بسم الله الرحمن الرحيم...
مرحبااا...
كفـــــــــــــــــــاية.
كفايه صار لك شهرين غايب عني يالغالي ... كفايه يا أعز الناس ترى والله ما أقدر
دخيلك لا تخيب فيك هقواتي وآمالي ... وإذا إنها عن الصبر والله وغلاتك عندي راح أصبر
أبتحمل عنا فرقاك وحالي يرثي لحالي ... مع إني والله لين اليوم مدري ليش بس تهجر
أبى أعرف شو السبب أرجوك وش اللي بس يجرالي ... أنا شسويت يا ربي عشان تثور وتتفجر
أنا والله ما أستاهل أبد كل اللي يجرالي ... أقل ما فيها بس قلي سبب خلاك تتغير
أبى أعرف بس شو الموضوع علامك صرت ما تبالي ... إبذمت كل أهلك فـ يوم شفتني بشي أما مقصر
عطيتك قلبي وروحي وهبتك حالي ومالي ... حملت إحساس هالدنيا وعطيته لك وأنا أفخر
عشقتك عشق لا قبله ولا بعده أنعشق تالي ... هويتك موت وأتخيل إلين الموت وأتصور
وإذا جاني مسج منك أمخزن رقمك الغالي ... ولا أمسح رسالاتك أتم أقراها وأفكر
وأحلل كل كلمة بالمسج الله يا غربالي ... وأقول بخاطري معقوله حاسس فيني ويشعر
وأرد أقول لأ يمكن تذكرني وهو سالي ... لأني توني مطرش مسج طرش مسج يشكر
وأرد أقول لأ أدري يبيني وحاسس بحالي ... وأرد أقول لأ ما أظن على باله أنا أخطر
إلين إني أنا أتأكدت قلبه بالفعل خالي ... ولا غيري أنا بقلبه يحبني موت ويقدر
لأني مره من المرات طرت فكره على بالي ... نويت أزعل بدون أسباب وأشوفه لو بيتأثر
أبعرف قدري بقلبه بيهمه وضعي الحالي ... أو إنه راح يطنشني ولا يسأل ويستفسر
وفعلاً دق وما جاوبت حرقي لي والله جوالي ... 3 آلاف مرة دق وأنا مطنش ولا معبر
كتب لي بالمسج أطلع أنا عند بابك الحالي ... قسم بالله ما تطلع لأخربها أنا وأحدر
مشكلتي أعرفه زين يسويها ولا يبالي ... نزلت وخاطره مكسور يقول أشفيك متغير
وقلت بس أبي أتأكد إذا قدري معك عالي ... ضحك لي وقالي أتاكد ودمعه بلل المحجر
وطارت فيني الدنيا لمكاني صاحبي جالي ... تعذر لي وأنا الغلطان وأنا اللي لازم أتعذر
بعدها عشنا أحلى أيام بقربه هنيالي ... وصلنا لمرحلة ما نفترق عن بعضنا وأكثر
وبعدها فجأة خلاني ولا يسأل عن أحوالي ... وأنا في خاطري أدري محال في يوم يتغير
أدق له ما يجاوبني بديت أشك في حالي ... أخاف إنه حصل له شي أخافه بس متكدر
لعب في قلبي الوسواس خياله ما تهيالي ... حوالي ألف مسج طرشت حبيبي يا عسى ما شر
لا جاوب وأنا قاعد على أعصابي وغربالي ... حبيبي صار له أسبوع فيني حتى ما فكر
إلين إني عرفت إشلون أخلي خلي الغالي ... يكلمني وجت فكرة بعد ما مت وأنا أفكر
وفعلاً.. أتصل فيني وبدت أحزاني وأهوالي ... وكانت صدمتي كبيرة علي الغالي يتغير
سألته قلت له وش فيك ما من شر يالغالي ... وش اللي صار بالدنيا علامك ليش متبعثر
أونك يعني ما تدري بدونك صرت أنا لحالي ... ولالي خلق أي إنسان كثر ما فيك أنا أفكر
وجاوبني وقال أرجوك أبي هالدنيا تصفالي ... أنا مليت من وضعي وأشوف الكل متغير
أنا ضاقت بي الدنيا وأبي أبقى أنا لحالي ... خلاص أتركني لا تسأل وأنا برجع عقب أشهر
وقلت له مو علي تكذب أعرفك تضعف قبالي ... تكلم قول شو الموضوع بدأ قلبي يدق أكثر
سكت لحظة وقال أرجوك أبعد عني يالغالي ... وخلني أذكرك بالخير وأنت مثلي أتذكر
ولا أطرش مسج واحد ولا أدق لي أبد تالي ... وإذا لي خاطر عندك لا تتكلم أبد سكر
وقلت له والله ما أكسر إلين تقول وتصفالي ... وقالي والله ما أتكلم ولو تبكي دمع أحمر
ولكن شوف ربعك وأنت تعرف بس وش جالي ... خلاص أفهمها عالطاير ولا تحرجني بعد أكثر
وسكر والدمع فيني على الخدين همالي ... قسم بالله ما أدري علامه قلبه أتحجر
فؤادي أنهار وأنا حملي يهد جبال وجبالي ... في لحظة صارت الدنيا في عيني هالكبر وأصغر
حسافة ما توقعته يصدق فيني عذالي ... حسافة ما هقيته يوم يصد عني ويتغير
بعدها صار لي ما صار وربي يعلم بحالي ... فؤادي باقي بس شوي وأحسه من الجسم يظهر
بديت أعرق ما أدري ليش خابت كل آمالي ... أنا أتوقعت كل الناس ولا أتوقعت هو ينكر
وقلت بخاطري خله مصيره يرجع الغالي ... أكيد إنه سمع أي شي وجوه صار متعكر
ولكن طول غيابه وزادت فيني إعلالي ... مرض قلبي وتعب فكري وأحسه جسمي متخدر
وقلت خلني أطرش له مسج وأشكي له أحوالي ... وطرشت المسج وشوي دق لي ودون ما أفكر
هلا والله يا أغلى الناس هلا والله بالغالي ... ألو طارق ما قلت لك لا تذكرني أو أذكر
أبي بس أذكرك بالخير ياخي خلني في حالي ... وقلت وخاطري مكسور أنا آسف وما أكرر
قسم بالله إلين اليوم وحالي يرثي لحالي ... قسم بالله إلين اليوم ولا أدري ليش هو تغير
قسم بالله ما غضت عيوني ولا هدى بالي ... قسم بالله ما مر يوم إلا وفيه أنا أفكر
قسم بالله قلت بنساه بس طيفه يتهيالي ... قسم بالله لو حاولت أنا أنساه أتذكر
إلين اليوم أنا عندي أمل يرجع ويصفالي ... أقول الشوق بيرده على فرقاي ما يقدر
إلين اليوم وضحكاته وبسماته على بالي ... إلين اليوم ما أرقد كثر ما فيه أنا أفكر
أبى أعرف شو السبب أرجوك وش اللي بس يجرالي ... أنا شسويت يا ربي عشان تثور وتتفجر
أنا والله ما أستاهل أبد كل اللي يجرالي ... أقل ما فيها بس قلي سبب خلاك تتغير
أبى أعرف بس شو الموضوع علامك صرت ما تبالي ... إبذمت كل أهلك فـ يوم شفتني بشي أما مقصر
أنا راح أنتظر ردك ولو حتى بمسج خالي ... وإذا ما جاني منك الرد وغلاتك عندي راح أصبر
سنه سنتين اللي يهم أشوفك ثاني إقبالي ... ثلاث سنين أو أربع أبصبر يعني راح أصبر
ولكن حكم إحساسك وجاوب يا أغلى كل غالي ... إبذمت والديك يهون تنساني ولا تذكر
يهون إنك تخليني ولا تسأل ولا تبالي ... يهون إنك تنام الليل وتتركني أنا أسهر
كفايه صار لك شهرين غايب عني يالغالي ... كفايه يا أعز الناس ترى والله ما أقدر
دخيلك لا تخيب فيك هقواتي وآمالي ... وإذا إنها عالصبر والله وغلاتك عندي راح أصبر
ابي تعليقاتكم..
تحياتي الاميره الناعسه
