني ( البلاك بيري ) بس ما ردت عليه و تم يرن فونها بس بعد ما ردت ... عقب ما هدا فونها رن رنه غير على لحن ليلى تحبه و هالمره ردت ...

ليلى : الووو . اهلين دبوتي

الريم و هي مستغربه من صوت ليلى : ليلوتي شو فيج شكلج كنتي اصيحين ؟

ليلى : لا ولو المهم شخبارج ؟

الريم : اخباري زينه بس انتي لا صح ؟!

ليلى : الريم خليج مني و قوليلي وينج

الريم : طلعت من البيت من نص ساعه و توني موصله البنات التقنيه . الحين خبريني بلاج ؟ شو مستوي وياج ؟

ليلى : ولا شي ريموه بس شويه مضايجه

الريم : لا يكون مضاربه ويا حد . لحظه اكيد مضاربه ويا احمدوه صح

ليلى : لا . اصلا موليه ما رمسته اليوم

الريم : عيل قولي . والله تراج تقهرين ليلوه

ليلى : بخبرج بعدين فالدوام المهم بسكر عنج الحين علشان اطلع من البيت

الريم : اوكيه بس ها شوي شوي فالسواقه

تضحك ليلى : ههههههه ان شا الله امايه

الريم : يا ويلي عالضحكه عساها دوم يارب

ليلى : ان شا الله وياج حبيبتي

سكرت ليلى على الريم و طلعت من البيت ... عند الشباب ... كان علي يالس يسوق و شوي يفكر يتصل في احمد ...

احمد : الووو

علي : بسم الله بلاك ؟

احمد : ولا شي . شحالك ؟

علي : بخير الحمد لله و انت ؟

احمد : حالي اوووف اسكت الله يخليك والله مقهور

علي : ليش شو مستوي ؟

احمد : ليلى هب طايعه اترد عليه والله مقهور و متغصص

علي : يمكن مشغوله

احمد : حتى لو مشغوله عالاقل ترد عليه

علي : يا ويلي عالعاشق

احمد : اي عاشق يبوك . خليت العشق لك

علي : اااااخ لا اذكرني بالي شفته اليوم

احمد : ههههههه لا تحاتي ما بسالك لاني اعرف اذا سالتك بتبدا تتفلسف فالحب

علي : يالخايس الحين انا متصل فيك علشان اصبح عليك و انت اتقول جيه

احمد : ههههههههههههه وابويه جان يعصب علوه

علي : ايه اسمي علي هب علوه ويا ويهك

احمد : خلاص خلاص امسحها على ويهي المهم وينك الحين

علي : يالس اسوق و بعد شوي بوصل دوامي و انت

احمد : يحليلك عيل انا من ساعه واصل دوامي

علي : زين عيل . الا تعال شو رايك اييك دوامك عقب ما اخلص

احمد : ليش شو المناسبه ؟

علي : اممم بس جيه ابا اشوفك

احمد : ايهاء فهمتك حبيبي اكيد تبا تيي علشان القلب . يحليلي انا مستوي ولد البطه السوده

علي : هههههههه الا يسمعك يقول اني فارنك برع القائمه و تعال انته بعد عندك ناس

احمد : وابويه على الي يحسدون الواحد . توه توه يحسدون الفقير على يوم الجمعه

علي : هههههههههههه اطمن ماني بحاسد . انزين شو قلت اييك ولا

احمد : خلاص تعال بس ها لا تتاخر تراني بطرشك المريخ

علي : ههههههههههه اوكيه كون جاهز . يلا عيل بخليك الحين

سكرو الشباب و كل واحد سار وين ما يبا ... عقب ما وصلت الريم الدوام ... دشت و سارت صوب مكتب المسؤول علشان اتوقع حضورها ... كان احمد واقف صوب المكتب لانه كان يتريا ليلى ...

شافت الريم احمد : السلام عليك احمد

احمد : عليج السلام . شحالج الريم ؟

الريم : يسرك الحال و من صوبك ؟

احمد : بخير الله يسلمج الا وينها ليلى ما ترد عليه

الريم : توني مسكره عنها و هي يايه بالدرب الحين

احمد : اها . يلا عيل بخليج بسير مكتبي

سار احمد و دشت الريم مكتب المسؤول ...

الريم : السلام عليك استاذ محمد

محمد : عليج السلام اهلين مريم شحالج ؟؟

الريم : بخير الله يسلمك

وقعت الريم على الحضور و طلعت من المكتب ... يلست الريم تمشي و شوي اشوف وحده و هي بسرعه تمشي ... عرفت الريم انها ليلى و تزقرها ...

الريم : ليلوه بلاج مستعيله

لفت ليلى : ها الريم . دخيلج بسير اوقع ما فيني يحسبها غياب هالمسؤول الغبي

تبتسم الريم : سيري سيري

دشت ليلى مكتب المسؤول : السلام عليكم

محمد : عليج السلام . ها ليلى اشوفج متاخره اليوم

ليلى : هيه تدري الزحمه و بعد المسافه من البيت الين الدوام شويه طويله يالشيخ

محمد : هيه هالحجج الي عندج دوم

ليلى : اسمحلي هاي هب حجج . يلا عيل استاذنك

طلعت ليلى من دون ما تسمع المسؤول و هي اتقول في خاطرها [ هالي كان ناقصني من الصبح اوووف . لا حول لله والله بروحي لايعه جبدي و امايه زادة الطين بلا . الله يسامج يا امايه ] ... و هي اتفكر بالي قالته يدتها شافت جدامها احمد و ترتبك ... وقفت ليلى مكانها و هي اشوف احمد الي كان يمشي صوبها ...

وصل احمد عند ليلى : مرحبا ليلى

تمت ليلى اشوف احمد و ما عرفت كيف اترد ...

احمد : ليلى . ليلوه وينج ؟

انتبهت ليلى : هلا

رفع احمد حاجبه : هلا ! بلاج وين سرحتي ؟

ارتبكت ليلى : ها ولا شي . شحالك ؟

احمد : اليوم انتي هب طبيعيه . شو فيج ؟

ليلى : امممم ولا شي ليش؟

احمد : شو ليش ؟ اول شي ما رديتي عليه يوم اتصلت فيج و بعد عيونج متورمه من الصياح ولا انا غلطان

ليلى : احمد

احمد : ردي عليه اول

نزلت ليلى عيونها و تمت ساكته ...

احمد : انزين ابا اعرف ليش ما رديتي عليه يوم اتصلت لج ؟

ليلى : لاني كنت مضايجه و انت تعرفني ما احب ارمس حد يوم اكون معصبه ولا مضايجه

احمد : وشو الي مضايجنج ممكن اعرف ؟

ليلى : مضايجه من امايه شويه

اطيح دموع ليلى و يجدم احمد علشان يحضنها بس استحى ... يود احمد ايد ليلى بقو ...

احمد : المهم امسحي دموعج و يوم بتفضين خبريني

شافت ليلى ايدها الي كانت مشبوكه بايد احمد و اتشوف احمد بعيونه ... تمو اثنينتهم يشوفون بعض حتى انهم ما لاحظو وجود حد هناك ...

الريم : ههههههههههه احم احم

انتبهو احمد و ليلى ل الريم و استحو جدامها ...

الريم : بلاكم عادي عادي هالشي بين الحبايب بس ها هب جدام غيري ترى فشله هههههههه

استحو اثنينتهم و هدو ايد بعض ...

ليلى : من متى و انتي هني ؟

الريم : توني ييت اشوف وينج

اشوف ليلى احمد و ترد اشوف الريم : يلا عيل خلينا انرد مكتبنا

مشت ليلى ويا الريم و عيونها على احمد ... تم احمد واقف مكانه و هو يشوف ليلى ... ليلى و هي تمشي اتلف و اشوف احمد ...

الريم : ليلوه بسج عيونج بتعورج

ليلى : بسم الله عليه بلاج

الريم : والله اسميكم انتي احمدوه فشله ههههههههه

احترق ويه ليلى : بسج عاد مريوم والله ترى ويهي يحترق

الريم : خلاص خلاص . اوووف من الي يحبون حشى لو قلنالهم شي يعصبون

بوزة ليلى و وصلن البنات مكتبهن ... اول ما وصلن دشن المكتب و شافن طيف الي كانت يالسه و هي معصبه ... تمن البنات يشوفن طيف و يشوفن بعض ...

ليلى بصوت واطي للريم : الله يعين شو بصير

الريم : هيه والله

وقفت طيف و هي مفوله بالكامل : ها وين كنتن . شو ناسيات انكن موظفات هني . ترى هالمكان للشغل هب للعب يا انسات

تمن البنات ساكتات ...

طيف : شو قفلتن حلوجكن يوم رمست ولا ما عندكن شي اتقولنه . شكلي بسير اخبر المسؤول عن هالفوضى و الاهمال فالشغل

عصبت ليلى بس الريم يودت ايدها و وقفتها ... شافت ليلى الريم و سكتت ...

طيف : يلا كل وحده اترد مكانها و اتسوي شغلها . يلا جدامي الحين

ليلى : لا حول لله ولا قوة الا بالله

طيف : شو قلتي يا انسه ليلى ؟؟

ليلى : ولا شي سلامتج . في خاطرها [ الله لا يسلمج ان شا الله يالسوده ]

يلست كل وحده على مكتبها و شوي اطلع ليلى فونها من شنطتها ...

طيف : يا انسه ليلى ممنوع الفون وقت الشغل

شافت ليلى طيف و طنشة رمستها ... فتحت ليلى البيبي و شافت 5 مكالمات لم يرد عليها الي هي من احمد كانت ... دشت ليلى المسن فالبيبي و اسير صوب البن مال احمد و كان كاتب لها



[ صباح الخير يا اروع مخلوق في الكون .. صباح النور يا نور حياتي .. عسى الله لا يحرمني منك يالغالي .. أحــــ ـــبــــ ــج مــــــ ــــوت ليــــالــي ]

المسج الثاني [ مدري بصراحه وش الي فيكـ يجذب :- صوتكـ . هدوئكـ . عيونكـ . يلعن ابليسكـ .. كلكــ تجنن ]

المسج الثالث : [ وينهـا الي لقلت لها شو اتسوين قالت : افكر فيكــ .. وينكـ يا حبيبي ]

المسج الرابع : [ ليالي وينج ليش ما تردين عليه ؟؟ ليلوه ]

المسج الخامس : عباره عن بنقات وهي 8 بنقات متتاليه

المسج السادس و الاخير : [ شكلج مشغوله وايد . المهم يوم تفضين رمسيني .. مشتــــاقلج حيـــــل حبـي ]

تمت ليلى تقرا الي مكتوب و هي تضحك على خبال احمد و تقول في خاطرها [ فديته والله حبيبي . امــــوت فيه والله . عسى الله لا يحرمني منه ان شا الله ] ... شوي و اطرش له شي و كان مكتوب فيه ...



المسج الاول : [ اصبحك يا نبض قلبي بنسيم بارد يهب عليك و يقول يا عسى صباحك دوم حلو نفس السكر ]

المسج الثاني : [ سوري ما رديت عليك لاني كنت مضايجه و بعد اسوق .. المهم بقولك شي مهم وااااااااااايد ]

طرشت ليلى المسج فالمحادثه و يرد عليها احمد ..

[ مسموحه حياتي .. شو هو ؟ قولي بسرعه ]

طرشت ليلى [ بلاك مستعيل هههههههههه .. احم احم الي ابا اقوله ( حطة ويه بنت مستحيه ) اممممم ]

طرشته لاحمد و هو رد عليها بويه استفهام ...

ليلى : [ أحــــــــــــــــــــــــــــــــــ ــــــــــــــبـــــــــــــ ـــــــــــــكــــــ ]

ما رد احمد على ليلى و استغربت ليلى من سكوته ...

ليلى : [ شو فيك سكت من عقب ما طرشت لك الكلمه ]

احمد : [ ولا شي بس اتامل فالكلمه و ]

ليلى : [ و شو ؟ ]

احمد : [ ولا شي . صح شو اسوين الحين ؟ ]

ليلى : [ ماشي يالسه ارمسك و انا مجابله طيف الزفته فالمكتب . والله تراها تقهر وايد . موليه ما ادانيها ]

ما رمس احمد ... مرت 10 دقايق و ما كتب احمد شي لليلى ...

ليلى : [ احمد وينك ؟ شكلك مشغول ]

احمد : [ هيه ربعي ويايه المهم بعدين برمسج حبي ]

ليلى : [ اوكيه بس ها يوم تفضى رمسني ]

احمد : [ ان شا الله ]
تمت ليلى مستغربه عقب ما طلعت من المحادثه ...






تابع ...

[ميزتي بدلعي]

فوووووووووووووووووووووووووووووووق

[اسيرة]

واييييييييييييد حلووووووووووة

[ميزتي بدلعي]

واييييييييييييد حلووووووووووة





كلج ذوق اسيره بس هاي مب البارت كله ... ان شا الله بنزل باقي البارت عقب الرد الياي





دلع

[مسكينة يا انا]

عشت الجو الى ابعد حد ممكن

كملي من دون ماتوقفين لو ماعليج امر ^-^

[جوليا]

وايد حلو

[ميزتي بدلعي]

عشت الجو الى ابعد حد ممكن

كملي من دون ماتوقفين لو ماعليج امر ^-^




هههههههههههههه خلاص ولا يهمج الحين بنزل باقي البارت



و يسلموووووووو عالمتابعه فديتج

[ميزتي بدلعي]

وايد حلو



كلج ذوق حبيبتي جوليا و عوينج الاحلى غناتي

[ميزتي بدلعي]

هالبارت الباقي من البارت ااول و ان شا الله يعيبكم ...



عقب ما مرت ساعتين ... كانن ليلى و الريم بروحهن فالمكتب ...

الريم : ليلوه

ليلى : هلا

الريم : بلاج ؟ شو فيج جيه سرحانه

ليلى : ولا شي حبيبتي

الريم : عليه حبيبتي يلا قوليلي بلاج و بعد خبريني شو الي مضايجنج الصبح

ليلى : اااه يبوج شو اقولج والله ما اعرف

الريم : ليلوه قولي ولا تخليني اسحب منج الرمسه

خبرت ليلى الريم السالفه الي صارت يوم كانت ويا يدتها ...

الريم : الله يسامحها يدتج ليش قالت جيه

ليلى : لانها ما اطيق ماماتي موليه علشان جيه ابويه و اميه اطلقو

الريم : انزين و عن الحين في شو سرحانه ؟

ليلى : في احمد

الريم : احمد ؟ ليش بلاه ؟

ليلى : مادري والله احس انه مخبي عني شي و هب طايع يقول

الريم : ما حاولتي تعرفين منه شو الموضوع ؟

ليلى : لا مابا اضغط عليه عشان ما يعصب لانه يوم يعصب ما يعرف حد موليه و عادي يجرح و هو هب حاس

الريم : الله يعينج والله

ليلى : ان شا الله . صح ما خبرتيني عنج

الريم : عن شو ؟

ليلى : ولد عمج علي . شو التطورات ؟ هههههههههه

احمر ويه الريم : ليلوه عاد اي تطورات الله هداج

ليلى : علينا . خبريني عيل شو كانت هاذيج النظرات يوم كنت عندكم قبل اسبوعين

الريم : اي نظرات ؟ اقولج ردي كملي شغلج احسن عن تيي هاذيج

ليلى : انا ما يهمني فيها و لا تحاولين اتغيرين الموضوع . يلا قوليلي شو اسمي هاذيج النظرات الي كنتو اشوفون فيها بعض

الريم : نظرات عاديه و بعد انتي تعرفين اني ما احب علي و اعتبره نفس اخويه خليفه

ليلى : هيه ادري بس هو يحبج و كان باين من نظراته

نزلت الريم راسها و هي اتفكر في علي و الموقف الي صار اليوم الصبح ...

ليلى : ها وين سرحتي ؟

الريم : ماشي بس اليوم شفت علي يوم طلعت للدوام

ليلى : اونه و شو قالج ؟

الريم : ماشي سالني طالعات الحين ؟ فقلت له هيه و قال انه يبا يوصلنا بس انا قلت المره اليايه

ليلى : ليش ؟

الريم : بس جيه مابا اسير وياه

يلسن البنات يسولفن ... عقب ما مر ساعه ... كانن البنات يشتغلن عالملفات الي عندهم و شوي اتشوف ليلى حد و تبتسم ابتسامه عريضه و اتشوف الريم الي كانت لاهيه بالملف الي جدامها ...

ليلى : الريم . الريم

ما انتبهت الريم على ليلى ...

ليلى : الريـــــــــــــــــــــــــــم

الريم : بسم الله بلاج اصرخين جيه . شو فيج ؟

ليلى و هي تاشر بعيونها عالباب : شوفي منو ياينج هناك

الريم و هي اشوف صوب الباب و ترتبك لانها شافت علي ... ما عرفت الريم شو تقوله و هي مستحيه منه ... ( ههههههههه صدقه احمد الحبيب ياي علشان البنيه هب عشان ربيعه ) ...

علي : اقول ليلى وينه احمد ؟

ليلى : مادري والله . لحظه بسير اشوفه وين

علي : خلاص عادي انا بسير اشوفه

ليلى : لا لا انت خلك هني و انا بسير ادوره

ابتسم علي : اوكيه

قامت ليلى : يلا عيل بستاذنكم شويه

الريم : هاااا . على وين سايره ؟

تبتسم ليلى : بسير ادور احمد

طلعت ليلى من الغرفه و هي تبتسم للريم ... شافت الريم ليلى و بوزة بويها و هي اتقول في خاطرها [ وابويه الحين شو اسوي . اسميها ليلوه طفسه . اوووف منها انا اراويها بعدين ] ... شافت الريم علي و هي محترق ويها من حركة ربيعتها ...

الريم : اهلين علي . امممم حياك تفضل

علي : اهلين فيج . شكلج مشغوله

الريم : لا عادي حياك تفضل . شو بتشرب جاي ولا عصير ؟؟

علي : ولا شي

الريم : ما يصير ما تطلب شي

علي : خلاص اطلبي الي تبينه بس انتي بعد تطلبيلج

اتصلت الريم و طلبت عصيرين ... عند ليلى الي كانت تمشي فالممر و هي ما تدري شو اتسوي و شوي تفتح المحادثه فالبيبي و تكتب ...



ليلى :[ اشتــــاق لكــ : بكرهـ .. و قبل امـس .. و الحيـن يالي مع كـ ـل عـرق ينبض وجوديكـ ]

[ ها وينك حبيبي الحين ؟ ]

رد عليها احمد : [ اهلين ليلى . موجود فالدوام ويا ربعي ليش ]

ليلى : [ لا بس غريبه اليوم ما رمستني وايد و بعد مادري احس فيك شي ما تبا اتقوله لي ]

احمد : [ ما فيني شي بس يالس اسولف ويا الشباب فالمكتب و ما حبيت العوزج في شغلج علشان ما تضاربين ويا طيف ]

ليلى : [ لا تحاتي عليه انا اروم عليها المهم ما قلتلي شو اسوي ؟ مشتاقتلك وايد ]

احمد : [ يالس ادردش ويا قلبي الي يسال عنج و يقول متوله عليج ]

ليلى : [ ههههههههه والله مينون ]

احمد : [ شو اسوي محد خبلني غيرج ]

ليلى : [ حبيبي والله يا احمد . ابا اشوفك وينك ]

احمد : [ انا في مكتب برهوم الحين ]

ليلى : [ اها . انزين اقول ترى علي وصل و سالني عنك ]

احمد : [ اها . قوليله عيل اييني مكتب برهوم ]

ليلى : [ اوكيه حبيبي ]

ردت ليلى علشان اتسير مكتبها ... صوب قوم الريم و علي ... كانو اثنينتهم ساكتين من عقب ما يابو العصير لهم ... الريم مرتبكه و مستحيه اما علي ما عرف كيف يقول الرمسه الي في خاطره ...

علي و الريم في نفس الوقت : ا

شافو بعض و سكتو و هم يضحكون عالموقف ...

علي : مريم

الريم : امر يا ولد عمي

علي : من زمان ابا ارمسج بموضوع مهم بخصوصنا

استغربت الريم : خصوصنا ؟ كيف يعني

علي : الموضوع يخصج و يخصني . الصراحه انا يا مريم ( سكت و كمل ) يا مريم انا احبج من زمان و حاولت اني ما افكر فيج بس ما قدرت ارد نفسي . انا ما اعرف شو شعورج صوبي بس يشهد عليه ربي اني ما اجذب ولا العب عليج

تمت الريم اشوف علي و هي منصدمه من رمسته ... نزلت الريم راسها و هي تبتسم ...

علي : مريم انا اسف لو احرجتج بس حبيت اقولج الي في خاطري

رفعت الريم عيونها و اشوف علي الي كان يشوفها و هو مستانس ... قبل لا ترمس الريم وصلت ليلى عند باب المكتب ...

تبتسم ليلى : احم احم ممكن ادخل

لفو علي و الريم ويهم صوب الباب و استحو من الموقف ... تمو اثنينتهم ساكتين و فهمت ليلى و هي تضحك في خاطرها ...

ليلى : سوري عالمقاطعه . هي علي احمد يالس في مكتب ابراهيم و هو يترياك هناك

قام علي : خلاص مشكوره ( يشوف الريم ) مع السلامه

الريم بصوت واطي : الله وياك الغالي

طلع علي من المكتب و هو مرتاح انه قال مشاعره للريم اما الريم اول ما طلع علي اتنهدت من خاطرها و يلست ... شافت ليلى الريم و تضحك ...

ليلى : هههههههههههههههههههههه

شافت الريم ليلى بنص عين : بلاج تضحكين ؟

ليلى : ولا شي بس انتي بلاج اتقولين جنه قلبج توقف عن الدق

الريم : بسم الله عليه . بلاج تتفاولين عليه يالدبه

ليلى : ما اتفاول عليج بس ويهج يقول جيه

الريم : ولا شي بس ويهي كان محترق جدام علي

ليلى : ليش شو استوى ؟

الريم : ولا شي سلامتج المهم ابا اعرف ليش ظهرتي عني يوم وصل علي ؟ ليش ممكن اعرف

ليلى و هي اتحيس شفايفها و عيونها : امممممم

الريم : شو اممممم ؟

ليلى : حبيت اخليكم بروحكم و بعد عرفت من شكله انه ياي علشان يرمسج عن شي

عصبت الريم : و انتي منو قالج هالشي ولا تخترعينه من مخج يالدبه

ليلى : وابويه عالي معصبه . انتي ما سالتي عمرج ليش علي سالني عن احمد حتى انه يقدر يتصل فيه و يساله وينه

الريم : انزين و يعني

ليلى : يعني يالذكيه احمد بس حجه علشان ايي البنك

بوزة الريم و تبتسم ليلى ...

ليلى : يلا عيل فديتج انا بترخص الحين من الدوام

الريم : ليش وين بسيرين ؟

ليلى : عندي موعد ويا شخص غالي عليه

رفعت الريم حاجبها : و منو هالشخص ؟

ليلى : ماماتي فديتها

الريم : امج ؟

ليلى : هيه . ليش ناسيه اني من شهر و نص هب شايفتنها . تولهت عليها وايد والله

الريم : انزين و يدتج تدري ولا

ليلى : لا ما تدري . يلا اشوفج بعدين

طلعت ليلى من المكتب ... صوب احمد الي كانت يالس ويا ربعه الي فالدوام ... كان يفكر بالي قالته ليلى انها ما اداني طيف موليه و يقول في خاطره [ لا حول والله ما اعرف شو اسوي الحين ابا اقوللها الموضوع بس هب مجرأ . المشكله لو قلتلها بتتحسس و بتكرهني و ان ما قلتلها بعد بتحسس . يالله ما اعرف شو اسوي ] ...

ابراهيم : احمدوه

بس ما انتبه احمد على ربيعه ...

محمد : احمد

انتبه احمد : هلا

ابراهيم : وين سرحت يا ريال

احمد : موجود وياكم . خير ؟

محمد يشوف صوب باب المكتب : ها علي انت شو رايك بربيعك كان سرحان ولا

علي : اميه بالاميه سرحان ههههههههه

احمد : والله اسميكم فايجين ( قام من مكانه ) يلا علي خلنا نظهر

محمد : بل خل الريال ايلس شويه و يشرب جاي

احمد : ما يحتاي المره اليايه هب الحين

طلعو الشباب و يلسو يتمشون فالممر ...

علي : احمدوه شكلك مهموم بلاك ؟

احمد : ما فيني شي

علي : الا قول هالرمسه لغيري . قولي الحين شو فيك ؟

احمد : بقولك السالفه فالسياره

صوب ليلى الي كانت طالعه من البنك رن فونها و اترد ...

ليلى : اهلين و سهلين بالحلوه

ام ليلى : اهلين فيج ليلى حبيبتي شحالج

ليلى : بخير ماماتي و انتي

ام ليلى : بخير دام بنتي بخير . وينج طولتي تراني مشتاقتلج وايد

ليلى : توني طالعه من الدوام

ام ليلى : يلا عيل بنترياج و بعد بقولج ترى قوم خالتج شيخه بتي

ليلى : خالو شيخه ؟؟

ام ليلى : هيه . يلا لا تتاخرين

ليلى : ان شا الله الغاليه

سكرت ليلى على امها و هي امبوزه لانها ما اداني خالتها شيخه ابدا ... عقب ما طلعو الشباب من البنك ... كانو الشباب بيركبون السياره و شوي يشوف احمد ليلى الي كانت سايره صوب سيارتها و يستغرب ...

احمد : ليلى

شاف علي احمد و شاف ليلى الي دشت سيارتها ...

علي : بلاك مستغرب

احمد : انا ما احيد ليلى تطلع الحين من دوامها

علي : يمكن عندها شي اسويه

احمد : اذا كان عندها كانت بتخبرني

علي : يلا الحين لازم كل شي اتخبرك البنيه يمكن ما تبا اتقول

احمد : سير عني لاه

خذ احمد فونه و اتصل في ليلى بس هي ما ردت عليه لانه الفون كان بالشنطه ...

احمد : هب طايعه اترد

علي : بسك خل البنيه في حالها

احمد : اوكيه يلا قوم انسير نتغدا تراني يوعان

طلعو الشباب من عقب ما طلعت ليلى ... عقب ما مر الوقت ... ردن قوم الريم البيت ... في بيت ابو خليفه ... في وقت الغدا ... كان كل حد موجود الا ابو خليفه الي كان راقد في غرفته ...

الريم : عمتي

امنه : خير شو تبين ؟

طنشت الريم امنه : وينه ابويه و ليش هب موجود ؟

ام خليفه : ابوج راقد في غرفته و قال بعدين بيتغدا

عقب ما خلصت الريم غداها سارت غرفة ابوها ... دشت الريم الغرفه و شافت ابوها الي كان راقد عالفراش ... قربت الريم صوب ابوها و تمت اشوفه و هي اتقول في خاطرها [ فديت ويهك يالغالي والله امـــــوت فيك يا ابويه ( حطت ايدها على خده ) احبك باباتي ) ... قامت الريم علشان تطلع من الغرفه بس تسمع صوت ابوها و توقف ...

ابو خليفه : الريم

الريم : امر ابويه

ابو خليفه : تعالي يالغاليه عند ابوج

ردت الريم عند ابوها و يلست على طرف الشبريه ...

ابو خليفه : الريم فديتج ابا اوصيج على حالج و على اخواتج .. اباج تهتمين فيهن و ما اتخلينهن بروحهن تراهن صغار و ما عندهن حد غيرج من عقب موتي

خافت الريم : بسم الله عليك ابويه لا تقول جيه . عسى الله يطول بعمرك يالغالي و يحفظك لنا امين

ابو خليفه : يالغاليه انا هب عارف لو بموت اليوم ولا باجر بس ابا اموت وانا مرتاح عليكم

سكتت الريم و فيها صيحه و في نفس الوقت خايفه على ابوها ...

الريم : لا تحاتي يا ابويه بناتك بخير دامك حي

ابو خليفه : فديتج الغاليه

باست الريم راس ابوها و طلعت من الغرفه ... اول ما وصلت الريم غرفتها سكرت الباب و هي هب عارفه بشو اتحس يا بالخوف على انها تفقد ابوها ولا بالفرح لانه علي اعترف لها بحبه ...

عليا : الريم وين كنتي ؟

ما ردت الريم على عليا لانها بعدها اتفكر ...

شما : مريوم حبيبتي . مريــــــــــــــــــوم

انتبهت الريم : هلا

عليا : اسالج وين كنتي ؟

الريم : كنت عند ابويه

صوب قوم ليلى الي كانت في بيت يدتها ... كانت ليلى يالسه اتسولف ويا يدتها ...

يدة ليلى : فديتج الغاليه والله عيوني ولهت عليج وايد

ليلى : حتى انا امايه وايد اشتقت لج

ين ام ليلى و خالتها من المطبخ ...

ام ليلى : ها عن شو اليده و الحفيده يرمسون

ليلى : ماشي اسرار ما تنقال صح امايه

يدة ليلى : صح فديتج

خالة ليلى : وايه الحين صارت اسرار يوم نحنا سالنا . اشدعوه ؟

شافت ليلى يدتها و امها و سكتت ...

ليلى : صح خالو شحالهن بناتج . وينهن ما ين وياج اليوم ؟

خالة ليلى : لا فديتج البنات خليتهن فالبيت

ليلى : اها

شوي و يدش ولد خالة ليلى و اسمه منصور و هو اكبر منها بسنه ...

منصور : السلام عليكم

الكل : عليك السلام و الرحمه

سار منصور ليدته و باس راسها : شحالج امايه ؟

يدة ليلى : بخير الله يسلمك يالغالي

شاف ليلى و ابتسم لها اما ليلى ما عطته ويه ...

منصور : شحالج خالو ان شا الله زينه ؟

ام ليلى : الحمد لله يالغالي و انت شحالك

منصور : والله يسرج حالي ( لف لليلى ) ها بنت الخاله بتسالين عن الحال ولا لازم انا اسال ؟؟

ليلى : والله انا حالي مثل ما اتشوف زينه و انت شكلك تشقح و تنطح يا ولد الخاله

احترق ويه منصور من رمست ليلى و شافت ام ليلى بنتها ...

ليلى : يلا عيل استاذنكم الحين برد البيت

يدة ليلى : و ليش مستعيله هالكثر هالرده ؟

ليلى : والله ودي اتم زياده يا امايه بس تدرين امايه فالبيت بروحها

شافت ليلى امها و عرفت انها اتفكر بالي صار قبل ...

ليلى : فديتج يالحلوه والله تراج غاليه و بعد انا موجوده دوم وياكم تراني هب بعيده وايد الا لو عرست

ام ليلى : امين يالغاليه اتمنى اشوفج عروس و افرح فيج

ليلى : ههههههههههه لا لا ما ابا استعيل و اندم بعدين

منصور : ليش هب واثقه انج بتكونين زوجه زينه ؟

ليلى : امبلا واثقه وايد بس ما ابا اخذ واحد ما يستاهلني و عقبها اندم و اصيح ترى حياتي انا الي بتدمر هب هو صح يدوه ولا

يدة ليلى : هيه والله يا اميه بس بعد الزواج سنة الحياه ولازم الواحد يعرس

منصور : ها الحين شو رايج بالي قالته امايه

ليلى : لا جدال على رمست يدوتي

عصبت يدة ليلى : شو يدوتي بعد . انا شو اقولج دوم قوليلي امايه

ليلى : ههههههههههه ان شا الله من عيوني . يلا عيل اشوفكم جريب ان شا الله

باست ليلى راس يدتها و بارست امها على خدها ... طلعت ليلى من البيت و شوي تذكر انها طول الوقت كانت حاطه الفون فالشنطه ( يعني من يوم طلعت من الدوام الين ما طلعت من بيت يدتها ) ... طلعت ليلى البيبي مالها و شوي اشوف 20 مس كول من احمد و 10 من يدتها و 5 من ابوها ... ليلى و هي اتقول في خاطرها [ وابويه اسميهم حرقو فوني حراق اليوم .. يحليله حبيبي اكيد يلس يحاتيني ] ... و شوي اشوف المسن مال البيبي و ادش المحادثه و كان احمد كاتب لها ...



[ وينـــك يا غلا روحي تراني مشتاق لك حيل .. وينـــك عني يالي اهواكــ مـــوت .. لا تروــــح و تتركني وحيــــــــد بلياك يا حياتي ]

[ وينج دلوعتي ليش ما تردين عليه . تعالي وين طلعتي اليوم الظهر من الدوام تراني شفتج و انتي راكبه سيارتج ]

[ ليلوه دلوعتي ردي عليه لا تخليني احاتيج . ردي الله يخليج ]

[ لــــيــــــــــلـــــــوه . وينج ردي ]

[ 10 بنقات ورا بعض ]

يلست ليلى اشوف الرمسه و هي تضحك على احمد ... طلعت ليلى من بيت يدتها و يرن فونها و كان احمد هو الي داق ...

ليلى : الووو

احمد معصب : الووو . ليلوه وينج ليش ما تردين عليه طول هالوقت

ليلى : سوري والله توني انتبهت ان فوني كان فالشنطه

احمد معصب : لا والله حد ينسى فونه فالشنطه

ليلى : هههههههههه اسفه

احمد : لا والله و تضحكين بعد يا سلام

ليلى : اسفه حبيبي والله تراني نسيته . شكلك كنت مشتاق لي وايد شالسالفه

احمد : ليش الحين يوم اتوله عليج بعد يباله سالفه

ليلى : لا بس مستغربه هههههههههه . وابويه عصب الدب

احمد : انا هب دب . صح تعالي وين سرتي اليوم الظهر يوم طلعتي من الدوام

ليلى : كنت سايره عند ماماتي تراها كانت تبا اشوفني

احمد : و ليش ما قلتيلي انج طالعه

ليلى : شفتك مضايق و مالك خلق ترمس فقلت بخبرك بعدين

احمد : مره ثانيه خبريني وين سايره هب اتخليني احاتيج فاهمه

ليلى : ههههههه ان شا الله من عيوني يالغالي

يلست ليلى اتسولف وياه ... عقب المغرب ... في بيت ابو خليفه ... في غرفة الريم ... كانت طايحه عالفراش و هي اتفكر بالي صار لها اليوم و تقول في خاطرها [ معقوله علي كان يحبني من زمان و كيف ما لاحظت هالشي . اليوم حتى ما عرفت شو اقول له يوم اعترف لي والله احسني تخبلت هب عارفه شو كنت لازم اسوي . زين ليالي يت و انقذتني من الموقف وابويه ] ... شوي و يقطع رنة الفون حبل افكارها ...

الريم : يا هلا بحبيبتي ليالي

ليلى : اهلين فديتج شحالج ؟

الريم : بخير . خير شو مستوي ؟

ليلى : ماشي انهزبت من الكل اليوم ههههههههه

الريم : كيف يعني ؟

ليلى : يعني كل حد هزبني ابويه و امايه حتى احمد

الريم : اونه . وشو السبب ؟؟

ليلى : لاني ما رديت عليهم يوم اتصلو على فوني الي كان بالشنطه هههههههه

الريم : تضحكين بعد

ليلى : شو اسوي انزين تراني ما انتبهت ان الفون كان بالشنطه و اول ما اذكرته شفت المس كولات

يلسن البنات يسولفن ...



خلصت البارت الاول و الحين اتريا الردود الغاويه من صوبكم

[ميزتي بدلعي]

فووووووووووووووووووووووووق

[ميزتي بدلعي]

فوووووووووووووووق

[ميزتي بدلعي]

فووووووووووووووووووووووووووق

[مسكينة يا انا]

فالأنتظار

[ميزتي بدلعي]

فالأنتظار



مسكينه تراني نزلت الجزء الباقي من البارت الاول بس يبالج اشوفين فوق



اتريا ردج عالبارت و توقعاتج عن الي بصير فالبارت الياي

[9amt el8alb]

حلوووو ......

عجبني عجبني ....

سلمتي عالقصه ...


دمتي بود ..&& ...

[مسكينة يا انا]

يب اعرف وقريته انا طماعه اتريا البارت الثاني ^^

طال عمرج توقعااتي كلها شؤم ف احسن اسكت

تسلميين اختي

[ميزتي بدلعي]

حلوووو ......

عجبني عجبني ....

سلمتي عالقصه ...


دمتي بود ..&& ...





الله يسلمج حبيبتي


كلج ذوق حبيبتي

[ميزتي بدلعي]

يب اعرف وقريته انا طماعه اتريا البارت الثاني ^^

طال عمرج توقعااتي كلها شؤم ف احسن اسكت

تسلميين اختي



هههههههههههه لا يهمج حبيبتي ان شا اله الحين بنزل لكم البارت الثاني بس نصه عشان تشتاقون للباقي من البارت



ههههههههههه الله يسلمج حبيبتي

[ميزتي بدلعي]

بااااااااااااك



رديت و يبت لكم البارت الثاني من القصه و اتمنى انها اتعيبكم








===&===&===

@ البارت الثاني @

===&===&===

اليوم الثاني ... في بيت ابو خليفه ... كانو كلهم يالسين عالريوق الا ابو خليفه الي كان راقد في غرفته ... كانو كلهم ساكتين حتى امنه الي كانت اطالع الريم بظرة قهر و عصبيه ... لاحظت الريم امنه بس تمت ساكته لانها ما تبا تضارب وياها ... قامت الريم علشان اترد غرفتها و اشوفها امنه ...

امنه : ها مريم غريبه ما خلصتي ريوقج ولا هب عايبنج الاكل

الريم و هي اشوف امنه : والله الحمد لله الاكل ما عليه كلام بس ابا اغير لبسي قبل لا ايي الدريول

سارت الريم و وياها اخواتها ... في غرفة البنات ... عليا كانت معصبه على رمست امنه ...

عليا : هاي بلاها جيه عفانا دومها اطيح علينا !!

شما : و انتي بلاج معصبه تراها قالت الرمسه للريم هب لج

عليا : لا والله حتى لو قالت الرمسه لها شو يعني

الريم : علايه بسج تحرطيم و يلا قومي اتلبسي

عليا : ما ابا اسير اليوم التقنيه والله ملل هناك و بعد الي وياي فالكلاس ما اعرفن غير حصوص

شما : ردينا على نفس المنوال و بعد بخبرج هب لازم تعرفينهن الحين

عليا : جب انتي لا تدخلين

الريم : عليا عن طولت اللسان و بعد مع مرور الايام بتعرفينهن

عقب ما خلصن البنات نزلن تحت ... تمت الريم تتريا الدريول ...

الريم : وينه هذا وايد تاخر اليوم

عليا : شكله عرف اني ما ابا ادام اليوم

طنشن الريم و شما ... في بيت ابو علي ... كان علي طالع من غرفته و يشوف امه ...

ام علي : ها يالغالي طالع الحين

باس علي راس امه : هيه فديتج امايه . تامريني بشي الغاليه

ام علي : ما يامر عليك عدو يالغالي و الله يحفظك ان شا الله

علي : يلا عيل بسير اشوف ابويه و عقبها بظهر

ام علي : الله يرضى عليك يا ولدي

نزل علي و سار عند ابوه الي كان يتريق و هو يالس على فراشه ... دق علي باب غرفة ابوه و دش ...

علي : ابويه

ابو علي : تعال يا ولدي

قرب علي صوب ابوه و قلبه يعوره على حالته ...

علي : بالعافيه عليك ان شا الله . انا طالع للدوام تامرني بشي

ابو علي : ما يامر عليك عدو بس اباك اتمر على عمك و اتشوفه

علي : ان شا الله يالغالي

طلع علي من غرفة ابوه و شوي تظهر حصه جدامه ...

علي : بسم الله الرحمن الرحيم . بلاج جيه طالعتلي ينيه

حصه : ينيه حرمتك هب انا . فديتني غزاله عايشه ويا اسود

ذياب : حوووه اي اسود و اي غزاله ؟؟ ماماتي سيري شوفي عمرج بالمنظره اول . ههههه قالت غزاله قالت

حصه : انته اسكت يالشيفه

ذياب : فديت شيفتي الي كل البنات يتخبلون فيه هب انتي قرد الشمبانزي

حصه : هيه نسيت انك اكبر مغازلجي في بوظبي

ذياب : الا قولي في البلاد كلها هب بس بوظبي

طنشت حصه ذياب و قالت : المهم علي اباك اليوم اتوصلني الدوام

علي : اسمحيلي ما اقدر لازم الحق على شغلي . سيري ويا قوم الريم

حصه : مابا ملل وياهم فالسياره

ذياب : ياخي لا اذلها تراها شويه و بتقوم تضربك

حصه : فديتني ما اضرب الا السبلان مثلك

ذياب : حصوه يودي لسانج

حصه : علي شو قلت الحين بتشلني الدوام و لا

علي : انزين لا تاكلين مخي

عقب ما طلعو علي و حصه من البيت ... سارو بيت عمهم و يشوفون عليا الي كانت واقفه برع اما الريم و شما كانن عند ابوهن ...

حصه : عليوه شو اسوين هني بروحج ؟ وينهن الريم و شما ؟

عليا : سارن عند ابويه

حصه : ليش بلاه عمي ؟

عليا : ولا شي بس جيه سارن عنده

علي : يلا عيل انا بعد بسير اسلم على عمي

حصه : لا والله هب جني بتاخر على دوامي

علي : دوامج لاحقه عليه . اول قومي سلمي على عمج ترى عيب ما اسلمين

بوزة حصه : انزين

نزلو علي و حصه من السياره و دشو داخل ...

علي و حصه : السلام عليكم

ام خليفه و امنه : عليكم السلام

سار علي و باس راس ام خليفه ...

علي : شحالج عموه ؟؟

ام خليفه : بخير الله يسلمك و انت شحالك شحال اهلك ؟؟

علي : كلهم بخير الحمد لله

سار علي صوب غرفة عمه و قلبه يدق لانه ما يعرف شو بكون موقف الريم من عقب ما قال لها مشاعره يعني بطنشه ولا تكرهه ولا بطالعه بنظرات ... دق علي الباب و دش و هو يحاول انه يكون طبيعي ... الريم اول ما دش علي تمت اشوفه و هي هب حاسه بعمرها ... ابتسم علي و هو يشوف الريم ... قرب علي صوب الريم الي كانت يالسه حذال شبرية ابوها ...

علي : السلام عليكم

شما و ابوها الا الريم : عليكم السلام

لف علي صوب الريم : وين رد السلام

انتبهت الريم : ها ( نزلت راسها ) عليكم السلام

شاف علي عمه : ها عمي شحالك ان شا الله بخير ؟؟

ابو خليفه : الحمد لله يالغالي والله بشوفتكم اكون بخير

علي : ان شا الله مديم حالك يا عمي

ابو خليفه : ان شا الله يا ولدي . شحاله ابوك ؟

علي : الحمد لله يسلم عليك ابويه

ابو خليفه : الله يسلمه ان شا الله

لف علي صوب الريم : الا الريم وينه الدريول ليش ما ياكم

الريم : ما اعرف والله . لحظه بسير اتصل فيه

علي : انزين بس قوليله لا ايي لاني بوصلكم دواماتكم

شما : ليش ما بسير دوامك

علي : امبلا بسير بس اول شي بوصلكم و عقبها بسير دوامي

الريم : ما يحتاي عادي انت سير دوامك ( اتصلت للدريول ) الووو ها بابو وينك الحين

الدريول : ماما انا ما يقدر ايجيه الحين ترا سياره خربان

الريم في خاطرها [ الله يغربل سيارتك وياك امين . لا حول الحين مجبوره اسير ويا علي . بروحي ويهي محترق من امس ]

علي : ها شو رد عليج

الريم : ما بيي لانه السياره اختربت عليه ( ترد الدريول ) خلاص الحين سير صلح السياره عشان يجيب اخواتي بعدين

سكرت الريم عالدريول و شافت علي و ابوها ...

ابتسم علي : يعني خلاص بتون هالمره و ما ترومين اترديني

تمت الريم اشوف علي و هي مستغربه منه ...

ابو خليفه : ولدي علي

علي : امر الغالي

ابو خليفه : يالغالي ابا اوصيك على بنات عمك . ما اباك تهملهن من عقب موتي ترى مالهن حد من عقبي . اباك ادير بالك عليهن و اتحافظ عليهن

الريم : ابويه فديتك لا تقول جيه

علي : صدقها عمي الله يهديك ليش ترمس جيه تراك موجود وياهن و ان شا الله بتفرح فيهن يوم بعرسن و بشوف عيالهن

ابو خليفه : يا عيالي العمر يفوت و الله العالم متى بيي يومي و اروح من الدنيا . بس اباك تحافظ عليهن ترى ما اروم اثق من عقب الله الا فيك

علي : ان شا الله لا تحاتي يا عمي بناتك فالحفظ و الصون

شاف علي الريم الي كانت اشوف ابوها و هي تبا اصيح ...

علي : الريم يلا قومن بوصلكم الدوام

طلعن الريم و شما من الغرفه ويا علي ... ركب علي السياره و الريم ركبت ورا ويااخواتها اما حصه يلست جدام ...

علي : حصوه ليش ما يلستي ورا ؟؟

حصه : و ليش ان شا الله ايلس ورا ؟

علي : لانج صغيره و الريم اكبر و هي لازم تيلس جدام

حصه : لا والله

علي : هيه والله و بعد هاي سيارتي . يلا قومي و خلي البنيه تيلس جدام

الريم : لا علي خلها تيلس جدام

بوز علي و طلع من بيت عمه ... في بيت ابو ليلى ... كانت ليلى يالسه تتريق ويا ابوها و يدتها ... كان الجو يربك بسبت ليلى يوم ما ردت عليهم امس ...

ليلى : ابويه

ما رد ابو ليلى على بنته ...

ليلى : باباتي . ابويه حبيبي

ابو ليلى : خير يا بنتي ؟

ليلى : امممم ممكن اطلع اليوم المول ويا بنات عمي علي

يدت ليلى : و ليش ان شا الله تبين اسويلنا نفس امس يوم ما بغيتي اتردين علينا

ليلى : امايه حبيبتي تراني قلتلج اني ما شفتكم يوم اتصلتو فيني

يدت ليلى : ليش وين كنتي يوم كان فونج يدق

ليلى : امممم خليت فوني في سيارتي و نزلت بيت ربيعتي . بليز باباتي خلني اسير

ابو ليلى : خلاص سيري بس ها لا تتاخرين ولا ما بخليج تظهرين مره ثانيه

استانست ليلى و قامت اتبوس ابوها : فديتك حبيبي ان شا الله ما بتاخر

يدت ليلى : وابويه منج من لوتيه

سارت ليلى عند يدتها و باستها : فديتج امايه . يلا انا سايره دوامي

يدت ليلى : الله وياج غناتي

سارت ليلى و هي مستانسه ... فتحت ليلى المحادثات عندها الي هو BBM و فتحت محادثة احمد و استغربت انه ما طرش لها اي شي ... كتبت له ليلى كلام و كان مكتوب فيه ...



ليلى [ يا اللهـ " لا تحرم " عيوني من عيونهـ .. ما دام حبهـ في حشا خفوقي سامي .. صباح الخير حبيبي ]



طلعت ليلى من البيت ... في بيت ابو احمد ... كان احمد راقد ...

فتحت ام احمد الباب : احمد يلا قوم الحين الساعه 8 و نص الصبح

احمد : اويه 8 و نص . خلاص الحين بقوم

قام احمد و نزل تحت عقب ما اتغسل ...

احمد : السلام عليكم

ابو و ام احمد : عليك السلام

ام احمد : ها احمد يلا تريق ريوقك

احمد : لا بس بسويلي سندويجه و بظهر

ابو احمد : و ليش مستعيل هالكثر عالدوام

احمد : ابويه الله يخليك بروحي متاخر عالدوام

ام احمد : دواك عيل محد قالك ما ترقد بسرعه

احمد : المهم يلا بترخص عنكم انا

طلع احمد من البيت ... وصل علي تقنية البنات ...

علي : حصه تبيني اييج عقب ما تخلصين ولا اخلي ذياب اييج

حصه : شو ذيوب ؟ لا لا فديتك انت تعال و خذني هب اتخلي اخوك المينون

عليا : هيه والله صدقج مينون ههههههههه

حصه : يلا قومن اندش داخل

دشن البنات و علي بعده ما تحرك ... كان يشوف الريم الي كانت يالسه ورا ...

الريم : علي بلاك واقف

علي : اترياج تيلسين جدام

فتحت الريم حلجها : هااااا !!!

علي : لا ها ولا شي يا تيلسين جدام ولا ما بتحرك من هني

الريم : السموحه منك بس ما اقدر

علي : عيل ما بتحرك

تمت الريم اشوف علي و هي مستغربه منه و هب عارفه شو اسوي ... تقول الريم في خاطرها [ ياربي من هالعنيد شو مستوي به اليوم ] ...

علي : ها قررتي ولا بعدج ؟

الريم : خلاص بيلس

طلعت الريم و يلست جدام و هي امبوزه ... تحرك علي و هو مستانس ان الريم يالسه حذاله ... في تقنية البنات ... كانت شما يالسه بروحها فالكانتين و شوي تيي ربيعتها من وراها و اتحط ايدها على عيونها ...

عايشه : احم احم منو انا

شما : عواش عاد

عايشه : اوووف دبه

تضحك شما : هههههههه هلا و الله

تبتسم عايشه : هلا فيج عمري شحالج ؟؟

شما : الصراحه تعبانه وااايد

عايشه : و ليش ان شا الله عاشقه حد و انا مادري

شما : لا حبيبتي كنت طول اليل سهرانه على الفلم الانجليزي

عايشه : فايجه و الله عالافلام انتي

شما : سكتي الله يخليج هالفلم خاصة وااايد احبه

عايشه : يااااااع و الله ما عشقت هالافلام الانجليزيه البايخه صدق ذوقج بايخ

شما : انزين خلينا من ها و قوليلي شحالج و شخبار الاهل

عايشه : الاهل هممم الحمد لله كلهم بخير الا واحد متخبل

شما : هههههههههههه قصدج انتي

بوزة عايشه : دبه والله . انا ربوشه هب خبله

ضحكن البنات و شوي تيي اسما صوبهن ...

اسما : السلام عليكن

البنات : عليج السلام

عايشه : هلا اسامي كيف الحال

اسما : يسرج الحال و الله

تمن البنات يسولفن ... صوب عليا و حصه الي يالسات يسولفن فالكلاس ...

عليا : اوووف خلصنا من المدرسه و بدينا بالتقنيه

حصه : هههههههههه صدق خبله

عليا : يبوج ما صدقنا افتكينا من هناك و الحين هني بعد . شو هالحاله

يت شوق عندهن : هلا بنات .. شحالكن ؟

عليا : بخير الحمد لله و انتي

شوق : بخير و عافيه

كانن عليا و حصه يعرفون شوق لانها كانت تدرس وياهم في نفس المدرسه ... في هالوقت ... في سيارة ذياب ... كان بعده مب واصل التقنيه و شوي يرن تلفونه ...

ذياب : يا مرحبا السااااااع

يمعه : مرحبا فيك ذيوب . ها وينك الحين تراني اترياك من الصبح

ذياب : موجود بس الله يهدي الاهل ما خلوني بحالي

يمعه : ليش انت Business Man

ابتسم ذياب : احم احم اكيد ليش عندك مانع

يمعه : لا اكيد المهم يلا بسرعه تعال ترى الكلاس بيبدا بعد شوي

ذياب : اوووف هالي كان ناقصني

يمعه : لا تذمر و يلا

سكر ذياب و كمل دربه ... في سيارة علي ... كان يبا يرمس بس هب قادر و شوي يشغل انشوده اسمها حلوة الاحساس ...

الريم : شكلك اتحب تسمع اناشيد عالصبح

علي : هيه لاني ما احب اسمع اغاني و بعد الواحد لازم يذكر الله عالصبح

تبتسم الريم : و النعم بالله

شاف علي الريم و هي تبتسم و استانس انها وياه الحين ...

علي : الريم

الريم : هلا

علي : ابا اسالج اذا ممكن

الريم : اتفضل

علي : امممم . زعلتي امس مني يوم قلتلج اني احبج

الريم : لا ولو و ليش ازعل ؟

علي : مادري قلت يمكن زعلتي و قلتي اني ما استحي و اني جذاب

الريم : اذا ما كنت اعرفك كنت بقول جيه بس انت ولد عمي

ابتسم علي و نزلت الريم راسها و هي اتفكر ...

الريم : انزين ممكن انا اسالك الحين

علي : اكيد اسالي

الريم : ليش حبيتني انا

علي : والله بروحي ما اعرف . قلبي هو الي اختارج و انا طعته بس فيج شي جذبني صوبج

الريم : شو هو

علي : طيبتج و اخلاقج ترى نادر الواحد يحصل وحده نفسج

استحت الريم : شكرا و بعد هاي تربية ابويه

علي : الله يحفظه و يخليه لكم و لنا

نزلت الريم عيونها : امين

علي : مريم بلاه عمي اليوم رمس جيه

الريم : مادري والله حتى امس يوم كنت يالسه عنده تم يوصيني على اخواتي

علي : اها . يلا وصلنا البنك

وقف علي السياره و نزلت الريم ...

الريم : مشكور يا ولد عمي عالتوصيل

علي : لا شكر على واجب

سارت الريم و طلع علي من البنك ... عقب ما وصل ذياب التقنيه ... دخل ذياب و شاف سيف ...

ذياب : سيااااااف

سيف : هلا و الله بذيوبي

ذياب : اقول يا ريال خوز عني لا ترمسني

سيف : افاااا ليش ؟؟

ذياب : كم مره اقولك لا تقول ذيوبي

سيف : هههههههههه خلاص هاي اخر مره

ذياب : هيه شطور لانك لو قلتها مره ثانيه افهمها انك على حبل المشنقه

سيف : هههههههههه وابوي شكلك ناوي تذبحني

تمو الشباب يمشون و يسولفون الين ما وصلو الكلاس ... دخلو اثنينتهم و شوي يشوفون الاستاذ موجود ...

الاستاذ و هو يشوف الشباب : good mooring boys

الشباب : good mooring sir

الاستاذ : I think you are late boys or I’m wrong

ذياب : yes sir you are right but we have reason for it

الاستاذ : Ok this time I will ignore it

يكمل الاستاذ شرحه و شوي يقول ذياب لربعه ...

ذياب : اقول شباب مب جنه هالاستاذ جديم وايد

سيف : الا جديم الله يخليك ها من يوم دشينا التقنيه و هو ما طلع منها

يمعه : شباب اسكتو عن يسمعكم الاستاذ

ذياب : انت اسكت يالخواف

لف الاستاذ صوب الشباب و يقول لهم و هو معصب : yes boys do you have something ?

يمعه : no sir

الاستاذ : are you sure ?

يشق ذياب ضروسه : yes sir

الاستاذ : Ok

يشوف ذياب سيف و يمعه و هو يرفع حواجبه ... فالبنك ... كانت الريم توها موقعه على حضورها و شوي اشوف احمد الي توه وصل ...

الريم : احمد

احمد : هلا الريم

الريم : بلاك شكلك متبهدل

احمد : ما فيني شي بس ناش متاخر اليوم

الريم : ههههههههههه اوكيه . يلا عيل انا بسير مكتبيه

احمد : اوكيه

سارت الريم ... وصلت الريم المكتب و شوي اشوف ليلى الي كانت يالسه على مكتبها و هي معصبه ...

الريم : ليلوه شو مستوي

ليلى : ولا شي

الريم : بس واضح من شكلج في شي

صارخت ليلى : ما فيني شي . خلاص فكيني اووووف

الريم : اسفه

ردت الريم مكتبها و يلست تشتغل عالملف الي جدامها ... كانت ليلى مضاربه ويا طيف قبل لا تيي الريم علشان جيه ... طلعت ليلى فونها من شنطتها و اشوف المحادثه فالبيبي لاحمد و تستغرب انه ما طرش لها شي من الصبح ... طرشت له ليلى كلام ...



ليلى : [ تدري وش الي في حياتي " عشقته " وجودك الي صار يسوى كل " الخلايق" ]



ليلى : [ وينك احمد .. شكلك اليوم وايد مشغول حتى رساله حلوه ما لقيتها منك . طمني عليك ]


استغربت ليلى لانه احمد ما رد عليها موليه ... طرشت ليلى له 3 بنقات بس بعد ما رد عليها ... دشت طيف المكتب و هي اتشوف ليلى باحتقار و كراهيه ... طنشت ليلى طيف و قامت من مكتبها ... طلعت ليلى و هي هب عارفه وين اسير ...



تابع ...


بس اول شي الردود

[مسكينة يا انا]

انزييين <<<

[ميزتي بدلعي]

انزييين <<<



:sm142:


ان شا الله بنزل الباقي عقب الرد الياي و تسلمين عالغلا عالرد و المرور المميز

[مسكينة يا انا]

:sm11:

[خيـــــالية!!]

القصه حمااااااااااااس مره

نتريا الغاليه لا تتاخري

الصراحه ما احب اتريا ياريت تحطين البارتات ورى بعض على الاقل ثنين

وشوووكرا

^^

[حصناويه]

وايد حلوه القصه كمليها الغاليه نترياء