قصيدة غــدر الزمـــان
اسري مع الليل واسولف مع الغيمه
واسامر البدر لين الصبح يلقاني
واصيح بالصوت وانا داخل الخيمه
واسمع صدى الصوت في صدري ووجداني
واجر ونات صوتي في تقاسيمه
واخاطب الوقت عن حالي وحرماني
ويجاوب الوقت ويوضح مفاهيمه
في صوت شاحب جوابه يوم ناداني
يشرح لي الوقت عن كثرت مظاليمه
ويقول لي في كلامه حسب ماجاني
ياصاحبي لاتلوم الوقت وتضيمه
وتحمله ذنب خلانك وخلاني
ويلاه ياوقت تغدر بي مواسيمه
أعيش مخلص معه واليوم يجفاني
وأنا الذي صغت تحليله وتحريمه
وأصدرت قانون دستوره بقيفاني
وأسست له مملكة فالخاطر مقيمه
وقصورها شامخه بصروح واركاني
واليوم بعد الصفاء فالجو تعتيمه
وقتي تقلب وحظي عاثر اشقاني
والحلم في داخلي يسعى لتحطيمه
بعد التعب هد مجهودي وبنياني
لاتأمن الوقت لو كثرت معازيمه
تراه غدار للميثاق خواني
مايأمنه رجل عنده عقل أو شيمه
ولايواليه غيرإنسان غلطاني
الوقت كالسيف في حربه وتسليمه
في حده الحكم والسياف و الجاني
يبيع من يأمن أيامه بلا قيمه
من غير ذمه ولاله اي ميزاني
من جرب الوقت يحذر جهل تعليمه
والعمر لو زاد زوده فيه نقصاني
بيد الله العمر تأخيره وتقديمه
وأسأل من الله يحفظني ويرعاني
مع خالص الــــود ..
الأميرةالحسناء..
