شوفوا شو صار وياي في مجلس الامهات..

مرااااحب الغوالي


صبحكم الله بالخير..


يا كثر مواضيعي الي ارمس فيها عن العادات والتقاليد ومذهب الحرمة فالسنع وتربية العيال

واليوم بيكون موضوعي متضمن هالسالفة وغيرها من السوالف في حادثة صارتلي من كمن يوم وحابة اخبركم فيها..



امسات كان شي تكريم في احدى مدارس الامارة وهالتكريم خاص بأولياء امور الطالبات المتفوقات على مستوى المدرسة..

وتبارك الله رب العالمين بنت خالي كانت الاولى على المدرسة الله يبارك فيها وفي أهلها يلي ربوها واحسنوا تربيتها..ولي الفخر في انها بنت خالي^___^حصنتج بذكر الله يالغالية

طبعاً رمستني حرمة خالي فديتها اذا بسير وياها أو لأ

خصوصاً انها المرة الاولى الي احضر فيها تكريم فالمدارس وانافيني نوع من الحنين والفضوول بنفس الوقت لشوفة المدرسة والصفوف والمسرح والمقصف وغيره من مباني المدرسة يلي اختزنت في ذاكرتي على انها اجمل سنين العمر وزيدي على هالشي اني آخذ فكرة عن المستقبل وشو الي يصير فمجلس الامهات http://forum.uaewomen.net/images/smilies/tongue.png..

طبعاً من صووبي فرحت وما صدقت خبر 60.../12%20(80).gif قلت حق مرت خالي بسير ويااااج معلووم60.../12%20(61).gif


وزهبت عمري على الساعه 6الصبح ..عسب يمرني خالي وعقب اسير بيته وكنا فالمدرسة في تمام الساعه8والربع

ماشاء الله شفنا كم من الامهات الي بناتهم متفوقات وشفت المدرسة والطالبات ويلست افرفر فالصفوف واسوولف ويالطالبات كونه كان يوم مفتووح وانا امخليه مرت خالي عند ابلوات بنتها(طبعاً من باب الذووق والادب اني ما اودرها دامني يايه وياها)

ويت لحظة تصوير البنات وشي من الامهات يلي بادروا في تصوير بناتهم في اعلى منصة التكريم

وجان اقول فخاطري يلا حشر مع الناس عيد ,,قلت حق مرت خالي قومي صوري بنتج بس استحت اتصورهاجدام الناس.. جان اشل تيلفونها وايلس اصورها وانا كلي فخر انه الناس تطالعني وانا ارمس بنت خالي الاولى على المدرسة ,,مادري كيف بس اتحسونه احساس حلو ^____^ وشعور بالفخر وحسيت عمري جني امها مب بنت عمتها وحسيت اني انا الي تعبانه عليها فدروسها ومذاكرتها والحريم يرمسووني عن تدريس البنت وجذا,,اقوولهم هاذي امها وسألووها,,


ما علينا



طبعاً في مواقف كثيرة بعدني ما رمست فيها

ولا تستعيلوون على اعماااركم لأن توا الناس على رفع الضغط


المهم يا خواااتي

بدت المدرسة فبرنامجها وعرض الفقرات ويلي اتخللها وجود الاعلامية مريم الشحي(ام حميد) ويلي رمست فموضوع وااايد مهم وخاااص وحرج بنفس الوقت ..


ام حميد كانت تغلي فداخلها وهي ترمس فمحاضرتها مع العلم انه شي فئة من الحريم الي كانت ترمس عنهم موجودات للأسف وسطنا

تكلمت عن كذا سالفة تحرش من الدريولية والبشاكير فالعيال

وتكلمت عن عدم احترام هالجيل للناس الكبار وغياب السنع عنهم

وذكرت شي انا علقت عليه نص المحاضرة وكنت فحالة غيض وانا ارمس ..

الاخت ام حميد قالت مشكلة امهات هالزمن يخافووون على عياالهم انهم يتعقدوون وينجرحون اذا الابلة هزبتهم!!!!!

ويخافون على مشاعر عيالهم لو قالولهم اصطلبوا وانتوا ترمسون مب شرات البنات تتميعوون!!!!

الام مالها دخل اذا الولد طول شعره وصبغه وخلاه شرات شعوور البنات !!!!!

الابو ما يودي ولده الميالس ولا يقوله رافج الشواب واحظر ميالسهم مع انه الميالس مدارس ولكن يا للأسف منو الي يفهم؟؟؟

امهات هالزمن الي ولا دارين عن عياالهم وكل همهم كشختهم وميكبهم وموضتهم

احنا ياما انظربنا فزمنا لين قلنا بس وظهرنا حريم وينشد فينا الظهر

عيل بلاهم جيل هاليوم مالنا عليهم سلطه؟؟؟

دخلت عرضت وقتلها اسمحيلي يا استاذه مريم ولكن في زمنكم ما اتوفرت التقنيات ولا عاصرتوا زمن الانترنت ولا كانت عقولكم متفتحة مثل الحينه وعسب جي بتلاقين العيال ردودهم عن 10 والساانهم يطوول اذااانهم من قلة الادب وترى هالعيب مب فيهم..في امهم الي ربتهم ولا داريه عنهم وفالابو الي مب مفتكر فعياله عباله العيال عند حرمة كفوو !!!!!!!

قالت صح الساانج ونقطة واايد مهمه ووايدات غافلات عنها

وردت نقدت على الامهات الي هادين بناتهم فالمولات بليا حسيب او رقيب تتمشى ويا ربيعاتها فالمول والحدايق ومالهم ولي!!!!!


ليش وين يالسين؟؟


خواتي ام حميد ذكرت بلااااوي من قصص التحرش والاغتصاااب والسبب ترى كله منكم


رديت قلت :يالغالية ترى شوفي هالكمية بس من الامهات الي يوو المدرسة في حين انه مئات من الامهات ما حضروا هالمجلس ومب معناته كل وحدة يت اهنا وبنتها من المتفوقات فالدراسة معناته بنتها فالحة أخلاقياً ودينياً ترى ميخصه ,,والمفروض من هالام انها تشكر ربها مليون مرة انها حازت على لقب ام الفتاة المتفوقة دراسياً ولازم اتراجع حساباتها مليون مرة فنفسها


والله يا خواتي لو اقولكم عن المناظر الي شفتها

بتقولون حرام انه هالاشكال اتكون امهات ومربيات اجيال...



والله حراااام اتييج الحرمة بلبس الفلانتاين الاحمر هي وكشتها الي امستولها تمليس وروجها الاحمر الفاقع والتحديد البني والمناكير الحمرة والعباة المفتووحة الي امخططه بالاحمر والراس قد القفعه والعدسات الزرق و الكعب الاحمر والتيلفون الي مركب عليه كفر احمر وشيلة حمرة وخارمه خشمها بفص احمر!!!!! واتكون فالنهاية ام لفتاة مثالية ومتفوقة دراسياً!!!!!!!

لا اتقولون اظلمها واتقولون هاي كشخة بس جدام الحريم لا والله

لأني بنفسي شفت هالاشكال راكبه مواترها جدام الحراس واولياء الامور الي بياخذون بناتهم!!!!


اااااااه يا قلبي


اتوقعت الي بشووفه فالمدرسة شرات ماكنت اشوفه قبل على ايام امي

حريم متغطيات متسترات ((((محترمات الحرم المدرسي))))

مب عرس حاضرينه في وضح النهااار!!!!!!!


واااويلاه على الجيل الي بيكبر وهو وسط هالاشكال ممن تدعي الامومة والابوة!!!!!!

واويلاااه على جيل بينشئ جيل على تربية فاشلة واخس دماراً من هالتربية الي انشووفها

خافوا الله يا امهات !!!!!!

خافوا الله في تربية عيالكم !!!!!!!

منو قال الجنة تحت اقدامج ياحلوة؟؟

لافديتج

مب كل ام ام

ولا كل اب اب

الام يلي ذكر حقها ثلاثاً الرسوول الكريم عليه افضل الصلاة واتم التسليم

يوم قال: ((امك ثم امك ثم امك......))والى نهاية الحديث

هي الام الي:

اولاً حملت

ثانياً رضعت

ثالثاً ربت


بالله عليج هل شليتي كل هالاحقية؟؟؟

ما عليها خلااف بنقووول حملتي صحيح وهاي سنة الله وحكمته في انج تتريين 9شهور شاله ولدج ولو انه الود ودج ما اتشيلينه يوم عسب ما تتعبين ولا تتغير هرموناتج ويندمر الجسم الممشوق الي عليج!!!

رضعتيه سنتين؟؟؟لا والله الاغلبية احينه عيالهم قوم بوالنيدو!!! عاد كله ولا يخترب جسمها ويترهل صدرها ,,ما تدري انه الرضاعه الطبيعية أصلاً بتشد صدرها بدون اي جراحة تجميل والاهم من كل هذا انه الرضاعه حق على اليااااهل وهي تحرمه حقه ,,وعقب يقولون ليش العيال مافيهم حنيه على امهاتهم !!!!!

ليش انتي حنيتي عليه فصغره؟؟ماتدرين انه الحليب الي تعطينه هذا بيسري في دمه وبيكبر على حبج؟؟؟

خواتي حنوا على عيالكم فالصغر بيحنون عليكم فالكبر


تعالي للحق الثالث

وهو التربية

آآآآآخ بس على موضوع التربية


حدث ولا حرج

التربية تربية البشاكير

وهذا يلي كنت اشوفه برع وللأسف شفته فالمدرسة ومن جانب بعض الامهااات يلي هم اصحاااب الاحمر وفي نفس المجلس


ياويلكم من حساب رب العالمين ..

يوم انكم فارين عيالكم على البشاكير فالشل والتلبيس واليلسة وغيرها وغيرها من حقوقهم يا ام يا فاهمه يا متعلمه!!!!!!


بعد كل هذا اتقولين الجنة تحت اريوولج؟؟؟

قومي بواجباتهم وانا اظمنلج انه الجنة تحتج

والله لو برمس وارمس وارمس جان ما كفتني صفحات المنتدى

ماقول غير الله يعين عيالكم

والله يصلحهم ويهديهم من خيار نفسهم

ويردعهم عن درب الحرام بفطرتهم الي انوجدت فيهم قبل ما اتكونون انتوا اولياء امورهم...


والسلام ختاااام

تحفظ البنات بالذات بالدين وليس فقط بالرقابة
الرقابة من الاهل ليس لها تأثير ان لم تكن على الدين ( احفظ الله يحفظك )

[align=center]لا حول ولا قوة إلا بالله
صدقتي فديتج بكل كلما سطّرها قلمج النابض بالأحاسيس والمشاعر الحقيقيه
وهي مشاعر الام الحنونه والمحتشمة والمربيّه الفاضلة بالدرجة الأولى لأبناءها
فقدنا هذي الأشياء المتنوعه في (( بعض )) أمهات هذا الزمن المتقلّب على حاله
الله يرحم زمان أمهات الماضي الذهبي >> تربية صحيحه وقويّه ~ احترام الوالدين والجيران ~ حنان كبير للأبناء ما يتوقّف ~ الدعاء لهم بالهدايه ~ ووووووو أمور كثيره
أما (( بعض )) أمهات هالوقت ما يشوفون عيالهم ولا يدرون عنهم ولا يدرون وين الله قاطهم وماكو تربيه الخدّامه عي اللي تربي العيال والأم هايته بطاعاتها وع رفيجاتها والتّسوّق كل يوم والحنان معدوم عندهم وما يسألون عن أصدقاء وصديقات عيالهم هل هم صالحين واللا طالحين .. وهذا غير بعض الأمهات يدعون على عيالهم >> وآنا شايفه مثل هالحاله
أهم شي عندهم رشاقة جسمهم وأناقتهم وكشختهم وموديلاتهم وماركات مكياهم وشنطهم وأحذيتهم ~ وانتوا بكرامه ~
واللا العيال >>>>> ع الخدامه تربي وتباري وتسبّح وتلبّس وتلعّب كللللل شي عليها حتى الطّباخ عليها ...

الله المستعاااااااااان
كفيتي ووفيتي اختي أم محمد بموضوعج المميّز[/align]

64...0203cedba1.gif

[align=center]دمتي بحفظ الله ورعايته وستره ورضااااه[/align]

ربنا يحفظ بنات المسلمين ويعصمهم من الفتن ما ظهر منها وبطن
نحن تخلينا عن تقاليدنا وأصبحنا نقلد الغرب في كل شيء بدون ان نفكر لحظة هل هو يناسب عاداتنا وتقاليدنا أو لا
فزينة المرأة تكمن في لبسها المحتشم والحياء وقار وليس كسوف
لي عودة مرة ثانية للرد بالتفصيل
جزاكي الله خيراً على طرحك مثل هذه المواضيع

[align=center]
هيه حق منو ولا منو بنقول بعض الأمهات الله يهديهم مايدرون عن بناتهم شي ويقولون نحن واثقين فيهم سيرواوتبعوهم وشفوا وهم يغازلون ويشيشون بالمقاهي والله نستحي من نفسنايوم نشوفهم لامستحي وحيا الله يهديهم
[/align]

[align=center]
موضوع حلو أختي نبهتينا على اشياء واااايدة


ننتظر موضوع شرات هاااي وانت قدها ...


يعطيج العافية وبارك الرحمن فيج
[/align]

ربِّ انزع من قَلبي
تِلڳ الآشياَء التِي تُؤلمني ~
　ربِّ اجعَل ليّ سُلمًا بينَ السَماء ۆالآرَض أصعَد بِه إليك

كلّما ضَاقت بيّ الآرَض ~　

ربِّ أنا أمَتُكَ الضعيفة فاجعل ليّ مَلَكًا بجواريّ يُربّت على كتفيّ كلّماخابت بيّ الظّنۆن ،

اللهم لقد خابَ ظنيّ بهم واحدًا تلو الآخر !و الظن بكَ لا يخيب يا ربّ العرش

　ربِّ امنحني فرحًا كبيرًا يسعنيّ

ربِّ اجعل السماء ليّ وطنًا

ربِّ اجعل السماء ليّ وطنًا رحبًا لا يضيق فيه صَدري ~　

ربّ أنتَ القريب ,
و الصاحب
..أنتَ المُجيب
, و السَامع
..ف آرحَم ضَعفيي

يّ اللهۆحقق ليّ رآحة فإنيّ بحاجة إليهآ　ربِّ عوّضني عن تلكَ الأفراح الواهيةبأفراح تَبقى ..　ربِّ انزعهآ من قلبيتلك الخيبَآت </3 !