تراكم وايد تــبــربــرون !

[الكابتن]

28 مليار دقيقة تكلمها سكان الإمارات في 2011

متوسط إنفاق الفرد على هاتفه وصل 148 درهماً شهرياً


الثلاثاء 22 رجب 1433هـ - 12 يونيو 2012م








http://images.alarabiya.net/dd/d5/436x328_20501_220111.jpg












بلغ متوسط إنفاق الفرد على الهاتف المتحرك في الإمارات 148 درهماً شهرياً، بمتوسط استهلاك بلغ 181 دقيقة شهرياً، بحسب ما ذكرت جريدة "الإمارات اليوم" الإماراتية.


وبلغ عدد دقائق المكالمات الصوتية التي أجراها مشتركو الهواتف المتحركة في الإمارات خلال عام 2011 أكثر من 24.3 مليار دقيقة، بينما تحدث مشتركو الهاتف الثابت 4.4 مليارات دقيقة خلال عام .2011


وقالت الهيئة العامة لتنظيم الاتصالات، في التقرير السنوي الثالث لسوق الاتصالات في الدولة ،2011 إن إيرادات مشغلي الاتصالات، مؤسسة الإمارات للاتصالات (اتصالات) وشركة الإمارات للاتصالات المتكاملة (دو)، من الهواتف المتحركة والهواتف الثابتة والإنترنت خلال عام 2011 بلغت أكثر من 26 مليار درهم، منها 19.9 مليار درهم عائدات المتــحرك فـــقط، تمثل نسبة 76.5٪ من الإيرادات الإجمالية.
-


الله يزيد ويبارك :aa_roma2:

[اماراتي وافتخر 40]

شكرا للخبر

[الحالم]

فاتورتي في الشهر بين 300 و400 درهم ..
ولكن في بعض الناس ..يتكلمون بالساعات ..
إذا مراهق يتكلم عن السيايير : حمود ركّب كام من كراج الفلاني ولكن أثّر في الجامبينات وغّير جامبينات ولكن أخترب أكسل وسار نازع راعي الكراج وراعي الكراج يومين وغيّر له درام ويل ..الخ يعني سوالف سطحية ...
وإذا حرمة : يقولون موزة ربّت ويابت بنت وحليلها هذي رابع بنت أكيد ريّلها بيتزوج عليها ويقولون أن الريّال يرقد في الحوش لأنه معصّب ..مب مثل مهروووه كل سنةولد وفلستّنا ..لأننا مجبورين نوديّلها هدية وحتى هي ماتعطينا ويه لأن ريّلها نقيب في الشرطة وأبيضاني ووسيم مب مثلي.بس فالح يطالع المباريات ويزط ويرقد ..
وإذا كان شيبة يتكلم ويا شيبة ..ألو ألو أنت تسمعني ..أنا أسمعك ,, تسمعني زين ..متنا من الحر ..ألو ألو تسمعني ..أقول لك متنا من الحر هالسنة وايد حر ..ألو ألو ..(يقولون أن الموبايل إنتحر )
لازم الفاتورة بتكون بالآلاف ,,

[نبض انسان]

هههههه
الحريم معروفين بالقرقه الزائدة مايخلون شي مايرمسون عنه هههه
الحالم ما شاء الله عليك ماخليت شي ما كتبته خخخخخ

[حبيته]

اكثر بربرتي ع المسن خخخ

[Κλεοπάτρα]

الحالم وجهة نظر صائبه :sm122:

الكابتن صدق واايد يبربرون :aa_Popcorn:

بس ليش مانقول بعد اتصالات مبالغه بالاسعار :sm105:

مايستوي علينا كمن كلمه اللي نرمسها

[غروب 77]

ههههه الحالم ضحكني اسلوبك في الرد
شكرا عالمعلومات يالكابتن

[خيماويه 1]

اذا كل واحد امخزن فوق ال100 وال200رقم بفونه وبيموت اذا مارمس فوق العشرين واحد فاليوم ورمسات بطاليه مامنها فايده وين مابنصدر العالم في عدد الدقايق المهدوره ع الفاضي وبليا نفع ولامنفعه هههههههه


والله اعرف ناس يرمسون ماشي مواضيع بالمره مثلا يسأل الطرف الثاني بعد سكوت اكثر من 10 دقايق ((لاحظوا ايتم ع الخط عادي لو مايرمس 5 أو 10 دقايق مادري خقه عسب ايبين انه عنده رصيد زايد ولا خط ماعرف شو المغزا بالضبط)) ايقول له:


وبعد دقائق من الصمت المبهم .. فجأه
(( هي انزين ..... شو تشرب؟ أو شو تاكل؟)) فرضا لو خبرك بيعطيك تشرب أو تاكل وياه مثلا ولا كيف؟؟


ولا يسألك (( شو يالس اطالع الحين ... حد وياك ولا بروحك اطالع؟ )) انزين فرضا هالبني آدم يالس ويا أهله ولاحرمته وايلمحلك وايقول لك (( والله ويا الأهل يالس ولا أهليه عندي)) وهذاك ايرد (( هي .. يحيك والله .. حط حط القناه الفلانيه جوف شو حاطين)) ههههههه يابني آدم افهم والله حاله


ولا وانته مشغوووول من الخاطر ولامستعيل أو متأخر ع شي يتصل فيك حد ايسلم وايقولك ((مشغول؟؟)) اترد ((هي والله مستعيل شوي)) ومع هذا يسألك ((ليش شو عندك؟؟ وين بسير؟ )) هههههه الحين هالمخلوق ايقولك مستعيل يعني بكرامتك سكر وعقب ايحلها ألف حلال .. فضولك هذا ودره شوي افرض الريال حرمته ع ويه ربا ولا حد مريض عنده أو متأخر ع موعد مهم شو ايقولك حزتها؟؟

وهذا شيء من لاشيء ^^

يعني هذره هالفاضي وبطاليه ومضيعة وقت

[*مسك الإمارات*]

الله المستعان

[9amt el8alb]

هيه والله الصراحه نحن اشوي انبالغ في البربرة ....
الناس تستخدم التلفون حق الضرورة و بندوا بدون باي ولا شياته ....
نحن لا بارك الله فينا ...
اتصل في فلانه ...
نص ساعه سلم عليها ... و نص الساعه التانيه اسألها عن احوال العيال و عقبها ,,.... شو مسويه اذا ما رمستها من اسبوع عطتها تقرير شامل من اليوم اللي كلمتها لين يومج هااا اللي رمستهااا فيه ... و غير هااا هاتي علوووم فلانه و علانه .... و يالله منو يفجهن من علوم الناس .... و الله الحين دشن في صلب الموضوع سبب الاتصال ... لمده الله اعلم .... و غير هااا يت يالله بتبند .... ساعه هاي اتسلم على هاي و التانيه نفس الحاله ...
الصراحه الاتصالات تربح من ورى الحريم اكثر فئة اتخسر ... و تربح الاتصالات و راعي الدكان .... هاي بالنسبه للحريم ...
تعال للبنات . و بنات المدارس و الجامعات والتقنيات و الكليات و المعاهد .... اندوكم و سوالفهن ....

و لا اكثر فئة اقتصاديه .... الرياييل .. الو ها وينك انزين اقولك .................. و اوكي عيل ... و بند ... حد درى عن المالكمه ؟؟!!....
و لا تعال للمغازلجيه ... هذرة عالفاضي عالهبل وبالساعات ...
انت تكلم و اللي هناك يلا اربح ....
اهل الخليج الصراحه يسكتون ... بالبربرة توب نمبر... الرقم 1 و بمرتبة الشرف .....


و انا ما اخسر هالكثر فالشهر ... والله انا للامانه توصل عندي في اليوم الواحد اعبي ثلاث بطاقات رصيد لاني لو خليتها نظام فاتوره شهريه فقرت اناااا و فقرت الريال وراي ....
يعني مصروفي كله راح .. عالبربرة ... بس اقول للضرورة و ربيعاتي اولى ...

بس اعاقب عمري ساعات و احرم عمري لو شفت عمري مزودتنها حبيتين ....
:aa_roma2:
خلف الله علينااا ...................


اشكرك عالموضوع اخوي الكابتن ......


تحياتي للجميع ............

[الكابتن]

شعار موظفي الاتصالات: "نعيش على بربرتكم"

[صمت_المشاعر]

شعار موظفي الاتصالات: "نعيش على بربرتكم"
هههههه:sm115:

تسلم خيوو الكابتن ع الموضوع

اللــه المستعان :sm88:

[خيماويه 1]

يالله بالستر صمت 3 بطايق رصيد باليوم الواحد؟؟؟


هههههه أكيد وراج بزنس أنتي ^^ أسولف


أنا بصراحه فالشهر اعبي مره وأم 25 درهم هب لأنه فقر ولا ماعندي لا الحمدلله الخير شال الدنيا ولكن لأني اشوف الموضوع مايستاهل وفيه تبذير واتصالات هب امقصر فالشفط ^.*

[9amt el8alb]

لا بزنس ولا شياته ضرورات الحياة و غير هااا اذا رمست وحده من ربيعاتي يالله لين ما انبند .....
شو انسوي عااااد ترى امي اتقول الاتصالات تربح من وراج ...
اقول مال حكومة راده للحكومه ....





يالله بالستر صمت 3 بطايق رصيد باليوم الواحد؟؟؟