بسم الله الرحمن الرحيم
السلام عليكم ورحمة الله وبركاته
عساكم بصحه وعافيه
انا اليوم حابه اناقشكم بموضوع
ويهمني ايكم يا جماعه
بخبركم بداية القصه بختصار
وهاي القصه شفتها جدام عيني والله شاهد بكل شي
كانت هناك حرمه متزوجه وتوفى زوجها الله يرحمة ويابت منه ولدين صغار واحد رضيع والثاني اكبر منه
وبعد ما توفى راحة تزوجة وتركت عيالها ولا سالت عنهم تركتهم ويا يدتهم ام ابوهم تزوجة واحد متزوج من مصرية وعندها بنتين و ولد وهي يابت ويابة 5 بنات
ومرة الايام و كبرو عيالها و تزوجو حتى عيال المصريه كبرو و تزوجو و مرة الايام ومات الشيبه الله يرحمه وترك حريمه في بيت واحد
وعاشو ايامهم الحلوه و المره وانتو تدرون ان العيايز ما يحبون يتمون روحهم يعني مو كلهم و العيوز الي عندها 5 بنات وحده من بناتها
ساكنه جريب منها اما الباجين بعيد شوي وهاي المسكينه تروح بيت بنتها عسب تتونس وياها وبنتها الله يكفيكم شرها (انتو لا امكم يت بيتكم تستانسو و تيلسون وياها وتتمنون نها تبات معاكم بس هاي الله لا يراويكم وش تسوي فامها يعني هي جريبه من امها لا تروح تزورها ولا تسال عنها ولا جات المسكينه تيلس وياها تروغها روغة الجلاب الله يكرمكم والعيوز مسكينه تبى تيلس وياها متعلقة فيها اما عيالها الي تركتهم وهم صغار الكبير الله يشفيه تعبان بسبت زوجته بلته مسكين الله يعينه و الصغير هو الي يخدمها من عيونه وما يقصر فيها لا هو ولا حرمته كل شي يبولها خدامه والاكل كل يوم يبون لها وكل ما ينقصها شي يشترولها الي تبيه هي عيوز يعني ما تقدر تسوي اكل ولا تخدم في البيت يعني اكيد بتحتاج خدامه ويابو لها خدامه علشان تخدمها و بنتها الكبيره الي كلمتكم عنها الي ما تحترم امها تبي اطف الخدامه باي طريقه ياخي دام انها ما تقدر تشوف امها ولا تقدر تساعدها بشي ليش كل ها ليش يعني تبى الطفر الخدامه ياخي الخدامه تساعدها وتسوي كل شي لها اللهم عافنا الشر بعينها هي تسوي وايد مشاكل مو شوي ويوم ايونها الحريم تيلس تخورط لهم امي حليلها اباها تي بيتنا و اباها تبات وياي يعني قمه النفاق والشر ما عرف كيف متحملنها زوجها و تيلس تجذب على اخوها من الاب اونه الخدامه تتكلم عليكم و تنقل كلامكم لاخوي من الام وها كله خريط المسكينه ما قالت شي هي الي ترمس و تخورط و تنقل كلام ما عرف من وين يايبتنه وخواتها طمه ولا وحده تسوي شي تسكتها او تعلمها ان الي تسويه غلط اللهم عافنا مسكينه ها العيوز يابت بنات ما وراهم فايده
والله انا لو امي يت بيتي والله لاحطها بعيوني ولا اخلي شي ينقصها بستانس بوجودها فبيتي انا الحين ابغي اناقشكم
شو ها الدنيا والله عجيبه ها الام المسكينه ما في حد يساعدها غير ولدها الله يخليه لها ولاهله ويعطيه العافيه مسكين ما شل بخاطره ان امه تركته وهو صغير ولا همه الي همه ان يروح يساعد امه وما يبي ينقصها شي و يتحمل اخته الي تسوي له المشاكل وهاي مشاكلها ما تخلص ابد الله لا يراويكم ناس نفس ها الاشكال
انتو شو رايكم انا بصراحه تقهرني هاي المخلوقه كيف تسوي جي ويا امها اللهم عافنا
ياريت تخبروني رايكم يا جماعه
اسفه لاني طولت عليكم
وشكرا
^^
