البارحه ما بين نص الليل والثلث الاخير ...

البارحه مابين نص الليل والثلث الاخير
وانا اقول اما بها ولا بقطع ارقابها

احيان ابسط فكرتي واتسيرلي امرٍ يسير
واحيان العن فكره التفكير واللي جابها

واشلون في بالي تسير أشياء لايمكن تسير
بديت اخاف النكبه اللي ماحسبت احسابها

اللي اشوفه غير والمضمون في الموضوع غير
وان قلت احب الحاجه الصعبه كرهت اسبابها

اغير في حرب القصايد غير ماودي اغير
اصد من حربٍ فوايدها بحجم اتعابها

الين شفت ان الكلام ايموت في صدري حسير
استغفرالله توبهٍ تجني على من تابها

واعلنت حربٍ قاعدتها لاجريح ولا كسير
فارس خيالي حاصر القلعه وفك ابوابها

علمته اشلون العمود ايحط من فوق الحصير
وأكد لي انه يبني الخيمه بدون اطنابها

وادركت انه مايبي في خاطري همٍ اسير
خل الحروف اتعيش لحظه من زمن كتابها

تعبت ياجورالزمن والموت تحديد المصير
ليش الليالي ماتقدر غيبه اللي غابها

الدرب قدامي طويل وماخذ المشوار سير
والعمر مثل الدلّه اللي واقف ٍ صبابها

درست بظروف الحياه اللي رحاها يستدير
وعرفت ليش المدرسه تقسى على طلابها

غديت بين الصبر والفرصه وتأنيب الضمير
والحظ مثل الخنجر اللي ماقبضت انصابها

الوقت قاسي والتمني آخر آمال الفقير
كيف اتبسم والليالي كشرت بنيابها

مع خالص تحياتي لكم ..

الأميرة الحسناء,,