الأخوة الغالين:الصيد لايشك احد انه متعة بحد ذاته ولكن من الناس من يهوى الصيد بالطيور(الصقور)ويرى ان الصيد بغيره لايعد صيدا
ومن الصيادة من يهوى الصيد بالسلق ويرى ان المتعة به دون غيره
أنا على المقنـاص قلبـي يرفـي= فترة ونرجع يم اهلنـا منـا كيـف
بديـار لفـروق الحبـارى تلفـى=جنوب من حزم الجلاميد وطريـف
الطير هو غايـة غرامـي وشفـي=اقـدره تقديـر الاجـواد للضيـف
من كبر قدره حاملـه فـوق كفـي=وارعاه تسع شهور بالقيظ والصيف
ودهلـه لاشفـت ريشـه مصفـي=على الدعو واخفف النسر تخفيـف
نقلـه يشرفنـي وشوفـه يكفـي=عن شوف ناس ما تعرف المعاريف
لاشفت لـي نـو بروقـه ترفـي=نويت اجهـز موتـري للتكاليـف
القيظ كلـه جالـس(ن) ومتعفـي=وبرد المكيف نشف الـدم تنشيـف
متى سمـوم القيـظ عنـا تقفـي=وسهيل قبل يعمد الفجر قد شيـف
والنـار يصلـح شبهـا للتـدفـي=والبرد نوجس من نسيمه هفاهيف
وقمنـا لعزبتنـا نشيـل ونضفـي=ونكمل الناقص ونمـلا المطاريـف
واللي نشيل مـن اللـوازم مكفـي=ومكتفين العفش بالحبـل تكتيـف
ويمكن اليا جينـا البقالـة نوفـي=حاجات نشريها كمالـة مصاريـف
والصبح من حزم ابرقيـه مقفـي=صوب المعظم والهضاب المقاييـف
بديار جعل اشجارهـا مـا تجفـي=تعلهـا غـر المـزون المراديـف
في رفقة اللي نارهـم مـا تطفـي=على الشرف والجود ربع مواليـف
مجلاس طلقين الشـوارب بصفـي=على الدلال اللي بهن ساخن الكيف
خويهم ما اوجـس كـلامٍ يحفـي=غير المزوح الطيبـة والسواليـف
عقال وزن عقولهـم مـا يخفـي=ولاهم على الفاضي خفاف وملاقيف
