انا اشهد انه موضوع فنان وكنت ناوية اطرح موضوع مماثل لكن الصياغة خانتني وما شاء الله عليك كفيت ووفيت وبخصوص القصة الي طرحتها تراها مب بس عند فلان من الناس ,وانما وااااااااااايد هالسالفة مستوية من قبل ولا زالت مستمرة للأسف,يصبح هالشخص ميت بعد فقدانه للحبيب ,وللأسف صار هالشي معاي شخصياً ولشخص ما صار بيني وبينه نصيب وانجلب حاله مره وحدة وانا ادريبه شخص زين وما عليه كلام وما عنده من هالخرابيط بس مشكلة هالفئة من الناس انهم ما يؤمنون بشي اسمه قضاء وقدر وانه كل شي فهالدنيا نصيب و انه رب العالمين جانه كاتب شي تراه بيصير بيصير غصباً عن الكل مب ابكيف هالشخص,حسسوني بالذنب وكأني انا السبب فالحال الي هو عليه الحينه!!!!,ولا زلت ألقى دعاوي من هالشخص لين اليوم وباجر من جذا احس اني مب متوفقة فحياتي :(بس الحمدلله عكل حال
- ما رأيك بشارب الموت أي بشارب الخمر؟
ما بقول مثل الباجين,,وانما شخص محتاج لكمن جلسة علاج نفسية ,,هو شخص مسكين ومحتاج للي يسمعه ويوقف معاه مب يؤنبه ويلومه على الي سواه ,,وهالشي ما يمنع انه يذكره بكمن آية قرآنية وجزاء من يسوي الشي عند الله
- ما هي الصفات التي تتوقعها فيه؟
اكيد بيتصرف بلا وعي ,,بس من يصحى بيرد لشخصيته الاساسية
- هل ازدياد النوادي الليلية ساعد في انتشار الخمر؟
اكيد وحسبي الله عليهم احينه ما اتلاقي بقعة فراس الخيمة ما تخلى من هالمنكر
- هل تعتقد أن مناهج وزاره التربية والتعليم لا تفي بالمشاكل التي نواجهها من أضرار الخمر؟
اكيد لا تفي ,,لأن مناهجنا اقتصرت فقط على حكم الخمر وشربه ما سردت لنا قصص وعبر اتخلي الطالب يتعظ ولا يفكر يلجأ لمثل هالعادة في انه يحل اموره
- هل التربية المنزلية لها دور كبير في ابتعاد الفرد عن الخمر؟
اكيد وحتى رفجة الاصحاب والخلان لها دور ,,للأسف بمجرد ما يطيح فوحل الخمر يبتعدون عنه ويتركونه مايدرون انه فهالوقت هو محتاجنهم,,هالناس يبون الي يحتويهم مثل ما قلت ما يبون حد يغثهم ويقولهم لألأ
- هل صادفت موقف حيث أن احد أقربائك أو أصدقائك قام بشرب الخمر؟
هيه وااااااايد مب بس مع هالخاطب,واكتشفت انهم ناس طيبييييييييييييييييييين لأبعد الحدود وقلوبهم بيضة ماشي ابيض عنها ومب مثل الشباب العاديين الي اتلاقيهم ما يشربون وقد انهم يصلون بس يغازلون ويرقمون بنات الناس وبعضهم يزنون!!! بس هاييلا الي يشربون بالعكس,,, اتحسهم ابعاد عن هالامور وما يدانون الناس الي يسوون جذا فنظرهم انه الي يسوي جذا واحد خفيف وما عنده سالفة(شفت كيف انه تفكيرهم نظيف ؟؟!!!),,بعض من الي عرفتهم منهم الي قال انا ابوي يشرب ومنهم الي قال محد امسويلي سالفة فالبيت والي يقول امي وابوي مطلقين ولحد سائل فيني ,,صادفت وايد ناس
- ماذا كان تصرفك؟
للأسف الوقت ما اسعفني وياهم,,ولا تراني اييهم بالحسنى والكلمة الطيبه وربي انهم يسمعون وفبعض الاحيان يصيحون لا حسوا انه هالشخص الي يرمسهم يفهمهم ويتم يعدد محاسنهم الي اتناسوها بسبب ام الخبائث,,ليتني كنت وياهم لوقت اطول جان قدرت اغيرهم واكسب فيهم اجر واطلعهم من الي هم فيه
- هل نصحته؟
بالكلمة الحلوة والمعاملة الطيبة هيه
- إذا لم يسمع النصيحة ما الإجراء الذي اتخذته أو سوف تتخذه لو كان لك مثل ذلك الصديق؟
اتبع اسلوب التخويف من الله مرة واسلوب تعديد المحاسن وسرد ذكريات الماضي الحلوة وانه ماخربها غير هالمنكر وارد اقوله ترى الناس بيرمسون عن اهلك.. ما بيقولون فلان فيه بيقولون اكيد ابوه جذا ولا امه حرمة مب زينة واذكره انه هالشي بيؤثر على سمعة اهله كلهم وانه هالشي ممكن يخرب نصيب حد بسبب تصرفاته بس ارد اخف عن هالاسلوب لمن احسه بدى يتنرفز
- نصيحة تقدمها لشاربي الخمر أقصد شاربي الموت؟
كل يلي ذكرته فوق ,,اذكره بعاقبة هالشي وجزاؤه عند الله كيف ,,اقوله ترى الدنيا بعدها بخير وانه اذا رب العالمين خذ عنه مب معناته نهاية الدنيا ومب معناته انا ربي كارهني ,,ربي خذ عنه شي و بيعطيه شي ثاني احسن واخيرله وووبس ها مختصر كلامي
