قولوا له ( ابن الذيب ) قولوا له عشانه يستشيط

قولوا له ( ابن الذيب ) قولوا له عشانه يستشيط
أني إذا جيته أبسحب من تحت رجله البساط


ماني أبالغ في الكلام أو إن ذا زيف وخريط
ولا أقول ذا من حيث قلة عقل أو إنه اعتباط


ما يستوي يغلط ع/ خلق الله ويازم شيط ميط
مادام ماط الناس لابدّه يتحمل للمياط


الناس قامت تشتكي منه وهو أمره بسيط
إن كان يبغيها زماط أنا ترى قد الزماط


أها تحداني وشد العزم ما دامك نشيط
وإن كان ما عندك نشاط أنا بمدك بالنشاط


وإن كنت منته مقتنع فينا ترى ذوقك حطيط
وعديتنا مثل الطحالب وش نعدك الانحطاط


وين الملوك ووين شيخان العرب معْطى الصفيط
إذا نولك ف/ الشعر مالك على البركن صفاط


مثل الزعيم الفارس الشاعر يلي يلقب سَلِيط
لي ما يفوته شي يلقطها على الطاير لقاط


بو راشد محمد ابن راشد أبو الأمر القليط
على أبو أكبر شنب وأهل الممالك والبلاط


ولو ما أحاتي بالرّضا فزّاع ما خفت اللغيط
لي ما وفاه الذيب وأمثاله ولا شعر الأنباط


الشاعر الفارس الشيخ الراقي الشمخ البسيط
يكفي بأنك بس لو تشوفه تحس بالانبساط


إذا سمح لي طال عمره أستأذنه أقص الشريط
وإن ما سمح لي سيدي أمره ومع الأمر أتعاط


أقولها من حيثني بالله وبالله مستحيط
من كل شيطانٍ رجيمٍ واعمله وما به مناط


الشعر علمه مثل ميدان الكرة لعبة رهيط
اليوم تلعب به أساسي وبكره تلعب به إحتياط


يا الذيب علامك تحوّط وإنت شكلك ما حويط
بالشعر مستهتر وراعي الشعر تمسح به البلاط


وإنته ولا إنته قد لي تستعبطه ومنته بعبيط
أبا أنصحك نصيحةٍ أوضع ع/ الحروف النقاط


ما عاد نبكي ع/ الشباط المنشبط برّا الشبيط
ما قد قفا قد راح في حاله ولا يفيد العياط


وش لك تزمر صادعنّا طيط طاط وطاط طيط
ما حيدنا جيناك لديارك نبا نملي الشناط


إن كنت يا ابن الذيب بحر أنا ترى جنبك محيط
وإن كنت حايط لك على شلّه أنا بقومي محاط


لو ما طويل العمر فزّاع وزعله وما يحيط
ولو ما مراعى للشعور وخوفتي فك ّ الرباط


ولو ما عربنا والسلوم وخوفتي يدش الوسيط
لأعلن عليك الحرب من ساحل دبي إلى الرباط


يا خي إتق الله وخاف ربك والكِبر أكبر سِليط
على بني آدم يودي به على عوج الصراط


الشعر ما هو بملك لك ولنّه بالأمر البسيط
وإحنا بدوا ما نقبل الشينه ولا نقنا السياط


يا هيه وش تعلم عن الشعار عشانك تميط
لثامة لسانك وتوضع للشعر منك إشتراط


الشعر يا ابن الذيب ما هو بأمسية ولاّ سقيط
الشعر من قبلك و من قبلي ولا جاه انفراط




شعر : محمد بن طناف الكعبي

اختيار رائع

شكرا لكـ

يسلمو ع الطرح خيوووووووووو

الشعر علمه مثل ميدان الكرة لعبة رهيط
اليوم تلعب به أساسي وبكره تلعب به إحتياط