شو نهايه الشبااب في (الديون) .. .

سلامات باقي.


في البدايه وهذا اول موضوع لي في شارع الرمس وطبعا وان شاء الرحمن يكون موضوع سلس للجميع وعشاان مواضيعي شوي جااده .


الموضوع كما في عنوانه ، يبحث عن قضيه العصر الحديث ، قضيه كل من له ذات صله .


الموضوع يتكلم بذاته عن حقيقه وواقع ومآسي الصرااحه ،و اصبح عاادي لدى البعض مثل اكله يوم يكون جوعان .

قضايا ولابد من وضع البصمات والتقارير عن النااس اللي (مب قادره)ويادوووب انهم حصلو او مشو اعمارهم .

ضيه (الديون) او بالمعنى (المديونين )ماعنده غير راتبه بس ..

خقه ، فرفشه ، خنبقه ، وكل مايقال ..

اتدين واتزين .. مثل صرريح وواضح استوى للك ويقال (عادي ياراييل) روح البنك اذا ماحصلت حد يسلفك .


نخش في الموضوع مثل مايقولون اخوانا (المصريين) ..


العمر اقل من 25 ، وظيفه ، راتب ، سلفه ، سياره او سلفه او او او ..

طبعا الموضوع مش مقتصر على الشباااب وانما العدد الاكبر من نصيب البناات الصرااحه ..

يسحب له 250 الف درهم عشاان سياره . ويدفع من راتبه اكثر من 75 % عشاان شو .. عشان سياره .

وحتى البنت مثلا نفس الشي تروح البنك واسحب الفلوس والى اقرب وكاله وشيل ..


وحتى في نااس تجدد سلفتها عشاان سفر او اغراااض ماتسوى.


....


انا مستغرب الصرااحه ، الواحد منا يحصل وظيفه بعد تعب ويروح بعد الوظيفه يسحب له (دين)عشان يستوي زين ـ اقصد يشتري سياره بربع مليون درهم .

يدفع 5 الى 10 او 15 سنه ديون في ديون ، ويروح يجدد وياخذ (همجه) ويصلح موتره ويركب زوايد ويعدل ويسوي .

..

يعني الوااحد بدل مايروح يداوم عشان (ايولف) او (يجمع ) للمستقبل البعيد ، ربعنا يداومون عشان يدفعون اقسااط سياييرهم ..هههههه

موضوع يضحك صرااحه ،


- اعرف واحد قبل مايعرس كان عليه 80 الف درهم .. وراح حدد عشان ياخذ (دراجه) ب 6 الاف درهم . راحت الفوايد مع اللي قبل استوت 100 الف .

لما راح يجدد يبغي 100 الف البنك قاله على الرحب والسعه عشان يعرس ، ادوبلت الفوايد ووصلت 250 الف درهم.

وراح بعد خذ سياره مال 30 الف درهم وزادت الفوائد ووصلت 300 الف درهم .

راتبه 18 الف درهم. يقصون عنه 8 الاف درهم لمده 22 سنه .وعنده مصرف بيت وعيال وعنده ايجار ، ويصيح المالحه احين ماعندي فلوس.

راتبه 18 الف معقوله مايكفي.

يكفي وزياده لكن دخل نفس في قفص مايقدر يطلع منه خلااص .

..


الواحد يعيش بعد الديون صرااحه فيهم ودوم يقوم الصبح يصير الدوام يلعن نفسه ويلعن هالبنك والسياره والحرمه .. عشاان شو عشان ديون يابها حق نفسه ..

اعتقد ان الواحد منا هو الغلطاان مش الديون لما يرتب نفسه مابيكون في مثل هالحالات الكئيبه وتوصل لحد الانتحاار والسجن والادماان والضرب .. يخلي بيته في نكد يضارب الصغير والكبير عشاان عايش والديون في راسه يفكر متى بتخلص ويحسب وهي ماتخلص .


طولت عليكم جمااعه ، ولانا شكلي ملسووون وارمس واايد مب مني ترا من اللي اشووفه في حياه الشبااب والبناات ..

ياما بيوت ضاعت عشان ريال دخل السجن وعياله اتلتهوو .. ياما حريم دشو السجن خربو على رياايلهم .

ياما ريااييل اتخبلو من كثر مايرمسون مع انفسهم والسبه هالديون .


الديون تخلي الواحد يطارد نفسه مثل المجنون .

اللي الله عاطنه غير . واللي ماعنده اساسا غير.


والواحد مايحلل شي دام انه حرام ، ولايتعود على كلمه (عادي) ترا فيها مالايطيق الواحد من عباده .

هالله هالله ولاتخلون هالشي يفرق في كل شي .


اللي عنده مشكله نفسيه يجب انه يتحرى عن الديون .. الي عنده مشكله في بيته لازم يشف هل كان ماخذ ديون .

بدايه شباابيه تستوي نهايه مأساوية

في النهايه وصلنا بيت القصيد . والموضووع متروك لكم للتعليق او للمزيد .


(من كتاباتي)
سلامات ملام .او كما تقال تصبحون على خير .

السلام عليكم ورحمة الله وبركاته
الله يعين المديونين ويهديهم عشان مره ثانيه ما ياخذون سلفيه
وهذي المشكله منتشره واااااايد في الامارات
ولا القهر يدينون عسب اشياء تاافهه
ومشكوووور على الموضوع
وتسلم

ههههههههههه يبتها على الجرح ............. الله يخلي شباب راس الخيمه هههه توه مداوم في الجيش وسار خذاله رنج والا اكس 6 والا مرسيدس ههههههههههه ................ انا ابا الشباب يطبقون هالجمله عليهم " " مد ريولك على قد لحافك " " يعني بالمختصر المفيد ماعندك بيزات ومب ولد تجار لا تخقق على الفاضي ومناك اريال ماعندك تصب بترول ههههههه واذا انته ولد ناس وولد عز سير خذلك وكالة مرسيدس بكبرها محد بيقولك شي ........... والسموحه

السلام عليكم
الصراحة هالايام ما في حد ما عليه ديون في البنك او شركات التمويل،،،،،
ان كان للسيارة او البيت يمكن تقول شو اهون لكن اذا كان للسفر والخقة الله يعين ،،،
المصيبة ياجماعة في البنوك الربوية (((ولا تقولون ان البنوك كلها نفس الشي انتة بري ذمتك )))
بعدين ترى اللي يلعوز الشباب مب القرض لان القرض ما ياخذ الراتب كامل اللي يغربلهم بطاقات الائتمان (الفيزا) تحصل الواحد على القرض اللي علية راز لة اكثر عن بطاقة ائتمان في المحفظة وكل وبطاقة علي قسط اخر الشهر فلهذا السبب في حال ما قدر يسدد تتراكم علية الفوائد والديون ويبدأ مشوار البلاغات والتعاميم
اللهم فرج هم المهمومين من المسلمين، ونفس كرب المكروبين، واقض الدين على المدينين، واشف مرضانا ومرضى المسلمين، برحمتك يا أرحم الراحمين

تسلم أخوي ع الطرح ...
الشباب مايفكرون في مستقبلهم أنا أعرف ناس ( لاحرمة .. ولا عيال .. ولا اي مسئولية يعني عزابية .. ديونهم مليون ..)
والراتب 22 ألف و اخر الشعر امي عطيني ماعندني حق البترول بسير أبوظبي .. ماعندي مصروووف ...)
واعرف ناس بنفس الراتب بيت إيجار 30 ألف وحرمه وطفلين وخدامه ويبني بعد بيت ( ولا أي دين في البنك .. مسوي جمعياااات ومرتب أموره .. الإنسان الي يفكر غير والي يفكر في كشخته وسفره ولعبه غير ...
والسمــــــــــــــــــــــــــــــــــــــوحه.. خويتك
بنوته كيوت

ثااااااانكس ع الموضوووع الحللو

اولا احمد الله انه ماعليه لامديونيات ولا سلفيات وهذي نعمه ولله الحمد حمدا كثيرا طيبا

انا ضد الديون واستغرب من اللي يتدين لاسباب تافهه مثل سياره اخر موديل اما بالنسبه للي

متدين عسب بيت لاهله او شي من هالقبيل ومجبور يتدين فهذا ممكن نعذره شوي

انا دايما يوم اسمع عن شاب اتسلف يتردد في بالي سؤال :

هل ضامن انه بيعيش طول العمر؟

الانسان طول ماهوه مديون مابيرتاح لا في دنياه و لا في قبره

هذا رايي واحترامي للجميع

منصور الفلاسي

الله يكون ف عون المديونين

والله يهدي الجميع

الله يكون ف عون المديونين

والله يهدي الشباب والبنات :)