لا تشتكي الضيقه ولا الهم يا زين

لا تشتكي الضيقه ولا الهم يا زين
فأشكي لك من هموم وقتي وضيقه
ولا ترسل الدمعه على محجر العين
دمعك ترى ماهو بسهل(ن) تريقه
زود(ن) على ان دموعكم حيل غالين
في داخلي يا زين تشعل حريقه
صحيح شكوى الحب بين المحبين
ولا به صديق(ن) ما يشاكي صديقه
لكن ترى لو كان بالصدق دارين
أحيان ما ودك تقول الحقيقه
من شأن لا يسمعك واحد من اثنين
عذال والا حاسد(ن) نشف ريقه
وليا عذلوك اللي من الحب سالين
درب العذولي لا تتبع طريقه
صحيح لو يدرون في لوعة البين
ما كملوا بعذالهم لو دقيقه
وصحيح راع الحب مفضوح ويبين
لو يدفنه بأقصى الخفايا العميقه
ترى الاحاسيس اشتباك(ن) بلا ايدين
بين المشاعر والقلوب الرقيقه
شفني انا فاهمك لو قلت حرفين
ولو ما حكيت افهمك بد الخلقيه
تبقى وحنا لك على العهد باقين
وأصدق رفيق.. اللي ما ينسى رفيقه

[marq]

الاميره الحسناء

[/marq]