قيثارة ناصر البكر الزعابي

تعانقنا عقب فرقا سنين اطوال ياالغالي
أصدّق كيف مااصدّق دفا حضنك يغطّيني


نعن هذا ضيا وجهك ونور الشمس مازالي
أشوف العمر في عينك تشوف الموت في عيني


حبيبي لاتحاتيني تراني دانف الحالي
أبرّق فيك واتذكّر لعل روياك تحييني


طبيبي شخّص أعواقي تحاليلك وتعلالي
محامي الحب من غيرك وهندست العشق فيني


وقلبي ذايب ٍ ميّت ونعشه مرتفع عالي
قبل لا ينقبر عنّك وصاني بينه وبيني


أحط قبره بحارتكم إذا صادف سعد فالي
واموتك حب واحيابك ليوم الحشر والديني


قبل لا تنشد اخباري بحمس البنّ والهالي
وانا ترويني دموعك من الوجنات تسقيني


نسيت الناس والعالم هلي والربع والمالي
يعل يفدوك عرباني ولا لحظة تخليني


وسولف لي عن علومك كلامك حيل يحلالي
مثل ماكنت بالأول على عودك تغنيني


مقام الكرد واللامي نهاوند الحزن تالي
ويطربني بيات الفن حجاز ولحن يشجيني


ترى معزوفتك شهقة وكيف الغنج ينقالي
موشّح أو صدى نهمة وتغرودة مظانيني


و قيثارة لها نغمة تمسّ الروح حسبالي
أنامل ايدك الحلوة تداعب حاضر سنيني


يسافر بي وله صوتك إلى مدريد رحّالي
وازاور برشلونة ثم أرد للسند والصيني


أجول الكون واقطاره أشابه بالشبه هالي
مذنّب يعبر الدنيا وانا ويّاه للحيني


أحاور فلسفة سقراط وافلاطون واوحالي
شعورٍ كامن ٍ وجده وسط مجرى شراييني


لأنك ملهم اشعاري طبيعي ياهوى بالي
تعلّمت الشعر منّك أجل تشهد لك ايديني


يميني مدمنة توصف تبايينك بالامثالي
ومن مثلك ولو ظلّك شبيهك بالتباييني


أنا والله مابحسد سوى نفسي من اوبالي
تراها ترجمت حبّي لغات ٍ للملاييني


خذينا ثارنا البايت هزمنا جرحنا البالي
دحرنا الحاسد بغيظه وهذا الشي يعنيني


واذا موتي شهر سيفه فلا برتاع واحتالي
وانا من مبطي الماضي عطيتك كل مافيني

مشكوره ع النقل دمتي

بحفظ الرحمن

شكرا ع التواصل أخي الفاضل