طاوعك قلبك تغيب وتهجر أحبابك
تنسى غلاهم وتتركهم وتنساهم
حرام تترك خفوقي يشكي غيابك
وأنته في قلبي أعز الناس وأغلاهم
ناديت والصوت لا شتت ولا يابك
يا سيدي يا عديل الروح يا فاهم
وأنته بوجه إشتياقي تغلق أبوابك
وأنا أقرب الناس إلى قلبك وأوفاهم
نسيت حتى تقول شفيك وش صابك
يوم الألم عذّب عروقي وأشقاهم
بدّيت ناس على ناسك وأصحابك
ما أتعبت نفسك تدورهم وتلقاهم
نامت عيونك ونام الليل بأهدابك
واللي شكوا غيبتك ذا النوم ماياهم
زادوا على جرحهم كم جرح بأسبابك
وأن أقبل الليل صوت الجرح صحاهم
أرسل لك عتاب قلبي وأحسب حسابك
وأبياتي البيض دايم باسمك أبداهم
يجبرني الشوق يجبرني على عتابك
وأتمنى تقرا ودادك قبل تقراهم
لمت الخفوق إذا قابلت هلاّ بك
يا أطيب الناس في عيني وأغلاهم
