فتنه

فتنة الحفل زيدي مشـيتك بختره
كل خطوه بروق وكل لفحه صهيل

باقي بين عقلي والجنون شعره
اقطعيها ياشينه عاشق ٍ مو هبيل

خلي الارض تاخذ شكل غير الكره
خلي النار تاخذ رمز غيـر الفتيل

من غدى الليل شِــعرك قلت انا بسهره
ومن غدى الصبح وجهك قلت مالي مقيل

ارقصي بين حد الذنـب والمغفـره
ارحلي في سكونك واسكني في الرحيل

ارجفي كنــك الماء فززته احـجـره
واثبتي كنك الفضه بعيـــن البخيل

وانحني مثل غصن ٍ في طرفه ثمره
واوقفي مثل فزعـات بدوي ٍ اصيل

والفحي علمينـا كيــف تقدر مره
تزرع الليل صبح ، وتزرع الصبح ليل

في عيونك ســواد ٍ يستحيل آخره
كامن ٍ في بيـاض ٍ اوله يســتحيل

واحد ٍ تخزرين وما يجيـك اخبــره
اشهد انه عزيـز واشـهد انـه ذليل

اتـرك العقد بيـن الجد والغشـمره
يخبر الناس وش معنى جميل بجميل

كن بالصدر ظبي عيـوننـا تذعـره
ينتفض يذعر اللي ذاعريـنـه قبيـل

ومفرق الصـدر حبـات العرق تجهره
كن لك عقد در ، وعقد من سلسبيل

بينهم حـسـد ربي بعد ما صـوّره
عقد وده يجف ، وعقد وده يسيـل

آه ولا لمحتــه مقبلـه مدبـرة
شفت مثلي نحيل ٍ زم حمل ٍ ثقيل

دام ذا عجـز وش للناس بالمقدره ؟
دام ذا خصر وش لي بالخواتم بديل ؟

وسط ثوب ٍ خيوطه صمت في ثرثرة
به قليل ٍ كثيــــر وبه كثير قليل

كل شيّ بجسمه يفضحه يســـتره
فيه فتنه قصّيرٍ وفيـه حشمة طويل

كنه المخطي اللي يطلـب المعـذره
وكنه الدامح الزلـه عن الي يعيـل

في ردونه نقوش ٍ لا ســنابل ذره
الله اعلم لو ان الريـح هبت تميـل

كل شي ونقيسه فيــك بالمسطره
اقرب من النفس وابعد من المستحيل

كنك الكذب لكـــن ماحدٍ ينكره
وكنك الصدق ولكن مابيدينا دليل

باشت الغيد زيـدي مشـيتك بختـره
لاجل اطاول بحرفي شامـخات النخيل

شـاعرٍ تلمس ايدينـك على دفتـره
تغرق بابسط اوزانه بحــور الخليل