ياصاحبي من عقبكم وش جرالي

ياصاحبي من عقبكم وش جرالي = متكدرن ماني على البعد مسرور
مثل الخلوج احن واهجل هجالي = واجاوب الورقا مع طلعة النور
كني بهالدنيا وحيدن الحالي = والا يتيمن خاطره دوم مكسور
ارتاح يوم اني اشوفك اقبالي = ينباح لك سدن عن الناس مستور
ولعتني واشغلت فكري وبالي = وحرمتني من كل الافراح مشكور
يازين ياحلو الشباب المثالي = انا استضنيتك وانا منك مخطور
ياملح ربي بالبها والجمالي = مدري بشر والا منزل من الحور
بأوصفك مع امهات الغزالي = ريميتن مرباعها قفر وزهور
كانك تغلى فانت بالحيل غالي = يادرتن تسوى ملايين وكرور
ارجوك لاتقطع بنا الاتصالي = والكبر لله واكبر الخلق مكبور

الشاعر
سليمان الهويدي


تحياااتــي الاميرهـ الحسناء