الحادث اللي بالحلبه اليوم * *

السلام عليكم .. وعيدكم مبارك ومن العايدين والغانمين

ياجماعه توني ياي من صوب عوافي وأكيد كل اللي كان موجود هناك شاف الحادث الأليم اللي صار لواحد من الأسيوين كان يبيع في الحلبه .. ومثل ماكان متوقع عاجلا ام أجلا .. والسيناريو معروف بالتفصيل الممل .. صاحبنا يخمس ومركب مب جناح إلا كرين وراه وشالنه طرب الحماس وتقارب حذال الجمهور حق التصوير ولكشلك البنقالي اللي يبيع حب وسانتوب اللي يحوص فالحلبه وفره ويا كرتون بياعته وعقه تحت الكرنك وتركه يرافس ويتجلود من العوار والكسور .. وكما جرت العاده تعالو ياشرطة المرور ولو أنه ييتهم مامنها فايده .. لأنه شو بيسون الموقف محتاج سيارة اسعاف .. وماأطولك ياليـــــــــــــل لين تقرب سيارة الأسعاف وتعال شوف السياره اللي مطرشه الظاهر انها سنقل مب فورويل والله العالم انها غرزت في الرمل مادري انشبت في سيم وردت تبقي تدخل الحلبه والخلق موقفين سيايرهم مصكرين أم البيبان .. ياريال الموقف كان ياكل نمك .. يعني تتفرج وودك تسوي شي لكن والله تحس انك مقيد .. فعلا محد قادر يشله الخوف كسر بالعمود وبتتنقله وبيزيد .. تخليه يغمضك وهوه يلابط .. ياخي والله اسرقو عنا فرحة العيد وتصكرت الحلبه والخلق تضرب كتوف وتروح .. واللي ياي من بوظبي ومن عمان ومن الدوحه للفرجه .. لكن غلطة الشاطر بألف .. هل الغلط من المرور اللي المفروض يمنعون هالمصبنه يتناقزون داخل جنهم سبلان ولا الغلط من الشباب المفروض مايستعرضون وال ... داخل الحلبه .. ياريال راسي عورني من هاللي شفته .

لاحول ولاقوة الا بالله

الله يشافيه ويعافيه

اخوي الحلبه مخصصه حق هالشي

وطبعا الغلط يكون من الجهات المنظمه اللي تسمح للشباب دخول الحلبه بدون موتر

او حتى دخول اكثر عن سياره

تخيل مره كنت هناك وانا اتفرج عديتهم 10 حوادث سيارات داخل الحلبه

اغلبها خفيفه بس ولو المفروض سياره وحده تستعرض بس

نتمنى يكونون اكثر حرص

وعندي صور من فوووووق تل عوافي اعلى واحد اللي جدام الحلبه

لأنقلاب لاند كروزر

وبييب لكم الصور ان شاء الله

مشكور اخوي .. ربي يحفظك

شيخي الغلط الأول من الجمهور لنهم ما شاء الله يالسين بالحلبه
يعني مسواي لكم تواير يلسوا عليها للسيفتي او وراها

انا كنت هناك وصورت فيديو وبنزله ان شاءا لله وبراويك كيف انه الجمهور واقفين بالحلبه

يعني هي مخصصه للإستعراض انتوا خلكم فوق التواير ... الله يهديكم بس
والعامل الآسيوي وحليله غمضني والله وكسر خاطري ...

والغلط الثاني من راعي الموتر الله يهداه قرب من الجمهور وعطاه فل سليتر ... ياريال دامك ما تقدر تقبض الموتر ليش ادوس ...

الله يهديهم ...

لاحول ولا قوة الا بالله العلي العظيم
الحمد لله اني ماسرت عوافي
ولا احب ادخلها بالزحمه والمناسبات والاعياد
لانها فوضه الصراحة
وغابه بدون قوانين
صحراء جافه بدون قوانين
فوضه بكل مكان
لااحترام ولاحشيمه
نفوس الناس هناك وطبعا مب الكل دنيه
وطبعا الكل يعرف ان اغلب الشباب اللي هناك يتواجدون
لافن ولا ذوق ولا اخلاق بسواقتهم
وخصوصا اصحاب الدراجات الرمليه(البانشي) شو يسوون بالعوائل وسيارات البنات
اللهم لاتبلينا بهاناس
اعوذ بالله من شر نفوسهم

يحليله مسكين