بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته هذي قصة وحدة عاشت معنا سنين بس ما عرفنا قدرها ولا رحمنا شيبتها انها جدتي كنت اشوفها تمشي في الحوش مثل الغيم يوم يمشي حلوه مشيتها وحلوه سالفتها كانت تطلع من حجرتها وتسير شوي شوي والوقايه (( الشيلة الطويله البيضاء تلبسها الحريم الكبار )) تسحب وراها وفي اخرها رابطه مفتاح حجرتها وهي تسير لين توصل عند اللوزه العوده تيلس وترتاح وتحط سجادتها الحصير وعليها دلتها وفناجيلها وكانت تشرب الشاي وانا احط راسي على ريولها واسترخي في النوم وكالعادة تيلس تفلي راسي وانا مبسوط وبعدها ابدا اسمع الخروفه عن ام السعف والليف ولا عن الحرمه وبناتها السبع ولا عن الهلالي لين قبل المغرب تقوم وتعاود لحجرتها وما تطلع الا عند العشا نتيمع حواليها نسمع قصصها والغازها كانت تقول شو اللي يمشي ويسحب ومصيره وراه ونتم نفكر لين نجواب وكانت تعطينا حلاوة جائزه
اذكر مرة امي عصبت علي وبغت تضربني ولحقتني بعصا وما حصلت الا حضنها يحميني
كانت مجموعة احاسيس حلوة بينا كانت نفحة عطر جميلة عايشه بينا
يوم تصلى كنا ندور جدامها وهي تصلى وكانت تصفق بيدها وتقول سبحان الله وحنا ما ندري شو تقصد او شو تبغي ضحكتها مثل نسايم الربيع حلوة وجهها مثل صفحة السما يوم تغطيها السحب البيضا وبدرها طالع
حبينها لطيبتها 00 لحنيتها 00 لكل شيء حلو فيها
والله يرحمك يا شوقي يوم قال لى جدة تراف بي افضل عندي من ابي
واليوم يوم امر على قبرها اشم ريحة العطر من قبرها تفوح ريحة كل شي حلو عرفناه في الدنيا الله يرحمها ويجعل الجنة مثواها
