الشعور المبحر

أشياء من الماضي



ليل الوَصِلْ يَعْله طويلي

ما شَي فَجِرْ بين الليالي

آداوي قْلَيْبٍ عليلي

مِنْ زِيْن غَرْشوبٍ غزالي



*************************



قبْلِك تعيش بْداخلي إنسانه
واليوم.. عاش الحبّ فيها أكْثَر

يمكِنْ مَعِكْ صارت كذا حَنّانه

تحب.. تِتْدَلَّعْ.. تجي تتمخطر

عشان قلبك يحتْفِل بِجْنانه

يكبَرْ غلاها في عيونك أكْبَر

تضحك على شانك وهي حزنانه!

تنوّم الصاحين دَمْع.. وْتِسْهَر

تسهَرْ يسامرْها القمَر.. وَلْهانه

تسْرِق ضياها من حلاة المنظر

تكره وجيه تْشوفها خَوّانه

يحبّها احساس الوفي المتنوّر

دُرّه وصارت في عيونك دانه

دانه ويغريها الشعور المِبْحِر

لو ياسمينك ما فَهَم ريحانه

مَرّ الشذى.. رَشّ العِطِرْ وِتْبخّر!

حِطّ القدَمْ بالعِشْب يا بستانه

الدرب غَارِقْ في الورود تْصوّر

الليل في دربك عزفت ألحانه

كِلّه على شان الصباح الأطهر؟

لا شِفْت قلبك اسأله بْإمكانه؟

يبني معاك الحلْم أكْبَرْ واكْبَرْ

للصِّدْق خانه.. وللأماني خانه

تعال إجمعهم.. تفضَّل تقدر؟!

عشان تحيا في عيون إنسانه

عاشت تحبّك.. وِبْتِحِبّك أكْثَرْ!!





شعر: خلود البراري