شو اتشوفون بتصرفى ..

السلام عليكم ورحمه الله وبركاته..

والحمد لله والصلاه والسلام على سيدنا محمد وعلى آله وصحبه أجمعين..

ها اول موضوع لى فى هذا القسم .. كنت محتاره هل اكتب الموضوع ولا لا محتاره ..
اول امس دقت على صديقه قديمه وستغربيت انا الاتصال الصراحه , فخبرتنى عندج خوات لزواج ومن ها الرمسه . قلتلها عندى بس انا سامعه بأنهم محجوزات حق اعيال العم .. وبعدين تمت اتقولى اخوى والله يبا يخطب وحده اتكون حلوه وتكون طويله ويكون شعرها طويل , قلتلها اخوج خقاق شو ها الرمسه بعد احسه بطلب سياره هب عروس ...المهم بعدين قالتلى جم عمرهم وخبريتها وقالتلى لا نبا الصغيره هب الكبيره الى مخلصه الجامعه ..
قلتلها دخيلج انا ما احب سوالف الخطبه واخطبلج ومن ها الرمسه احب اكون بعيده وبعدين طلبت رقم الوالده وكنت صريحه معاها قلتلها اخاف امى تردكم وبعدين بتزعلين منى ولا شى انا مايخصنى من الحين اقولج ...
ها كله قسمه ونصيب بس اهم شي انج ماتزعلين منى لانى معوده عمرى انى ما ادخل بهاى السوالف مول حتى اخوانى الشباب ماخططبت لهم ولا شياته بروحهم اختارو الى يبونهم بدون تدخل منى ..
وبس ها الموضوع
شو اتشوفون بتصرفى هذا لانى كنت صريحه مع البنت لانها بعد صديقتى ..

اتقولي خواتج محجوزات يعني مخطوبات كيف بعد تبينها تخطب اخوها حق اختج دامها مخطوبه

قوليلها ادور مكان ثاني ودامها تبى تتنقى طويله ومادري شو خلها اسير حق خطابه

الريال يتشرط والبنت تتشرط

وكلهم ماينفعون

وبنهايه كل واحد يتنازل على شروطه شوي شوي

داخلين بحماسه

حفيد المقام شكرا على مداخلتك
وانا فعلا خبرتها بها الشي ولكنها اصرت الا تبى تخطب اختى الصغيره .. انا ماقلتلها اخطبيها حق اخوج
فقلتلها انا ما يخصنى اذا حد ردكم ولا شياته لانى بريت ذمتى ..

اهلا وسهلا بك
موضوع جديد في ساحة الحوار والمناقشة
ردك فعلا ذكي ولا يزعل الطرف الآخر
خاصة انها صديقة قديمة لا تعلمين عنها شيئا
واخواتك اهم من صديقتك القديمة ولا مجاملة ولا حياء
وهذا درس للصديقة القديمة حتى تعرف الاصول في مثل هذه الامور
لان المواصفات التي يريدها اخوها تدل على سطحية الصديقة القديمة واخوها
المفروض تقولك نحن نريد زيارتكم بعد ما سئلت عن اخواتك من مصادر اخرى

تسلم ابو عبادى على المرور الى عطر متصفحى البسيط...

المشكله البنت مصره وانا اقولها بانهم محجوزات اش لى بها الصدعه انا .. بس انا سويت الى على والباقى على ربنى ..

هلا نبض

ترى ما يكون هالسوالف من الاهل..صدقيني انا شفت وايد عينات من الشباب نفسهم هم اللي يتشرطون والاهل يبتلشون فيهم

انتي ما غلطتي.....اللي عليج سويتيه علشان محد يلومج لا من اهلج ولا من ربيعتج

والزواج قسمه ونصيب ولو له نصيب فيها بياخذها..لا تفكرين وايد بالموضوع

شوفي في الشرع يجوز حد يخطب على خطبة أخوه المسلم

وعطيها محاضرة على هذا الأساس عسب تعرف الدين الإسلامي كيف

وذا بعدها مب مخطوبه فشوفوا منو الي يناسب إختج

وإذا ولاواحد فلا توافقوا مب اي واحد يخطب توافقوا عليه

إنتي عطيها محاضرة وكلام عن خطبة المسلم على أخوه المسلم بس اقري قبل وإعرفي الحكم الشرعي ولاتنسي ادلتج

أو اذا مستحيه تتكلمين طرشيه ع الواتساب مع الادله

وشكرآ

رد دبلوماسي بس غير حاسم مما جعل صديقتج تحاول الاتصال بالوالدة

عاد ما ادرى فيها اذا اتصلت ولا لا
انا خبرتها كل شي من البدايه بس هى اصرت
بس شكلها ما تصلت لانه امى ماخبرتى شي..