اشتريت سوبارو ليجاسي 2013 وعندي استفسار من أصحاب السوبارو

السلام عليكم،

إخواني أنا اشتريت سيارة سوبارو ليجاسي موديل 2013
توني امظهر السيارة من الوكالة خذت من الموديلات الباقية عندهم قبل ما تنزل موديلات 2014
لان كانوا امسوين عليها خصم
والسيارة اصلا عايبتني

المهم:
انا الصراحة اول مرة اسوق ليجاسي
السيارة حلوة بشكل عام
مريحة
وثابتة
وجودة عالية
عزم قوي مع انها 4 سلندر
اتحس انك اتسوق 6 سلندر

لكن عندي ملاحظة:

لاحظت ان القير ما يبدل ابدا
يعني يوم ادوس ريس كامل أو حتى ادوس ريس عادي مب كامل اتلاقي المؤشر يوصل لين الخمسة ونص او ستة عقب يرد ومرات ما يرد
مب مثل السيارات الي متعود عليها ان قير واحد اول ما يرتفع لين 3 على طول يشفت وينزل عقب يوم على قير 2 اتحصلت يوصل لين 3 ويرد مرة ثانية وهكذا
هذا لا ما ينزل يتم مرتفع في زيادة على طول

اتحريت في خلل في القير لكن قلت مب معقولة السيارة وكالة !!

دخلت على اليوتيوب وشفت نفس الشي واحد حاط تسارع اليجاسي عطاها ريس كامل ونفس الشي الامبير ما ينزل

سالت واحد عنده ليجاسي بس موديل 2009

قالي سيارات السوبارو بشكل عام تعتبر سيارات سباق

فنظام القير يختلف عن السيارات العادية لان السيارة عزمها عالي

هي الصراحة انا احسها طبيعية

لكن قلت استفسر اذا حد عنده ليجاسي ارجو انه يفيدني بالموضوع

وبكون جدا شاكرله

السلام عليكم

وين الخبراء

ماعندى خلفيات

للتوضيح يا شباب

أنا رحت الوكالة علشان أول سيرفس واستفسرتهم عن الموضوع
ودخلوني الورشة وراووني انه مافي اي خلل فني في المكينة أو القير وهذا الموضوع طبيعي جدا جدا
لان هذا نظام يديد في سيارات السوبارو من 2012 وطالع
وهذا النظام ما يخلي فاصل بين تبديله القير والثانية ويخلي الريس مستمر
قالولي اسم النظام اليديد لكن نسيت
وقالولي هذا النظام الحين يديد في عالم السيارات
وقاعدة نيسان الحين اطبقه على سياراتها
واول شركة طبقة هذه التقنية هي شركة أودي


الصراحة اقتنعت بعد هذا الكلام العلمي من مسؤول الورشة شخصيا
وفعلامن البداية انا كنت حاس ان الموضوع طبيعي وبالعكس حلو
لكن اتعرفون يمكن لان هذا شي يديد ونحن متعودين على نظام السيارات القديم القير لازم يعشق
فلهذا السبب استغربت


لكن بشكل عام السيارة حلوة
عليها انجن جبار
تقنية عالية في السواقة
على اللفات اتحس انك راكب الماني مش ياباني

انا ما اسوي دعاية حق السيارة او الوكالة
لكن نا اقول هذا الكلام لاني احس ان سيارات السوبارو مظلومة في البلد
مع انها شركة عريقة وسيارات قوية واتعمر