قصيدة ملح الخليج - خالد المريخي
قصيدة ملح الخليج
خالد المريخي
جيتك يا ملح الخليج و مصدر الطيبه
قلبي تركني و جبت الشوق بيديني
أثره مشى لك بلهفه قبل لأمشي به
و من كثر نبضه سبق خطوات رجليني
جيت أحضن ترابك الطاهر و أغني به
جيتك يا بحرينهم مدري يا بحريني
من كثر مالك بقلبي منزل و هيبه
شافتك عيني و لا صدّقت أنا عيني
و صار الحكي صعب مدري صعب تركيبه
مدري عجزت أظهره من كثر ما فيني
من يوم أنا صغير و انتي منّي قريبه
كل شي عنّك أعرفه لو ما تعرفيني
و به شي ما تعرفينه بس أنا أدري به
و بقول ذا الشي لكن بينك و بيني
الحب ويّا الوفا و الصدق و الطيبه
هالأربعه ذولا فيهم عرق بحريني
