مركز رعايه الوالدين بالرمس

انا عضوه جديده وهذي اول مشاركاتي اتمنى انكم تساعدوني في تحقيق هذا الحلم
انا اعمل في وزاره الصحه تمريض كان في مؤتمر عن رعايه المسنين في البحرين حضرته
خلال الزياره كان في جوله ميدانيه الى مركز دار يوكو لرعايه الوالدين خليني اكلمكم عن هذا المركز النهاري
المركز يتكون من اداره وقسم للرجال وقسم للنسا وهو مركز اهلي من تبرعات اهالي المنطقه والعاملين فيه معضمهم متطوعين بالاضافه الى خريجات الثانويه العامه
المركز يشمل كبار السن المتقاعدين واللي عندهم اعاقه او مشكله اجتماعيه
في قسم الرجال قعده سوالف وتلفزيون يعرض فيديو عن الماضي و غرفه ثانيه اسمها غرفه الطرب الاصيل فيها الات موسيقيه للعزف والطرب القديم وغرفه مشتركه تعليم محو الاميه والكمبيوتر بشكل مبسط كراسي وطاولات ولوح للكتابه
قسم النسا قعده للسوالف والضحك وغرفه للمشغولات اليدويه يتعلمون على الفخار والخوص وشغلات من لا شي تكون شي رهيب والمطبخ يوفرون لهم المقادير ويطبخون احلى الاكلات مع وجود مشرفه تغذيه تحدد السعرات الحراريه وتوجد في المركز ممرضه تعمل على اشراف على صحه المشتركين في المركز من خلال فحص دوري وتحويل حالات للمستشفى او مركز الصحي اذا لزم
يقوم المركز بعده انشطه:
بيع المشغولات اليدويه عن طريق المعارض وتوزع ريع المعرض على العاملين في المشغولات
عمل اوبريت غنائي
رحلات للحج والعمره
رحلات ترفيهيه للبحر
زيارات الاماكن التراثيه والمتاحف

بالنسبه للمتطوعين توجد لهم دورات تدريبيه بكيفيه التعامل مع الوالدين والبحث عن الابداع

هذه نبذه بسيطه عن المشروع ترى هو مو تابع لجهه وزاريه هو كله من تبرعات اهل الخير اتمنى مثل هذا الحلم يتحقق عندنا بالرمس يا مكثر المتقاعدين في البيوت الي من الملل والضيج صارت عندهم امراض الضغط والسكري ومشاكل اجتماعيه لو اشغلوا وقت فراغهم بشي مفيد
اتمنى اراءكم ومساعدتكم لانجاح المشروع الخيري هذا
الايد الواحده ما تصفق

اقتراح جميل ... ويستاهلون اباءنا وامهاتنا كل الخير .....

ياريت لو يتنفذ .. والله يعطيج العافيه دمعة الرمس

شكرا اختي على الاقتراح الجميل وونتمنى من ادارة المنتدى فتح ساحة خاصة بالمشروع تجمع فيه التبرعات عن طريق حساب خاص و وتبادل المقترحات والفكر وتنسيق فريق العمل المتطوع وذلك طبعا تحت قيادة الاخت دمعة الرمس ونرجو من الله القيام بمخاطبة الحكومة المحلية لتوفير قطعة الارض الخاصة بالمشروع أو توفيرها من أحد أهل الخير وهم كثر والحمد لله في الرمس أو عن طريق شرائها من فلوس التبرعات ودمتم على خير

اختى مشكورة على نقل الافكار والاصرار على تطبيقها بشكل يناسب المجتمع ... وياريت لو سالتى لو فية مراكز تنمية او جمعيات ثراثية تهتم بهذى الفئة بس ما عندهم على حسب معلوماتى ... ونحن والحمد الله توجد مراكز للنساء وهي مراكز التنمية وايضا الجمعية المراء النسائية حاليا اسمها مركز تنمية الاسرة (سابق جمعية نهضة المراء الضبيانية) وجمعيات للرجال تحفظ التراث من الاندثار مثل (جمعية التجديف).. وايضا الحين فى الصيف توجد مراكز صيفية وفيها جميع الاعمار ...وعملها نفس مركز رعاية الوالدين.

تسلمون والله على الرد بالنسبه لموضوع مراكز التنميه الاجتماعيه ما تقصر بس مشكلتها ما تختص بهذه الفئه العمريه فقط وانما جميع المراحل العمريه من المراهقه لكبار السن بس انا مشروعي اطمح فيه للتخصص بس محتاجه دعم والله ولا المشروع خيري وناجح بحيل الله وباسم الرمس الحبيبه اللي القريب والبعيد يشهد بان الناس الي فيها اخير ناس اذا والله بجديه احد من التجار تبنى المشروع انا مستعده بكل طاقتي اعمل معاكم بس كل اللي محتاجينه ممول للمشروع وفريق عمل والمتطوعين من الخريجات اللي جالسين في البيت يا مكثرهم ومعظمهم كفاءات ونضرب عصفورين بحجر نحسن الصحه النفسيه لكبار السن المتقاعدين عن طريق تواصلهم مع بعض ونستغل وقت فراغ الشباب باساليب نافعه علشا ما يضبعوا وزيدوني بردودكم النيره

تسلمين اختي دمعة الرمس ع الموضوع المفيد والله يعطيج الف الف عافية .. من خلال تقديم شي يجمع المصلحة العامة .. واعتقد ان لو تكتف الجميع لخدمة هذا المشروع ... بيكون من انجح المشاريع على مستوى الامارة .. وعلى مستوى الدولة .. لان هذه الفئة محتاجه لمن يراعيها ويخفف عنها اوجاع الماضي و اوجاع العصر الحديث ..

وهم يكنزون من الخبرة الواسعه في الحياة .. واعتقد انه المنتدى عنده خبرة في مثل هذه المجالات ... وانتي من خلاله وصل صوتج ولكن يتبقى من المسؤولين اتخاذ اللازم في حالة تم موافقتهم على هذا المشروع ..

"" لج خالص الاحترام والتقدير .. اختي دمعه الرمس .. ""

انا زعلانه انه هذي اول مشاركه لي وطلعت اللي بقلبي كله واخر شي انصدمت كاتبين على موضوعي منقول من وين منقول الله يسامحكم والله كسرتوا قلبي

اقتراح حلوووووووووووو


نحن قاعدين ما ورانا شي ، بنبادر وياكم

اختي قصدهم منقول لقسم ثاني عشان الاعضاء يحصلونه لانج حطيتيه في القسم الغلط وكلمة منقول اختصار

لنقل الاعضاء للموضوع في قسمه اليديد ,, بالنسبه للاقتراح جميل جدا نتمنى يكون الكل متعاون بخصوص هالشي

اقتباس:

---

المشاركة الأصلية كتبت بواسطة دمعه الرمس

انا زعلانه انه هذي اول مشاركه لي وطلعت اللي بقلبي كله واخر شي انصدمت كاتبين على موضوعي منقول من وين منقول الله يسامحكم والله كسرتوا قلبي

---

دمعة الرمس ..

الموضوع نقل من غرفة اخبار الرمس ....وغرفة الرمس فقط لاخبار المنطقه والمستجدات ..

و موضوعج هو اقتراح وهذه الغرفه مخصصه لمثل هالمواضيع ..

شاكرين لج مشاركتج .. ولا تحطين بخاطرج ..

ان شاء الله نشوف تفاعلج اكثر ولا تيأسين

مع التحيه