شكرا اختي بنت بلادي على الطرح الجميل.
واللي تكلمتي فيه صحيح وما عليه اي اعتراض ، فعلاً وايد بنات منحرجين يتواصلوا مع المشرفات عسب تترقى للذهبية.
الاسباب وايد ، أهمها أن المشاركات ما يحبون حد يعرف هويتهم ، وهذا اللي شفناها ولاحظناه ، بعكس الشباب اللي يتواصلوا
معانا ويعطونوا هويتهم بكل سهولة.
بعدين لا تنسي اسهل طريقة للعضوية الذهبية هو انج تسجلي عن طريق ايميل رسمي (يعني نفس الاسم اللي يتم فيه دفع الفاتورة في اتصالات)
سواء عن الشامل او الديل آب، مثال
name@emirates.net.ae ، ووايد اعضاء مسجلين عن طريقه وع طول تم ترقيتهم للذهبية.
تحدثتي عن سهولة الحصول على بيانات الشخص عن طريق الاي بي ، لكن مثل ما تكلم بن خلف عن قصة صاحب الموقع اللي
جته مشاركة من خارج الدولة ، نزلت وما طولت ، وقامت الادارة بمسحها ع طول ، ولكن لانها تمس جهة حكومية ذات سلطة
تنفيذية ، وصلت المشكلة للقضاء ، ما بندخل في تفاصيلها بس في النهاية ، صاحبنا تورط ووصلت القضية إلى حدود غير متوقعه أبداً.
وليس ببعيد مشكلة إحدى المواقع الشقيقة (مجان) اللي نسأل الله لصاحبنا أن يفرج همه بأسرع وقت ، لازالت القضايا تتوالى عليه
في المحكمة ، حد جاب اللي كتبوا المواضيع؟ لا ما لهم إلا في صاحب الموقع اللي يعتبر المسؤول أمام القضاء عما حصل، وهنا
عندي سؤال مشروع : هل اللي تسببوا في المشكلة وقفوا معاه او دخلوا معاه الحبس، حتى لو تضامناً فقط ؟؟؟
بعدين مو بس المسألة في الجوانب السياسية ، المسألة حتى فيها الدخول في اعراض اشخاص والتشهير فيهم ،
واحنا نبرأ منها أمام الله سبحانه وتعالى.
وفيه جانب آخر وهو ان شركة استضافة الموقع شركة رسمية في الدولة ، مو مثل باقي المنتديات اللي تاخذ شركات استضافة غير رسمية،
والشركة اللي حاجزين عن طريقها ، أي مشكلة حتى لو خطأ بسيط في المشاركات ، ما راح تتردد في اغلاق الموقع بشكل نهائي ، وقبل ايام
كنا في اجتماع معاهم ، وأكدوا علينا هاي المسألة.
عموما: احنا ما عندنا مشكلة في الترقية ، وهي بسيطة جداً وما تاخذ وقت طويل ، بس تواصلي مع المشرفات ، وهم ما بيسألوج حتى
انتي مين ومن وين ، كل اللي بيطلبوه منج انتج بس تتواصلي معاهم ، وتشاركي بمشاركات راح يحددوها لج ، ومن ثم ان شاء الله
بتكون الترقية.
وبعض النظر عن الفرق بين العضوية اللذهبية والفضية ، تراها المشاركات الفضية ما تاخذ الا دقائق ع طول نوافق عليها ، وفي أسوأ الحالات
بالكثير ان شاء الله ما تطول عن 6 ساعات، هذي في أسوأ الحالات ، وحتى تاريخ (كتابة الرد) ممكن تروحي للصفحة الرئيسية بالمنتدى ،
وشوفي مين أكثر الاعضاء مشاركة؟ 2 منهم عضويتهم فضية.
بالفعل الطريقة صعبة ، لكن حاولنا جاهدين لتسهيل الأمر بس في النهاية (مصلحة الموقع) فوق كل اعتبار، بعدين اي زائر او ضيف
للموقع يقدر يقرا كل المشاركات وينسخها بسهوووولة مو لازم يشترك (هدفنا مو بس تسجيل ارقام كبيرة في عدد الاعضاء) وع فكرة المنتدى مفتوح من شهر ونصف فقط ، ونقدر لكل من
شارك حبه للموقع ، بس اكيد اللي يحب لازم يضحي ، واعيد واكرر مسألتها بسيطة وما فيها اي مشاكل.
اكيد طولت في الموضوع ، وهذي مو من عادتي ، بس للتوضيح اختي الفاضلة ، لانج تتكلمي باللي في خاطر الكثيرين، وحبيت اوضح بشكل موسع.
ملاحظة:في اي طريقة اخرى يمكن الاخوة الاعضاء يفيدونا فيها بالتأكيد ما بنتأخر فيها وراح نقوله مشكوووووور ، لا وبعد بنسمي الطريقة باسمه، شو اكثر من جيه.
