قصة أغنية "لول معي زايد غلاكم" للفنان ميحد حمد

السلام عليكم
الصراحه انا كنت من وااايد احب اغاني ميحد
والحمدلله ودرت الاغاني
المهم قصة هالاغنيه مؤثره جدا الصراحه انا وااايد تعيبني

قصة أغنية ..لول معي زايد غلاكم للفنان ميحد حمد

هذه سالفتها يا جماعه الخير .. شله شباب .. يجتمعون في احد المجالس ..

يسوولفوون ويضحكون كل ليله ..

وكان راعي هالقصه .. وياهم دوم ايي ويسولف ويضحك .. وفي يوم من الايام بعد

ما طلع من عندهم .. تمو الشباب يحشون فيه ويضحكون عليه ..

واحد من اللي ما يرضون عليه من ربعه .. خبره بالسالفه ... وقاله تراهم يرمسون

ويحشون فيك من وراك ..

باليوم الي عقبه سار لهم في نفس الميلس .. ويلس في زااويه بعيده .. وكان عنده ورقه

وقلم .. وكتب كلمات الاغنيه ..



لول معي زايد غلاكـــم ** افدي بروحي واشتريكــم

احرق واشني من شناكم ** ما ارتضي بالشين فيكم

وانتو تجافونا اصدقاكم ** من دون زلات تجيكــــــــــم

كدرتو الخاطر تراكــم ** واعرفت قاصي اولـــيكـــم

واليوم مالي في معناكم ** حشا وكلا ما عنيكــــــــم

امشو وسير في هواكم ** وانا عليه مبتليكــــــــــــــم

ضاع الربع في ملتقاكم ** من حين جافيتو خويكـــــم

لو كان باغي الشد عواكم ** ان جان بشاور وليكـــم

لكن هذه من جداكم ** امسامحه مني اليكـــــــــــــــم

واقول لاني في ثراكم ** الله يهديني ويهديكــــــــم

والقلب حاله انعاف ماكم ** يوم املحت شربت طويكـــم




وبعد ما كتب هالكلمات .. سار وعلق الورقه عالباب .. ورووح ..

وفي الطريج سوا حاادث وتوفا

الشاعر هو (ماجد بن علي النعيمي) نشاء وترعرع في عجمان.سافر في بداية شبابه الىالمملكة العربية السعودية.. حتى بلغ العشرين من عمره .
عاد الى الامارات وبتحديد الى عجمان منشأه...
له كثير من القصايد الجميله اشهرها "لول معي زايد غلاكم" وقصيدته المشهوره التي تغنى بها المطرب الكبير علي بروغه وهي قصيده من كلماته ومن كلمات الشاعر الكبير راشد الخضر وهي "يا حبيب القلب عذبت الحشى"...

توفي رحمه الله في السبعينات في ريعان شبابه حيث كان عمره عند وفاته 22 سنه..

بغض النظر عن القصائد المغناة ..... الشاعر كتب كلمات جميلة ونابعة من القلب

والأجمل في هذه القصائد أنك تجد اللهجة المحلية الإماراتية ظاهرة وبوضوح فيها

http://www.up.x2x3.com/uploads/be6a09356c.gif
تسلم ياخوي ع الكلماات الراائعه
ويسلم قلبك وايدك
بس شو الفايده مات على الغناء
ماتاب
الله يرحمنا برحمته
ويحسن خاتمتنا
اللهم آآمين

http://www.up.x2x3.com/uploads/78077c1d4f.gif

تسلمين ختيه ملاك المشاعر ع المرور
وحبيت اوضحلج معلومه انه هالشخص اللي توفى شاعر هب مغني والله يرحمه
والله يرحمه توفى وماكان يعرف انه هالقصيده بيغنيها ميحد

الله يخويه انا قبل اشوي قريتها كنت قاعده اظهر قصايد
فقريتها والصراحه الولد توفى الله يرحمه
مشكور عزيزي لك مني ارقى التحيه والاحترام

الله يرحمه ويغمد روحه الجنه

تسلم اخوي ع الطرح

آميـــــــــــــــــــــــــــــنـ
وتسلم اخويه راك بوي ع المروور