برياني اللحم بطريقة منال العالم مع لمساتي..صور
السلام عليكم ورحمة الله وبركاته ...
اشحالكم يا بنات وعساكم بخير ....هذا ثاني موضوع احطه في قسم مالذ وطاب...
ريلي يحب هالبرياني واااايد ....واتمنى تجربون تسوونه وتقولون لي رايكم فيه...
نبدا اول شي بمقادير سلق اللحم :
**حبة طماطم صغيره
**بصله صغيره
**كزبرة بسيقانها يعني لا تشلون الاوراق فروها كامله
** 3 حبات هيل
** 4 حبات مسمار (قرنفل)
** 2 ورق غار
** 2عود قرفه
** 4 حبات فلفل اسود
** نص ملعقة صغيره بزار (بهارات) وانا استخدم بهار ام عبدالله
** ربع ملعة كركم
** ماي لين يتغطى اللحم
الطريقة اذا عندج قدر ضاغط: تخلينهم لمدة ربع ساعه فقط لاغير
اذا ماعندج : تحطين المقادير في قدر عادي وتغطين عليه وتخلينه لمدة ساعه وتحسين اللحم بعود الاسنان ..اذا دخل عود الاسنان بسهوله يعني خلاص
هاي الصوره
يوم يخلص اللحم ينطبخ نطلع اللحم ونصفي المرق ونحتفظ فيه لانه بنستخدمه عقب بيكون شكل المرق نفس هالصوره
مقادير خليط البرياني:
61...7845b1b4e4.jpg
** رز مطبوخ نص طبيخ (كوب ونص)
**نص ملعقه صغيره زعفران مخلوط ب ربع كوب ماي ورد
** ملعقة زيت
** 1 حبة متوسطه بصل مفروم خشن
** 2 فص ثوم مهروس
**1 ملعقه صغيره زنجبيل مفروم
** 1 قرن فلفل اخضر حار
** 1 حبة طماطم متوسطه مقطعه مكعبات
** جزره وحده مقطعه مكعبات صغيره
** 2 حبة بطاطس صغيره مقطعه مكعبات متوسطه
** نص كوب بازيلا مجمده نحطها تحت الماي وبوضح بالصور طريقة غسله
** نص ملعقة صغيره بزار البرياني (تنباع في السوبرماركت يكون مكتوب عليها بهارات برياني)
** نص ملعقه صغيره من اي نوع من البزار اللي عندج انا استخدم بزار وحده اسمها ام عبدالله (اذا موموجود ممكن تكتفين بملعقه كبيره من بهار السوبرماركت)
** 1 ملعقه صغيره ملح (انا استخدم الملح البحري)
** ربع ملعقة صغيره كركم
هاي طريقة غسيل البازيلا المجمده
هذا الرز
طريقة خليط البرياني :
** في قدر متوسط الحجم نحط الزيت مع البصل وتخلطينه لين مايستوي لونه ذهبي
** اضيف الثوم المهروس والزنجبيل وقرون الفلفل ونخلطه لين تطلع ريحة الثوم والزنجبيل (ريحه لذيذه)
** نحط الطماطم والجزر ونخليه شويه لين تحسين لون الجزر ابيض شويه ..
**نضيف البطاطس والبازيلا واللحم المسلوق والمرق اللي صفيناه ..
** نحط البهارات كلها والملح والكركم ..ونخليه ينطبخ ع نار متوسطه لمدة عشر دقايق لين يتشرب المرق شويه
هاي صورت الخليط بعد ماصبينه المرق
** عقب ماتخلص ال10 دقايق نييب قدر ثاني ونحط شويه من العيش المطبوخ
** نحط فوقه شويه من خلطه البرياني مو المرق ...يعني نشل بالملعقه
** وعقبها نحط عيش واخر شي الخلطه
** نسوي فتح في العيش بيد الملعقه ونصب داخل الفتح خليط ماي الورد مع الزعفران
وهاي صورته
**نغطي القدر زين بالالمنيوم ونحطه ع نار هادية ونحط تحته صفيحه معدنيه لمده 45 دقيقه (انا استخدم قاعدة حليب البودره العلبه المتوسطة الحجم اقصه بفتاحة العلب)
وفي النهاية هاي صورته
نقدر نقدمه مع صلصة الفلفل :: وصلصة الروب
وهني وعافية على قلوبكم واتمنى يعيبكم الموضوع وانتظروا جديدي (جني بسوي سي دي اغاني ؛)
ردوا ولو بدعوه صادقة اذا ماعيبكم محتوى الموضوع
رد: برياني اللحم بطريقة منال العالم مع لمساتي..صور
يسلمووووووووو ع الطريقه
الله يعطيج الــــــــــــف عااااااااااااااااااااافيـــــــــــــــــــــه
رد: برياني اللحم بطريقة منال العالم مع لمساتي..صور
رد: برياني اللحم بطريقة منال العالم مع لمساتي..صور
رد: برياني اللحم بطريقة منال العالم مع لمساتي..صور
واااايد حلوه الطريقه وسهله بعد
يعطيك العافيه
رد: برياني اللحم بطريقة منال العالم مع لمساتي..صور
يعطيج الف عافية على هالاكله الطيبه ...
