غياهيب العذاب ,,,

اضع بين ايديكم هذه الرائعه وكلي امل ان تنال على رضاكم .........

(( غياهيب العذاب ))

--------------------------------------------------------------------------------

يا صمودي كلّ ما هبت من الماضي هبـوب
يا وجودي كلّ ما صار الهوى مثل السـراب
لملمي باقي غرامٍ ... في خيالاتـي يجـوب
واتركيني بس أفكّر وش سبب طول الغيـاب
أحرق أنفاسي بنفسي وأشعل اهمومي وأذوب
وانطفي وأبقى وحيدٍ..في(غياهيب العـذاب)
واجمع أوراقي واصدق كذبتي واذنب واتوب
واهدم احلوم مداها بالهوى حـدّ السحـاب
ذمّتي منك بريّه ... مانـي بناقـص ذنـوب
والخطيّةماتموت ان صار جسمي من تـراب
اسرج خيولي ... ولكن علّتي عند الركـوب
ياعذابي من عنا لـك لا يخـاف ولا يهـاب
قمت انادي لك بصوتٍ شاحب ووجهٍ شحوب
وادري انّّك ما سمعتي وانّ ما عندك جـواب
صارت اسهوم التجافي ترتمي من كل صوب
واحتمي منها بكفِّي قبـل تلقينـي مصـاب
والله انِّك لو فتحتي لي على النِّكـران بـوب
ما يثنِّي خطوتـي عنّـك ولا مليـون بـاب
لكن.. ادري بالحقيقه تالي الشمس الغـروب
وتالي الحب الوداع .. وتالي الكذب الخـراب
ما كذبتي.. وان كذبتي.. فالغرام اكبر كذوب
أعرفك وانتي حقيقه..واعشقك واثرك سراب
ريِّحيني واستريحي واستري بعض العيـوب
وارحلي دامك عزيزه والزعل فينـي عتـاب
وارحلي دام المواجع توّهـا تـرْفٍ لعـوب
الجهاله تفقِد الصـادق مكاميـن الصـواب
انتي اللَّه لايهينك واصلـي ذيـك الـدروب
امّ انا رجلي تمادت تمشي ادروب الصِّعـاب
عزوتي بالحب قلبٍ كـلّ مايخطـي يتـوب
لكن احساسي تعزوى بالأماني ليـن خـاب
وش بعد حلمي وحلمك من مسرات وكروب
حبّنا كنّـه صغيـرٍ عذَّبـه وقتـه وشـاب
انتظرتك لين فـارق لـذّة النـوم الهـدوب
وابتديت اطوي غرامك صفحة بآخـر كتـاب
واللَّه انك ماتلاقـي بالشمـال وبالجنـوب
عاشقٍ يوفي... وخلّه من صنوف الحب تاب

كيف اتوب اليوم منّك..علميني كيف اتوب؟؟
وانتي بقلبي خطيّه ما بهـا ذنـب وحسـاب
ما بقى لي غير رجوى عالمٍ كـل الغيـوب
والتقي غيرك حبيبه تجبر القلـب المصـاب
اسعد الله قلبي اللـي كـلّ ماهبَّـت هبـوب
قام يصبر دون يدري وش سبب طول الغياب




مع خالص الــــــــــــــود ..


الأميرة الحسناء...