سوالف ليلة العرس

سؤال لكل عزوبي يتسدح بهالقسم !
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم .. او تنام في الشوارع كأنك قطو .. او تنام على الكنب وانت تقرأ الجريده ،
او تنام ويطلع سرك ستر الله سرك .

إذا كانت الاجابة بنعم فإن كل هذه اعراض لرغبة جامحة وكامنة بالزواج وان ما تلاحقت عمرك راح يجي اليوم اللي يقول فيه الوالد لك :
" الله لا يبارك في الساعة اللي جبنا فيها شغالة " >>> اقصد سواق

عزيزي العزوبي : <<<

من يوم تقول الوالده خلاص بندور لك ، تصير ذاك الشاب الحبيب الرحيب السمح اللي بااااله طويل.. ما يتأفف إذا وصلهم مشوار ، و يوصلهم للزواجات بكل رحابة صدر .. ويسألهم اول ما يركبون طالعين من العرس ومنتهية لياقتهم .. هاه بشروا ؟؟
عسى لقيتوا نصفي الثاني >>> تكفى يا وائل كفورى ..

قبل ان تتخذ قرار الزواج .. رح صلح شاهي وجب لك مركى وتعال اسمع وش باقول لك . لأن الموضوع طوووويل وانصح اللي فاتورتهم عالية يقطع الخط ويقرأ .



اولاً : مرحلة ما قبل الزواج :




كيف تعرف انك استويت عزيزي الشاب وحان قطافك من بنت الحلال :
علامات الرغبة في الزواج عند الشاب :

1 - إذا بديت تحب الاغاني وتسمعها بمخمخه وتتخيل انك تقول الكلام لوحده ..
فاعرف انك ( قاضي ) فتلاحق عمرك وشف لك بنت حلال ، بشرط توافر الشروط الاخرى فيك ( وظيفه مناسبة ، ومبالغ مالية لمواجهة مصاريف العرس )
كذلك إذا صرت تتابع الفيديو كليب وتفتح فمك ولو يناديك ابوك ما ترد عليه .

2 – إذا بديت تمشى بالسوق وتتمنى ان البنت اللي قدامك يطيح اللي هي شايلته علشان تصدم فيها وتقول ( ليمون نعناعه )
فاعرف انك على مشارف انك تكون ( لحسه ) وشهار ما يقبلك ولا منتسب
3_إذا بديت تطلب من صديقك تلفون الباندا وتقول ( هاه فيه شيء جديد )؟ << رسائل نصيّه . ههههه بلوتوث ...
فاعرف ان نظرك بدأ يضعف وتبي تثبت لنا انك تشوف بشاشة صغيرة فتلاحق عمرك لا تصير المدام تقودك بالاسواق
4– إذا بديت تعطّر بعطور نسائيه وتقول ما فيها شيء ( العطورات ليست حكرا على احد ) ..
فاعرف انك بديت ( تخق ) لذلك اكرب عمرك واعرس .


عزيزي00

اذا ظهر عندك الاعراض اعلاه كلها او بعضها فاخطب وخلص امورك ..

ثانيا : اثناء الخطبة


هناك بعض التكتيكات التي تساعدك على الظهور بمظهر جيد في عيون مدام المستقبل وعيون اهلها :

1 – انضبط وابدأ صل بالمسجد . واجعل المحافظة على الصلاة تحول دائم من الخطبة إلى آخر عمرك .
لان اهل البنت يبي يسألون شيبان المسجد ويقولون تعرفون فلان ..
لذلك صل وابد ( طلطل ) بوجيه المصلين كأنك تدور اخوانك . <<<< ما احب هالحركه .

2 – لا تتهيبل وتروح تتسلف سيارة زميلك ( الفخمة ) وترزها عند باب اللي انت خاطب منهم ، وتتكلف باللبس بحيث تظهر كأنك طايح من الجدار ومجبّص كلك.. صاير شاقص ومشصّب وما تلتفت إلا كلك كانك ضبعه في Discovery channal لأن الخطيبة مصيرها تعرف ان السياره مو سيارتك وبالتالي تطيح من عينها .. يا اخي إن رضت فيك كما انت وإلا بكيفها .. تلقى نصيبك وتلقى هي نصيبها ..
وخل عنك فلم احمد زكي ( أنا لا اكذب ولكني اتجمّل ) <<< تراه ودى ناس كثير بداهيه .

3 - اثناء الشوفه لا تستحي ابدا و قز البنت من راسها لرجليها ولا يهمك ابوها واخوانها لأن الشرع ( يدعمك ) وان قالوا شيء .. قل لهم حديث الرسول صلى الله عليه وسلم " فلينظر اليها وتنظر اليه فأنه احرى ان يؤدم بينهما " مع ان الشوفه ما هي إلا مؤشر للراحة النفسية إلا انها ( لا تعكس) الصورة الحقيقية لشخصية الفتاة . لأن البنت غالبا في الشوفه ما تتكلم وحتى لو تكلمت فهي تتكلم بتكلف .
وإذا حسيت شيء بقلبك لا تجامل وقل لهم ما الله كتب .

4- في الخطبة ان صار فيه مكالمات بعد ما يوافقون عليك .. فلا تصير لصقه وعلة و كل دقيقة داق على البنت .. ( وينكم فيه ) ؟ وش سويتوا اليوم ؟ ما اشتقتي لي ؟ وش تسوين ؟
انت على السرير وإلا في المقلط ؟ << يخرب بيت السؤال ؟؟؟
ليش تلفونك مشغول ؟ من كنت تكلمين ؟ لانك بعد فترة وجيزة بتطيح من عين البنت وانت تميلح . ويمكن تحسف انها وافقت عليك ، وتفسخ الخطبة .

ثالثا : ليلة الزواج :

ليلة العمر والليلة الوحيدة اللي تحس فيها انك اهم واحد بالاحتفال .. فلا تصدق عمرك ويكبر راسك..

1 ــ خلك طبيعي ولا تكثر من شرب الشاي والقهوة ليلة العرس بعدين تنتفخ مثانتك ، فتتورط ، لانه صعب إذا رحت جلست مع العروس على ( الكوشه ) .. فجأه تقوم تقول بعد اذنك باروح الحمام .. صدقني
راح تقول البنت إللي هذا اوله ينعاف تاليه
.. فلنفرض انك قمت من الكوشه ؟؟
بعد ما تخلص هل بترجع وتجلس مع العروس مره ثانية ؟؟
وإلا بتطلع من هناك ؟ بالعربي .. انت بتبلش بلشة ما بعدها بلشة
أما إذا رجعت بيقولون الحريم ( جاه اسهال من الخوف من المدام ) اجل إذا راحوا الشقة بلحالهم وش بيسوي هالخواف؟؟؟ فتصير علك في فم الرايح والجاي وملطشه للصغير والكبير .

2 – ليلة العرس ارفق على سيارة الرجال اللي انت متسلفها منه .. لانك ممكن تصدم لانك ما تعودت انك تكون بسياره كشخه وجنبك بنت ..<<<<<<< وش دراك؟

3 - خلك ذوق واسحب يد البنت وحطها على :اذا السياره عادي حطها على القير حق السيارة واذا السيارة توماتيك على المركى اللي بينكم وحط يدك فوقها ولا تكثر تفغيص يدها لانك بتتهور وممكن يصير لك شيء وإلا يجيك ( شد عضلي ) بعدين تصدم باشاره >>> لاحقين خير ان شاء الله .. لا تتصربع الله يسلمك ..
واذا حطت يدها عليك لا تخاف .. ثم تقول لها فكي وافك ..

رابعا ً : سواليف ليلة العرس :


1 – انتبه تتميلح او تنكت اكثر من اللزوم لان الموضوع سينقلب ضدك وبدال ما تصير وش زينك تصير( كخا ) .

2 – انتبه تجيب طارئ ( أمك ) ليلة العرس ، وتقعد تقول لبنت الناس من اول ليلة ( انا بصراحه امي أغلى امرأة عندي بالعالم ).. انا امي بصراحه ابيك تشيلينها فوق راسك ، انا امي بصراحه ما ابي احد يزعلها ، انا امي بصراحه مالها غيري ..
الله ياخذ بليسك انت وامك .. نكمل ..
مافيه شك ان الام قدرها غالي ومكانتها عظيمة بس لكل مقام مقال .. فما فيه مناسبة انك تجيب طارئ امك ، ممكن تأجل الموضوع لليلة اخرى .

3 – امدح حلاوتها مو مكياجها يعني سوي نفسك انك مصدق انه جمال طبيعي المدام ، وفستان فرحها لانها تعبت شهور حتى تظهر بهذا المظهر اللي انت تتمتع فيه انت وعيونك المغمصة ..
حتى لو كنت ( كمخه ) في مواضيع الذوق واللبس ولا تفهم فيها شيء امدح وخلك عباراتك فيها صدق بحيث تكون ( الكذاب الصادق ) ..
فهذا من شأنه انه يحسس المدام انها جميله بعينك ، ويرفع روحها المعنوية ، ويخليها تهضمك يا ابو كوع ( بني ) <<< مفروك لين قال بس فتغير من اسود الى بني .

4 – انبته ثم انتبه انك تصير عاطفي او تخق ومن اول ليلة تقول للبنت ( بصراحه انا احبك وميت فيك ) .. لانها مؤكد انها مو مصدقتك ( ما امدى بسم الله تحبها ) . خاصه اذا ما فيه ملكه .. اذا فيه ملكه خذ راحتك ..
بصراحه كثير من الشباب محروم من ( كل شيء ) <<< وافهموها .. عاطفيا و ...... .
واول ما نلمس يد تختلف عن يد صديقك ( الضب ) .. نخق وبسرعه نسعبل ونقول : آآآه الله لا يحرمني منك ، احبك احبك احبك .. ويمكن بعد اسبوع اكرهك اكرهك اكرهك >>> يااااي .
خلك ثقل وخلي سلوكك هو اللي يقول للبنت اني احبك مو اساليب ( قردنه )
احبك بعدين تقول لها ( وش رايك نلعب عريس وعروسه ) ؟ ترى هالحركات ما تمشي على البنات الحين .
معاني الكلمات : قردنه : محاولة اقناع جاده يتخللها وضع اليد على الكتف مع تــنــزيل الرأس وكأنك بتقول سر للطرف الآخر مع الاتجاه ( لقرنة )
الغرفه .




خامسا : ملابس ليلة العرس :




1 - بعد ما تفسخ ثوبك وشماغك وعقالك .. تروش الله يصلحك لانه ممكن ريحتك تكون طالعه وانت ما تدري من كثر السلام والقلق اللي عشته في قصر الافراح ولا يهمك انك راش لك كم ( بخه ) على الشعيرات اللي بصدرك .
بعد الانتهاء انتبه تلبس ملابس تظهر مفاتنك .. مثلا تجي بلبس داخلي وفانيلة علاقي وتصير كأنك من ذولاك المصاريه اللي اسود وابيض ويتطببون على المسبح في النادي من جماعة ( هااااااي شله ) ..

2 - انتبه تصير قروي وتلبس سروال ابو حبل ذاك اللي يخليك كأنك بقره رايحين يبيعونها ، او بيجامة نوم مخططه فتصير كأنك ( **** وحش ) يتكلم عربي .
اختر اللبس المناسب لجسمك ..
مثلا شورتات رياضية اذا كان جسمك رياضي .. وإلا اذا كنت دب فخلك بالعقال والشماغ والثوب استر لك وغير ملابسك إذا نامت المدام ..
وفاجأها في الصباحية .
إذا كنت سمين البس ملابس فضفاضة شورت وفانيلة
X X X L <<<< انتبه ترى ما اقصد القناة . ههههه

3 – للإحاطة فإن قمصان النوم النسائية ( مشققه ) وشفافه وكلها حركات .. انتبه يسول لك ابليس وتقول ( اففف البنت خربانه ) .. من هالحين لبست كذا؟؟
ترى الموضة كذاااااا ..
إذا لبست لك المدام ( قميص نوم راايق ) ترى مو معناهاااا ( طب عليّ )
.. خلك ثقيل ..



سادساً : الخطة المحبوكة للقاء الحميمي




1 - حذاري ثم حذاري وهذاني اقول لك ( حذاري ) .. تتحرش بالبنت جنسيا حتى لو كانت زوجتك .. فكما يقال ( احذر ان تبدأ حياتك الزوجيه بحادث اغتصاب ).
لان البنت مو معنى انها صارت زوجتك وكتبت هالوريقه يعني انها فصخت الحياء وتبيها تصير لعبة بين ايديك .

2 - اجعل بداية حياتك الزوجيه قصة رومانسية متعددة الفصول .. ليلة الزواج تكون بمثابة لقاء بين اثنين للتعارف ما فيه إلا الحديث وإذا كثرت امسك يدها ولا تتعدى لاشياء اخرى ..

3 - اليوم الثاني انتبه تستقبل أية زيارات من الاهل .. او من اهلها .. واعزمها في مطعم راقِ ولا تجلس تجرجر بالبارتشنز وتقعد تناظر فيه فتحه صغيره مع هالجهه او مع ذيك .. وتسدد فيها وتصير كأنك مهندس ( صنادق حمام ) .
اركد وخلك طبيعي وإلا قالت البنت وش ( هالعومه ) .

4 - في ليلة اليوم التالي غالبا يكون فيه عشاء عند اهل الولد تعشوا واطلعوا ورح انت وياهااا ( كوفي شوب ) وانتبه تقرأ الجرايد او المجلات , وعطها وقتك كله. <<< يعني الثقافة مقطعه بعضها ..

5 – اليوم الثالث : حاول تسافر بها عمره بعدين لمدينة جده لسكان المملكة العربية السعودية .. او مدينة اخرى لسكان الخليج .. او
( لقريح وابو زنه لباقي الدول ) . وياليت تطير برى احسن ..

6 – انتبه تسافر بالمدام شهر عسل خلها اسبوعين بس .. لا يلعبون عليك .. شهر العسل كامل برأيي يؤجل إلى ان يتم دراسة المرأة هل هي تكانه وإلا( برتكانه ) >>> يعني برتقاله ..
بعدين ممكن تصير مواقف بالسفر ما تلقون لها حل .. او سوء فهم فما يترقع بعد ما ترجعون .
شهر العسل اصلا بيكون كله مجاملات ولا تهمك الافلام الهندية تقعد تحسب انك تبي
( تدربي ) من فوق جبل وتمطر عليك انت وياها وانتم ترقصون.
ترى كله ( كوذاااااب × كوذااااب ) افهمها ..
وابدا بالمدام بالدول القريبة ثم ابعد فابعد إلى ان توديها إلى ( هاواي ).



سابعا : خزعبلات ليلة العرس




1 – الطحينية تقوي الجنس .. انتبه تأكلها لانها بتشب وتحمي ( كبدك )
وبتجلس تصبب من العرق عند المدام من السعرات الحراريه .

2 – اشرح لزوجتك كل اللي تحبه واللي ما تحبه ليلة العرس وفهمها كل شيء وعلمها الاصول ..
يا اخي لو انها موظف عندك ( كان ) استحيت اول يوم تقوله شيء .. فاول يوم يمكن تاخذه بجوله على اقسام الشركة .
فما بالك بالمدام لا تقعد توريها ( نجوم الظهر ) بانصاف الليالي .

3 – انسب يوم للقاء الحميمي هو اول ليلة .. انتبه تتوهق بس وخلك رجال واعقل لا يلعبون عليك وتصير صعيدي .

4 - الزواج ( شر لا بد ) منه >>>> لا يلعبون عليك .. تراه زين وبادي يصير ازين وازين هالسنين التاليه




عزيزي الشاب اتمنى ان تكون استفدت من التلميحات السابقة ..

ان بغيت تستفيد من شيء منها وإلا اضرب بها عرض الحائط وما جاك عندي 0__________________