تحليل شخصية/ Bint-AlJasmi

السلام عليكمورحمة الله وبركاته..
أتمنى منج تحللين شخصيتي يمكن اقدر افهم شخصيتي اكثر واحل مشاكلي..
1_نبذه قصيره عن حياتهبشكل عام ؟
تربيت فبيئة عادية ,,علاقتي حلوه مع اهلي بس ساعات اعصب على أي شي ينرفزني واعق رمسه وعقب اندم على اللي سويته او قلته.. مادري اذا حياتي في الطفولة بتفديج في تحليل شخصيتي ولالا .. بس كنت اغار وايد خاصة اذا امي وابوي يعاملون اخواني واخواتي احسن عني وخاصة اختي الكبيره .. لدرجه اني كنت ادخل الغرفه واصيح .. ودايما كنت احس ان مايحبوني وان وجودي ما يهمهم .. بس احين قلت الغيره خاصة من توظفت .. يعني اذا صار شي ما افكر فيه بشكل كبير وانسى بسرعه وما تهمني معاملتهم لي اذا كانت احسن عن اخواني واخواتي .. اغار بس مب مثل ايام الطفولة ..
ترتيبي الثالثه بين اخواني واخواتي ,,شخصيتي مرحه غالبا بين صديقاتي وزميلاتي في العمل واحيانا متضايقة اوفكر وايد حتى اذا كان الموضوع ما يستاهل .. طيبه وماحب اجرح أي شخص واذا حسيت أني ضايقت شخص معين احاول اني استسمح واراضيه ..المشكله اللي فيني ان اذا شخص غلط عليه او قال رمسه وما عجبتني ماعرف ارد في نفس الوقت وهالشي يخليني افكر واكتئب ويخليني اتفادى هالشخص لايام وعقب انسى وارجع ولا جنه صاير شي لاني ارضى بسرعه .. وهالشي يسببلي ضغطنفسي واحس اني ما ارتاح واحاول اني اشكي لاي شخص قريب مني .. وحتى لو الشخص مب موثوق منه عادي اشكي له المهم اني اقول اللي في خاطري وارتاااااح.
2-حياته النظاميه من ناحية الترتيب وتنظيم الوقت والامور الشخصية ؟
مممم احب ارتب اموري ووقتي يعني مثلا كل يوم قبل ما انام ارتب اغراضي عسب يوم انش يكون كل شي جاهز ومرتب وماحب اتاخر عالدوام او حتى مواعيدي الثانيه.. عندي نوته مقسمتنها لمشروعي الصغير اللي بديت فيه .. و قسم للراتب احب اسجل في شو صرفت وكم بيصفا لي لاخر الشهر وهذا مش بخل بس عساس اعرف ارتب اموري لمدة شهر كامل ( والصراحه ما اطبق هالشي دوم خاصة اذا طلعت اتسوق ) والاقسام الثانيه اموري الخاصة.. احب ان يكون المكان اللي يالسه فيه نظيف ومرتب .. مثلا اذا كنت اشوف التلفزيون والمكان مش مرتب بالي ينشغل بالاشياء اللي حوالي.
اذا عندي اغراض ارتبها او امور اخلصها ماحب اعطي حد يخلصلي اياهم احب اخلص اموري بنفسي .. يمكن لان ما بيرتبولي بالطريقة اللي اباها
واذا بنأثث او بنغير في البيت افضل اني انا اللي اسير واختار .. وفيني طبع مب حلو ان اذا اختاروا شي انا ما اخترته اتضايق وايد وما اسكت الين ما ياخذون اللي انا اخترته وهالشي ياثر علي لاني اعصب بسرعه وما اسكت .. ونادرا ما اسكت واخلي الامور تصير مثل ما هم يبونه..
وبالنسبه لعلاقتي مع صديقاتي .. كل صديقة ابوح لها بسر معين وعلاقتي قويه معاهم وعددهم كثير ماشالله لاني على حسب كلام اللي حوالي اني اجتماعية واخذ عليهم بسرعه .. وهالشي يضايقني لاني دايما اقول ( ماببوح باللي في خاطري ) بس ماقدر امسك عمري ...
واذا نفسيتي تعبانه ارتاح اذا رحت تسوقت حتى لو اصرف راتبي كله ..

3- ماهي هواياتك ؟ وعلى ماذاتطرب وتسترخي ؟
قبل كنت احب اسمع اغاني وخاصة حزينة ( عبدالكريم عبد القادر وعبدالله الرويشد ) بس ودرت الاغاني من سنه.. حاولت اودر الاغاني من سنتين وخلال هالفتره كل ماارجع للاغاني احس تستوي مشاكل وما ارتاح نفسيا وهالشي اللي خلاني اتشجع واودر الاغاني .. بس اذا خواتي معاي في السياره وحطوا اغاني ما اقوللهم لا .. بس احاول اني مااسمع .. ما احاول اكون شديده من هالناحية..
و حاليا ما استرخي الا اذا سمعت القران وخاصة بصوت ماهر وهاني الرفاعي

4- هدفك فيالحياة ؟
اني احفظ القران .. بديت من شهرين والحمدالله.. واخذ الماستر .. احلم اني اكون في منصب عالي في وظفتي بس ما اتمنى يتحقق لاني ما اتجرأ اخذ مسؤولية شغل واكون مسؤوله على موظفين

5- هل لديكالثقة الكافيه بنفسك وبقدراتك ؟ ام انك لديك بعض من التردد في اختيار اموركالقرارية؟

يمكن بتعرفين هالشي من المثال اللي بقولج اياه
مثلا اذا لبست او خذت شي اكون واثقه ان هالشي حلو بس اتزيد الثقه اذا ربيعاتي مدحولي.
واذا بخطي أي خطوه استخير واسال وااايد خاصة صديقاتي القريبات مني ..
( يمكن لا حظتي اني اخذ راي صديقاتي اكثر من اهلي )
6- جريء / ام حيوي؟
جريئه في اشياء معينه بس تقدرين تقولين اني مب جريئه وايد .. يمكن الخوف والتردد مايخليني اكون جريئه
7- الهوايات ؟
احب الاعمال اليدويه والطبخ وهالاشياء تشغلني عن اللي الاشياء اللي تضايق بي..
8- كيف يراه من حوله؟
اذا تقصدين بخصوص اعمالي اليدوية الكل يمدح الحمدالله .. والطبخ وذوقي نفس الشي ..
واذا شخصيتي : خلوقة و حبوبة .. وفمواقف معينه تفكيري يكون اكبر عن عمري .. وفي مواقف ( من الناحيه العاطفيه ) يقولون لي تفكيرج تفكير يهال
9- الامر الذي يؤلمك اكثر في الحياة والذي يفرحك؟
اللي متعبني : النسيان .. انسى واااااااااااااااايد يعني اذا حد كلمني في موضوع وشي يشغل بالي او حتى لو مافي شي يشغلني .. تشوفيني انسى كل اللي قالولي عقب خمس دقايق .. وهالشي مؤثر علي في الشغل .. (: الله كريم
اللي يؤلمني : اذا حد جرح امي وابوي او اخواني واخواتي
واللي يفرحني : اذا شفت اهلي مستانسين
والصراحه اتمنى انا اللي اتاذى بس اهلي ما يتأذون وانا اللي اتضايق بس هم ما يتضايقون ..
ادري اني كتبت وااااايد بس حبيت اوضح اغلب الامور في حياتي

والسموحه حبيبتي

سأكون هنا قريبا عزيزتي

وانا في انتظارج حبيبتي

السلام عليكم ورحمة الله وبركاته




اختي الكريمة بنت الجسمي..



شخصيتك واضحة لي من أول 3 سطور كتبتيها هنا..


اختي الغاليه ..


شخصيتك شخصية طيبة للغاية ..


تحبين الاهتمام بمظهرك .. وتتوقين لسماع كلمات المدح والكلمات الجميلة من الغير

فهي تعطيك دفعة قوية بثقتك بنفسك ..


شخصية سمعية .. تتأثرين كثيرا بالسمع ..


فراحتك فيما تسمعينه .. وتركيزك ايضا في ما تسمعينه اكثر ..



تدققيين على الأرقام وتحبين الكلام مرتب ومخطط بأرقام


1 / 2/ 3/ ... الخ


شخصية مزاجية نوعا ما .. طيبة ولكنك تنزعجين بسرعة ..


تضحكين بسرعه وتبكين بسرعه


اي انك تنفعلين بسرعة


لديك شخصية حساسه للغايه رغم انك تحاولين اخفاء هذا الامر امام الناس ..


الا انك تحبيطين ايضا بسرعه والسبب الرئيسي في ذلك


كلام من حولك سواء في شخصيتك او مظهرك !


شخصية ابداعية وتحب التميز ..


لديك مواهب وابداعات كثيره ولكن حبك للراحة والتردد هو ما يمنعك في اظهار الكثير من ابداعاتك ..


لديك حس وذوق عالي جدا..


اجتماعيه ولديك قدرة على الاندماج في وسط الناس بكل سهوله ..


ولكن لديك قلة بالثقة بالنفس في كثير من المواضع


التي تجبرك على التردد في اتخاذ قراراتك الشخصية او المصيرية ..


شخصية لا تحب ان يتضايق منها من حولها .. وان تكون بصورة حسنه على الدوام


دائما في كلام ذاتي مع نفسها ..


تلوم نفسها كثيرا ..


وتشعر بالخوف والقلق في كثير من الاحيان ..


لديك روح اللطافه والفكاهية ومحبوبه من الجميع ..


تمتلكين حب الاتيكيت في التعامل مع الغير وخاصة الناس الغرب عنك ..


تحبين تملك امورك الشخصية وعدم تدخل الغير بها ..


شخصية تحب ان تكون قويه اكثر مما هي عليه ولكن كثير من الامور تمنعها


ولكن متى ارادت ان تكون قوية ستكون وبشكل يفاجىء من عرفها حقيقة ..


تستطيع لفت انتباه الغير بسرعه ..


فلك جاذبية قوية ..


تجذبين من تحبين بسرعه


بروعة اسلوبك وحديثك وطيبتك ..



حفظك الرحمن

مشكوره عالتحليل يالغاليه وماقصرتي
يزاج الله خير