لعبة العنبر
اليوم راح أذكركم بلعبة العنبر جان تتذكرونها ...... وهيه عبارة عن فريقين يتكون الفريق الواحد من خمس أشخاص تقريباً ولازم أتكون موجوده الرملة الحمراء للسهولة , تتحطى غرشة بيبسي أو ميرندا أو أي شي من الغرش ويكون وراها كوود رملة حمراء ويرجع اللي بيلعب في البداية متر ونص تقريباً وتكون عنده طبعاً كرة التنس الصفراء وله ثلاث ضربات وهوه ومهارته عاد إذا صاب ترا صاب وإذا ما صاب يلعب ربيعه اللي عقبه لين ما يعقون الغرشه وإذا عقوها طبعاً بالرمي يتشاردون بسرعة ويبدأ الفريق الخصم باستلام الكرة ويحاول الفريق اللي عق الكرة بترس الغرشة ولازم يترسها كلها قبل ما يحصل له صلخه فالظهر , يالله عاد لو ياك حد من الفريق الخصم أشول يعني يفر باليد باليسار الله يعينك بيبس لك ظهرك تيبيس , المهم ويحاول الفريق اللي عنده الكرة يضرب واحد واحد من الفريق الخصم اللي عق الكرة , وبعد الضربة لو يت في الرأس عادي ما يطلع من اللعبة بالعكس يكمل وإذا الفريق اللي عق الكرة ترس الغرشه كلها يقول عنبر وبهاي الصوة اتكون خلصت اللعبة .....
بس والله إنها وناسه يوم الواحد يلعبها لكن الشي الخايس فيها إذا الواحد حصل له صلخه فالظهر يقول التوبة جان ألعب مرة ثانية ....
بس حبيت أذكركم بألعاب زمان.....
والسموحة....
