((عجيب غريب)) مسلسل كوميدي يسيء الى رأس الخيمة واهاليها

بصراحه هو في نوع من الاستهزاء

بس يمكن ما يقصدون


وفي شي من واقعنا ...... وفي شي صار له سنين وماله وجود الحين ..

مسلسل غير ناجح

السلام عليكم ورحمة الله وبركاته

مع الاسف ما شفت المسلسل ولكن اعتقد انه يهدف لمغزى آخر ....
وهدف بعيد انتوا ما فاهمينه ........
فعلى سبيل المثال حاير طاير ..........

للأسف حاير طاير مع جل إحترامي له كمسلسل يهدف الا إظهار مشاكل الشعب و معاناتهم , ونقد الواقع ,,فقد" زودها حبتين " في نقده لأصحاب النفوذ و إظهارهم بمظاهر غير لائقه إعلامياً.....

نعم نحن ندرك بأن هذا هو الواقع ولم يأتوا بشيءٍ من خارج إطار الواقع ..ولكن ما هكذا كانت تورد الإبل ...
:
فإذ صدق الخبر , فليعلموا أنهم بالغوا في التركيز على ذوي النفوذ , الذين تتمحور حولهم غالبيه الحلقات . فصدقاً من يرضى على نفسه ذلك !!؟!؟!؟!؟
وبحق من يرضاها على نفسه .[ حتى الأعور , لا يرضى بأن يشار إليه و يقال له : أنت أعور ]
:
نحن لا نريد بأن يصبح الهدف من البرنامج هو التشهير أكثر مما يكون تجسيد للواقع حال و إيصال فكره معنيه لا يستطيع الشاارع العام إيصالها بالفم المليان ...
:
حاير طاير يدور و يعود لنفس المحور , طيب وبعدين ..فلا ينتظروا بأن يتم زفهم زفة العريس على الشاشه قصدي الكوشه http://www.uaeec.com/vb/images/smilies/biggrin.gif .
فكم من كاتب وهو كاتب لعامود , قد حوسب على ما كتب هو حقيقه!!
فما بالكم بمن يصور و يمثل َّ!
:
وان شاالله وصلت المعلومه .......
فديت راس الخيمه فديت راس الخمه فديت راس الخيمه ......
وتقبلوا مرووووووري ..........

[align=center]
احمـ احمـ


ارجوٍِِ الهدؤٍِء صغ ـيرٍِوٍِن مفترٍِ بيتكلمـ في ثآني مشآرٍِكهـ لهـ~



ليش سكتوـآ خخخ



بصراحهه انا اشوف المسلسل ما اطوف حلقه والمسلسل كوميدي وحلوو ولكن على العومهـ و.. و.. و.. هذا عاداتنا وتقاليدنا ما تدل على الفقر


اخوكمـ


صغ ـيرٍِوٍِن مفترٍِ



والسمؤحهـ~
[/align]

إلي مايعرف راس الخيمه ززين مايقعد يرمس ع كيفه
وخاصه ظبيانيه وافتخر

انا الصراحه جفت الحلقه وطايحين في راك ... حتى اليوم اسمع اختي ترمس عن السالفه اتقول شو هذيلا الحين شو الناس بياخذون فكره عنا ,, ع الاقل اهل اللبلاد يعرفون بس اللي برع شو بيقولون ..

يا أخي الناس تبغي تفرفش بس مب قصدهم الغلط لو يعرفون انه جذي بيستوي والله ما مثلو اصلا



شكرا على اهتمامك براس الخيمه

ليش زعلانين يا اهالي راس الخيمة ؟؟

المسلسل عباره عن مسلسل يطرح مشاكل في مجتمعنا في اطار كوميدي رائع

بسم الله الرحمن الرحيم


الموضوع سمعت عنه انه انطرح فالاذاعه وثار جدل المستمعين و وايد طلعوا فيه حجج

اولا

انا اشوف انه هالمسلسل انه انجح مسلسل اماراتي لهذا العام مثل ما السنه اللي طافت حظ يا نصيب خذ حقه

انا اشوف انه هذا المسلسل جد جد ناجح

وخاصه اول رمضان كنا عالفطور نتناقش انا وخواني وخواتي .. وكانوا حاطين خوصه بوصه

قال خويه انا مستغرب دولة الامارات ما فيها الا دبي !! ليش ناسين هل راس الخيمه والفجيرة وغيرها من المناطق !

وكانت وجهة نظره صحيحه ..

بس بصراحه استانسنا يوم شفنا هالمسلسل

بصراحه مسلسل واقعي 1000000000000000%


1- اليدة ضبابه : توضح رمسة امهاتنا ويداتنا رمسة الاوليين من بدو وحضر الرمسه وحده بس الحين يقولون هاييل رمستهم غير وهاييل غير بس قبل من هل بحر وهل بر يستخدمون نفس المسطلحات مع اختلاف بسيط فاللكنه وهي تصحح الاخطاء اللي يطيحون فيها جيل اليوم وتبين العادات وتغرس الهويه الوطنيه بصوره كوميديه ما تثير الملل والحساسية

2- غريب و زوجته : ام واب متذبذبين بين الاصاله والتحضر ورمستهم اخف شوي من رمسة العيوز فالمصطلحات والمعاني الجميلة للهجتنا الغالية .. ويمثلون شعب الامارات اللي عاش بداية الاتحاد والعصر الذهبي . وتراه فالمسلسل سموه الغش هب من فراغ


3- البنات: يبينون جيل هاليومين والرمسه (المخبقه) اللي ما ينعرف الها اصل من فصل والمصطلحات اللي هابين فيها بنات هاليومين وغياب الهويه الوطنيه ويحاولون يثيرون مشاكل هالجيل وغياب بعض الاهالي عن هالمشاكل
ومنها ( السماح لهم وبحريه فصخ الشيله والعباه فالسفر ) ولكن فالمسلسل بينوا انه هالشي غلط .. اضافة الى انه هالجيل المفروض يتعلم السنع يعني بالمختصر ( مضيعات المذهب) وهالشي واضح فمواقف وايده وثايرين هالقضايا باطار كوميدي يوصل للقلب .. ويحبب الناس بالمسلسل ويعرفون شو اللي يصير

4- سهيل وعبيد : هذيل الثنينه يبينون العفويه والطيبه وحسن النوايا الموجوده فاهالي راس الخيمه واللي هم محافظين على الاصاله وعلى سجيتهم يعني الاوليين عندهم الضيف ضيف وفي اي وقت وزمان ومكان وهالشي ما شاء الله للحين موجود بين اهالي راس الخيمه في اغلب المناطق وهذا هب معناته انه ما عندهم مذهب بس يوضحون انهم يتصرفون على سجيتهم وعاداتهم الحميدة بالمقابل غريب اللي عايش عيشة المدينة الكبيرة صار عندهم التقاطع بين الناس ويشوفون انه هالزيارات مالها داعي الا فالمناسبات الرسمية ومنها ( صلة الرحم!!) وهالشي اللي نعاني منه الحين ..
وبالنسبة لسالفة انهم خذوا البيزات يبينون انه اهالي راس الخيمة كسبهم قليل بالنسبه للامارات الثانيه ولهم بوش وهوش وانتوا بكرامه وغيره يسترزقون منه وشي ناس ما عندهم واللي يطلب منهم حايه يخدمونه بعيونهم هب معناته انهم لحوف لكنهم على قد حالهم .. وهالشي قالوه فالمسلسل : نحن نخدمك بعيونا بس تعرف نحن على قد حالنا..
وفالبرنامج الاذاعي اثاروا سالفة الطبول: اونه ليش هل راس الخيمة هل طبول..!!!!!!!
واللي قال هالكلام رمس من جهل تاااااام .. في راس الخيمة في كل منطقة تقريبا شي جمعيه للفنون الشعبية
جمعية رأس الخيمة - جمعية بن ماجد - جمعية الجزيرة الحمراء - جمعية الرمس - جمعية الشحوح - جمعية شمل
وغيرها وغيرها وغيرها
وبالعكس هم اثاروا فن العياله وانا هالحلقه وايد عيبتني لاني اموت عالعياله اللي اندثرت هالايام وبالعكس احس انها فرحه من الخاطر عكس الحربيه اللي دخلوا عليها الموسيقى وصارت في كل مكان واستحدثوا عليها اشياء هب من عاداتنا وتقاليدنا وخلوا باقي المجتمعات يضحكون علينا .. وانا ما اعيب عالفرق الحربيه كلها لكن في الكثير منها محافظه عالاصاله ..العياله والاهال والونه هذا شي من تراثنا ونعتز فيه ويمثل هويتنا ويوم المصري قال المعلايه عصبوا عليه وقالوا له استح هاي اسمها عياله .. يعني افهموا نحن ما نشجع هالفن الهابط اللي انتشر على انه تراثنا ! نحن نحيي العياله وفي قصايد وايده يشلوبها واشعار راقيه تنطرب لها الاذان .. والطبل يسمونه الراس والطار يسمونه السماع وهالشي وضحوه فالحلقه وهب كل حد يعرف هالشي .. والتخامير وغيره وغيره
و موسى البقيشي الممثل ابوه كان مدير جمعية راس الخيمة للفنون الشعبية وبعد ما توفى الله يرحمه عمه جمعة ماسك الجمعية وبين حال هالفن في الوقت الحالي ..
ويوم يقولون انهم يطنزون عليهم هاي هب طنازه يبينون انه ذوي البشره السمراء او السوداء اللي الناس طايحين يسبونهم وامصخريبهم ( الخوال) هم قلوب بيضاء نقيه يحبون الضحك والسوالف وقعداتهم ما تنمل واللي يصير فالمجتمع حاليا من تفرقه عنصريه ماله دخل فدينا وعاداتنا كلنا سواسيه .. ولعل هذيل السمر حبهم للخير اخير من غيرهم .. وهالشي واضح فالمسلسل وهم اختاروا ممثلين من راس الخيمة ومن عوايل معروفه بالبشاشه والروح الطيبه والبساطه .. هب عشان يمصخرونهم .. وعن سالفة تعلقهم بالدبش هذا واقع فاغلب مناطق راس الخيمه عند كل بيت زرب هوش وهالشي يزيدنا عزه وحب للتراث ويربونهم هب على انهم حيوانات تكون في علاقه رحمه ورفق بالحيوان
وعن سالفة العومه انه اهل راس الخيمة محافظين على العادات واكل اهل البلاد هب برجر هوت دوغ ..

( لا تاخونها على انها مسبه والله حرام عليكم على كل شي بتعصبون .. ما يسوا عليكم .. بهالطريقه انتوا تبينون انه
اهل راس الخيمة متخلفين السموحه على هالكلام لانه وايد مواقف تصير وبرامج تنحط وتعليق على كل حد
ليش انتوا ماخذينها بحساسية؟؟)

5- عباس وقوليه: يمثلون شريحة العيم في مجتمع الامارات وهذا واقع هم ما سبوهم هاي رمستهم وصوغه اصلا عيميه مدري بلوشيه وعباس ولد عرب بس اخوه فالمسلسل اللي بدور رضا هالممثل بعد عيمي وهو اللي كان يعلم مرعي (عباس) رمستهم عشان ما يغلط بها .. ويبينون انه للحين هاي رمستهم الا قليل منهم ما يرمسون وانه عيالهم يرمسون عادي والمتمثله ب محمود .. وانهم عيال البلاد يشتغلون ويفيدون هالبلاد والممثل بدور محمود بعد عيمي يعني هم لو شافو انه شي طنازه عليهم ما بيرضون .. وعن سالفة المذهب : الاعلام عشان يوضح المشكله لازم يضخمها وهذا شي مشروع اعلاميا .. هم صوروها باطار كوميدي خفيف وبصوره وبامور بسيطه بس الواقع اكبر من جذيه .. العيم اخوانا وربوا بينا وهم بنوا هالبلاد وعايشين فيها ومالهم بلاد غيرها .. وهاي بلادهم ..
بس الكلام المكسر اصبح له تأثير على الجيل القادم من عيال الامارات وبدوا يتناقلون المصطلحات وهذا واقع ما ينزعل منه .. وفي حلقة القنوات الفضائية اتصور انه كان المغزى منها هذا الشي .. وانه فالنهايه الكل صار يرمس فارسي !! والمسلسل يدعوهم انهم يتعمقون فرمستنا المحلية اكثر عشان تعم الفايدة للجميع وهذا واقع محد يزعل منه ..
وفالمسلسل بينوا شي حلو انه محمود بيتزوج ميره وغريب فالبدايه قال لا قالت له حرمته ما يستوي من ترضون دينه وخلقه فزوجوه وعقب رد وقالها المشكله هالنعره اللي فينا .. وبين انه هاي مشكلة مجتمعنا انه الوحده ما ترضا الا بالقبيلي والعكس العيميه تبا عيمي والعيمي يبا عيميه مع انه نحن مجتمع واحد وكلنا مسلمين .. وهالنقطه كانت خطوه حلوه .. انه عادي بنت العرب تاخذ عيمي والعكس كلنا عيال حوا وادم وبالذات يوم بينوا انه هب لازم محمود ياخذ زبيديه ..


6- زوج بنتهم راعي كلباء : القصد من وجوده هب الضحك على رمسته .. انه الشروق عايشين ويانا فهالبلاد وعيالها ويكافحون وبنوها والدليل انه هو من كلباء ويداوم ف حبشان .. وبعد يقولون لبنات هالايام تزوجي الريال الصالح اللي يقدر الحياة الزوجية من اي مكان فالدولة وشي بنات الله يهداهن الحين .. انا من دبي وهذا من راس الخيمه ما اباه امارته بعيده انا من بوظبي وهذا من كلباء ما اباه بنحبس فمنطقه ما فيها مولات ولا وناسه .. وهذا واقع .. والمسلسل يدعي لازالة هاي الفوارق ..

7- الدكتور يبا يكسب لقمة العيش باي طريقه وهب معناته انه لحف عالبيزات .. بس هذا واقع بعض العيادات الخاصه.. وبالنسبه لمسألة انه اييهم بالروب .. هالشي عادي فبلاده ويبين انه بعض الوافدين ما يحترمون عادات البلد اللي هم فيها هب عمدا ولكن جهلا بعادات البلد وقلة التوعيه للي يدخلون البلاد وهني نقزه حق اللي نشوفه فالمولات من الاجانب ..وعن البواب يوضح حال الفقراء اللي ايون يترزقون هنيه وما يعطونهم رواتب تسدهم ويدفعونهم للشي الغلط .. ويبين ايضا جشع بعض اصحاب العمارات وقوانينهم اللي تطفش اللي يسكن عندهم

8- البدوي سيران: ماشاء الله عيبتني شخصيته يبينون الكرم والشهامة وحب اداء الواجب حتى في أصعب الظروف
وفالحلقة 11 اثاروا مشكلتين

الاولى: الاهالي ايودون بناتهم عن الزواج بحجة الدراسة والهالشي غلط من وجهة نظري .. البنت تقدر تكمل دراستها وحتى وهي متزوجه بس لكبرت بتييب عيال على كبر كيف بينفعونها بعدين .. الجيل الاول عيالهم انفعوهم لكن اتيك وحده عمرها 40 و ولدها عمره 10 سنوات !!! هذا كيف بينفعها لكبرت !! وتأخير الزواج يقلل فرص الانجاب وهالشي يأثر عالتركيبه السكانيه ومجتمع الامارات بحاجه للمواطنين بدال ما هو يالس يجنس من شرق وغرب ..

الثانية: مسـألة رفض الاهالي للريال اللي عنده زوجه اولى .. الاصل فالزواج التعدد واذا الريال واضحه اسبابه للزواج
مثلا ما عنده عيال او مشكله ثانيه و زوجته راضيه .. الاهل ليش يرفضونه .. الشرع حلل هالشي المجتمع ليش يحرمه ..

وفالنهايه تم زواج البنت الصغيرة من الريال اللي عنده حرمه ثانيه .. ^__^ واحس انهم اثاروا مشكله حقيقه لأول مره في الاعلام الاماراتي


انا اشوف انه المسلسل ناجح جدا وعفيه عليهم ..

وهاي وجهة نظري والسموحه على الاطالة

اختكم في الله

بنت راس الخيمة
الوسنى

المفرووض المسلسل يمنع يمنع يمنع من العرض

المسأله واضحه هم يسيؤون لأهل راس الخيمه يعني لها الدرجه تخلف

تم تعديل الرد

اقتباس:

---

-

( لا تاخونها على انها مسبه والله حرام عليكم على كل شي بتعصبون .. ما يسوا عليكم .. بهالطريقه انتوا تبينون انه
اهل راس الخيمة متخلفين السموحه على هالكلام لانه وايد مواقف تصير وبرامج تنحط وتعليق على كل حد
ليش انتوا ماخذينها بحساسية؟؟)

---

اختي مشكوره ع تعليقج وتفسيرج للشخصيتين عبيد وسهيل

ولكن حلقه اليوم وضحت كل شي ومن هم المقصودين الي يتمصخرون عليهم افااااا والله الحين اهالي الي يسكنون باليباال يعني ما عندهم خير وعمرهم ما شافوه وع علمج ترى العياله مب تراث اهالي اليبال
صح انها من تراثنا لكن تراث اهالي اليبال الا هم الشحوح والحبوس طال عمرج الندبه
والروااح والرزيف وغيرها من التراث الي تشتهر فيه هاي القباائل
وياليت حلقه وحده بس يوضح باننا مب شافيين خير
الا حلقتين ما وقفت عند العومه بس لا ويوم يشربون العصير وجنهم مب عمرهم ماا شربوا عصير
حتى لبس يدل ع اننا من الغجر وما نفهم شي
ما ادري شو قصدهم بانه مسلسل كوميدي هل المقصود فيه ان عاداتنا وتقاليدنا هي المضحكه

او عسب اننا ما زلنا محافظين ع العاداتنا وتقاليدنا

اذا المؤلف اماراتي وللاسف ما يعرف شي عن اهالي راس الخيمه فقط الف القصه ع كلام ناس
بدون ما يشووف او يحضر راس الخيمه ويشوف عاداتنا وتقاليدنا زين ما زين ما يالف ويخربط علينا
ترا هاي القناه مب قناه الامارات فقط الكل يشوفها يعني قناه فضاائيه
الي ما يعرف عادات راس الخيمه الحين بيفهم وبياخذ الفكره اننا غجريين وما نفهم شي
وما شايفين خير وانناا ............ الخ
حسب ما يوضح المسلسل التي ما زالت في جعبه المؤلف


والسموحه اختي احنا مب متخلفين ولكن كلمه الحق هي الي تزعل لكن مستحيل حد يضحك ع العاداته وتقاليده الي يضحك هو المتخلف ع رمستج

والمعذره منكم وياليت نكتب رساله للمختصين بهاي الشاان

والله خسااره مواطنين ويتمصخرون ع اهااليهم وربي حراام ليش جيه بدل ما يطلعون بلادهم وتراثهم
راح يتمصخرون عليهم واذا شفنا الممثل الي يمثل في حلقه حنه ورنه الا هو ريل حلوم
شوفوا الفرق هني والفرق في مسلسل عجيب وغريب رغم ان المسلسل يرمس عن الماضي
يعني تكون ثياابه نفس الي بحلقه غريب وعجيب ولكن في هاي المسلسل ريال متبهدل ودفش
حتى الزرار ما يسكرها والله قهرررررررررر

قبل عبدالله بالخير يتمصخر علينا والحين المسلسل والله مب حاله
والباجين يقولوا لا هب يتمصخرون الا هو مسلسل كوميدي
عشنا وشفنا كوميدي ع تراثنا بالمصخره

بسم الله الرحمن الرحيم ...

انا ويا الاخت غزال الشمالي

مشكلة الواحد يوم يحب يتفلسف و آخر شي يغلط ...

رأس الخيمة هي الإمارة الوحيدة اللي تحس فيها انه الوطن

الحقيقي صح و الأصالة اللي محتفظين فيها ...حتى الشيخ

زايد الله يرحمه قال هالكلام ...

و ظبيانيه و افتخر مادام ما تعرفين شي ما يحتاي يعني

تغلطين انتي آخر وحده تتكلمين ....

الحمدلله حنا عايشين في أحسن عيشه ... و الفقر

في كل إمارة يعني ليش بالذات راس خيمة ما ادري؟؟؟؟؟؟؟؟؟

كلـــــــمة أخيرة : جذور راس الخيمة هي الأصل و السموحه



الغزالة :sm102:

اقتباس:

---

لكن تراث اهالي اليبال الا هم الشحوح والحبوس طال عمرج الندبه

---

والظهورين

ما اعرف انا عيبتنى ها الحلقه

وما شفت فيها شي يمس امارة راس الخيمه

هلا اخواني انا اتابع هذا المسلسل وااايد ايبون طاري راس الخميه

وهاي كل الحلقات موجوده على الموقع الرسمي للتلفزيون دبي

http://vod.dmi.ae/mediamanager/

اساءه واضحه

والسموحه

وانا معاكم فيه اسائه للامارة راس الخيمه ونحن مانرضى وحتى لو كان بطابع فكاهي ما يوصل للجيه .,,

ماعليكم منهم لاتهتمون ف رمستهم المهم انكم واثقين من اعماركم وهذا اهم شي واهل راس الخيمه كلنا انحبهم بس في ناس مايحبونا ونحن مب مسوين شي والله يهديهم

ماعليكم منهم ولاتهتمون فرمستهم اهم شي انكم واثقين من اعماركم وكلنا انحب اهل راس الخيمه بس في ناس مايحبونا ونحن مب مسوين شي والله يهديهم

لا والله بالعكس المسلسل وايد حلو ومافيها شي


انت فاهم السالفه غلط يمكن ؟؟؟

اممممم احس عادي

مافيها شي

الشي الحلوو اللي ف المسلسل عباس و حرمته و ضبابه

و اللي قالوه عن راس الخيمه غلط ف غلط
راس الخيمه الاماراه الوحيده اللي لا زالت محتفظه بعادتها وتقاليدها و ناسها عايشين بخير ونعمه و اللي شفته ف ها المسلسل الصراحه شي غلط , ونحن واثقين من نفسنا بس اللي يشاهد ها المسلسل شو راح يقول خصوصآ انه يعرض على قناه دبي الا هي القناه اللي الكل يتابعها من دول العالم وعن طريقها يعرف اللي صاير ف الامارات , شو راح تاخذ الناس فكره عن راس الخيمه , ليش ينقلوا فكره غلط عن راس الخيمه مب نحن ف دوله الامارات يعني دوله وحده ,
كل دوله فيها الفقير و الغني بس هم ف المسلسل سلطوا الضؤ على الفقر و دفاشه و ان اهل راس الخيمه غجر الصراحه ها الشي مب حلو بحقنا نحن والا ف حق دوله الامارات , اتمنى من المسؤلين انهم يتخذوا الاجراءات اللازمه و اعاده السمعه الطيبه لراس الخيمه واهلها
وما عاش من يغلط على راس الخيمه و على اهلها
وكلنا اهل و اخوه و الكل يعرف الثاني و الراوبط الاجتماعيه اقوى من اي اماره ثانيه

والسموحه

الصراحه المسلسل حلو وبعدين يا جماعه الخير هم ما يقصدوووووون كل اهل راس الخيمه انهم دفشين ومتخلفين ولا ولا ولا هم يقصدون فئه من الناس جيه يعني نحن اهل دبي ما عندنا ناس يتميزون بالدفاشه ولا التخلف
ولا بعد البلوش الله يهديهم هني في دبي سمعت انهم اشتكو فالبث المباشر على قولي حليلها
والله انها تونس حداحدا

يا جماعه الخير اذا تمينا ننتقد كل شي جان حياتنا كلها نكد في نكد

حدا حدا
السمووووووووووووووووووووووووووووووحه

مايخصه والله

المسلسل جدا رائع لا يسئ ولا شي ولو شفت بعض الحلقات يقولون ان اهل راس الخيمه هم اللي متمسكين بعداتهم وتقاليدهم يعني نفخر في هالشي

السلام عليكم

بالعكس المسلسل جميل جدأ ويلامس واقع موجود منذ زمن ولا يزال موجود حتى اليوم .. أعتقد ان البعض ياخذ الامور بعصبيه .. خصوصا .. مثلما قال البعض .. بانها اسائه .. لم ارى اسائه ابدأ لاهالي راس الخيمه من خلال هذا المسلسل ولكني ارى .. انهم محافظين لعاداتهم وتقاليدهم حتى اليوم ...

بالنسبه للهجه .. محد يقدر ينكر . هذا .. :sm167:

المسلسل فيه بعض الحلقات الحلوة
وهو مسلسل كوميدي
وانا شخصيا ً أتابعه

ولكن

الممثلان (سهيل وعبيد)
(وهما من رأس الخيمة)

أعتقد أساؤوا لأهل رأس الخيمة بظهورهم بهذه الملابس
ملابس رثة
غير مكواية
الأزرار مفتوحة

وخاصة كندورة واحد فيهم لونها برتقالي

يعني هم يبينون للناس بأن أهل رأس الخيمة غجر ومش مطورين
وأهل رأس الخيمة عايشين بين الحيوانات وهذي حياتهم
وخاصة يوم شرب العصير كأنه في حياته ما شرب ولا شاف شيء اسمه عصير

من حق أهل راس الخيمة يزعلون

محد يحس بالجرح غير رأس الخيمة وأهلها

أكيد ما كانوا يقصدون الإساءة
ولكن
هذا اللي حصل

والمسامح كريم

هو المسلسل سااعااات يغلطوون فيه على اهل راس الخيمه وسااعااات يمدحوونهم


يعني نص نص ...!!

هذا رايي انا شفته بس يعني صدق ( سهيل وعبيد ) ملعوزين اعماارهم ،،

1ـ الكندوره
2- الازراار المفتووحه ،، الـــــخ....

والمدح :

1- الطيبه
2- الكرم الــخ ،،



وظبيانيه كلامج غلط في غلط ،، مادامج ما تعرفين بس سامعه لا تتكلمين


والسموووحهـ

ما عندكم سالفة

حراام مو لهااي درجة تقولونه
أحس المسلسل وااايد حلوووووووووووووووووو
ما أخلي حلقة ما أتابعة صرااحة مشوق و كوميدي
وبعد ما طلع غير حلقيتين عن سهيل وعبيد

انتو من كل شي تتحسسون مسلسل حلو وجميل ...
كبروووو نظرتكم للمسلسل ولا تتخيلون اشياء وتوهمون الناس باشياء محد قالها والقصد منه انتو بروحكم شوفو واحكمو
استغفر الله
يسلموووو ع وجهت نظرك وكل انسان له راي

اقتباس:

---

المشاركة الأصلية كتبت بواسطة غزال الشماالي

اختي مشكوره ع تعليقج وتفسيرج للشخصيتين عبيد وسهيل

ولكن حلقه اليوم وضحت كل شي ومن هم المقصودين الي يتمصخرون عليهم افااااا والله الحين اهالي الي يسكنون باليباال يعني ما عندهم خير وعمرهم ما شافوه وع علمج ترى العياله مب تراث اهالي اليبال
صح انها من تراثنا لكن تراث اهالي اليبال الا هم الشحوح والحبوس طال عمرج الندبه
والروااح والرزيف وغيرها من التراث الي تشتهر فيه هاي القباائل
وياليت حلقه وحده بس يوضح باننا مب شافيين خير
الا حلقتين ما وقفت عند العومه بس لا ويوم يشربون العصير وجنهم مب عمرهم ماا شربوا عصير
حتى لبس يدل ع اننا من الغجر وما نفهم شي
ما ادري شو قصدهم بانه مسلسل كوميدي هل المقصود فيه ان عاداتنا وتقاليدنا هي المضحكه

او عسب اننا ما زلنا محافظين ع العاداتنا وتقاليدنا

اذا المؤلف اماراتي وللاسف ما يعرف شي عن اهالي راس الخيمه فقط الف القصه ع كلام ناس
بدون ما يشووف او يحضر راس الخيمه ويشوف عاداتنا وتقاليدنا زين ما زين ما يالف ويخربط علينا
ترا هاي القناه مب قناه الامارات فقط الكل يشوفها يعني قناه فضاائيه
الي ما يعرف عادات راس الخيمه الحين بيفهم وبياخذ الفكره اننا غجريين وما نفهم شي
وما شايفين خير وانناا ............ الخ
حسب ما يوضح المسلسل التي ما زالت في جعبه المؤلف


والسموحه اختي احنا مب متخلفين ولكن كلمه الحق هي الي تزعل لكن مستحيل حد يضحك ع العاداته وتقاليده الي يضحك هو المتخلف ع رمستج

والمعذره منكم وياليت نكتب رساله للمختصين بهاي الشاان

والله خسااره مواطنين ويتمصخرون ع اهااليهم وربي حراام ليش جيه بدل ما يطلعون بلادهم وتراثهم
راح يتمصخرون عليهم واذا شفنا الممثل الي يمثل في حلقه حنه ورنه الا هو ريل حلوم
شوفوا الفرق هني والفرق في مسلسل عجيب وغريب رغم ان المسلسل يرمس عن الماضي
يعني تكون ثياابه نفس الي بحلقه غريب وعجيب ولكن في هاي المسلسل ريال متبهدل ودفش
حتى الزرار ما يسكرها والله قهرررررررررر

قبل عبدالله بالخير يتمصخر علينا والحين المسلسل والله مب حاله
والباجين يقولوا لا هب يتمصخرون الا هو مسلسل كوميدي
عشنا وشفنا كوميدي ع تراثنا بالمصخره

---

مشكوره اختي الكريمه على الرد

بالنسبه لتوضيحج انه اهل اليبال فنهم الندبه وغيرها ها شي معروف ومحد نكره
طبعا فالمسلسل ما بيرمسون عن شريحه شريحه فمجتمع راس الخيمه
هم اثاروها بالمجمل العالم .. اولا بالنسبه للرمسه فهم يرمسون رمسة الناس اللي ساكنين
وسط راس الخيمة وعندنا غيرها من اللهجات
ثاني شي قالوا انهم سكان اليبال عشان يوضحون انه بعد عندنا ناس في المناطق الجبيله
ثالث شي لبسهم يمثل شريحه من الفقرا اللي كسبهم قوت يومهم واتصور انه هالشي هب عيب
رابع شي محد قال هذا تراث وهذا هو الواقع وماشي غيره بالنسبه للفن الشعبي اللي اثاروه
معروف انه فن اهل البحر ..

و وايد شرايح عندنا فراس الخيمة وما انكر وجود نفس اشكالهم عندنا صح نحن عندنا خير ونعمه
والحمدلله شايفين الخير بس بعد عندنا ناس هذي حياتهم.. وهالشي موجود في كل مكان
وهاييل بشر سواء كانوا غجر والا غيره ونحن ما نستعر منهم .

ليش اهل دبي ما حسسوا ؟؟ وما زعلوا؟؟
على سبيل المثال
غريب انسان يحاول يواكب التطور ومافيه مذهب وما عنده اصول فالحشمه والكرامه
يعني يوم ايونه ناس يروغهم .. البنات شكلهن ملفت .. والولد (احمد) لين ورمسته مالها خص بالرجوله

هل ها معناه انه اهل دبي مافيهم مذهب وشبابهم تنقصهم الرجوله ؟!!

وبالنسبه لكلمة تخلف

محد اتهمكم بالتخلف ولكن تسليط الضوء على نقطه وحده هذا الشي اللي يسمى بالسلبية

واثق الخطوة يمشي ملكا
اذا جاءتك مذمة من ناقص فهذه شهادة منه بأنك كامل

يعني بالعربي الفصيح نحن هب زعلانين ولا شي ولا نطالب بتوقيف المسلسل لانه كل حد فالمسلسل
يبين في شخصيه السلبي والايجابي .. سواء اهل دبي والا راس الخيمه والا كلباء والا الفجيره والا حتى البدوي ..

نحن ما بنتم نحسس عالفاضي المليان نحن نعرف عمارنا مثل ما الناس يعرفونا
ومنو يتابع في كل العالم !! اغلب اللي يتابعون خليجيين والحين سمعة راس الخيمه اشهر من نار على علم والحمدلله معروفين بالجود والكرم والاصاله ما نتريا مسلسل يعبر عنا ..
هذا اعلام والشي المباح فيه اللي هو التهويل لايصال الفكره للمشاهد
وكاتب المسلسل جمال سالم يعتبر افضل كاتب اماراتي واللي هو نفسه كاتب مسلسل حاير طاير
وعلى جرأة مسلسل حاير طاير محد رمس مع انه كان ينغز ويمس شرائح وايده فالمجتمع المحلي
ومحد زعل!

المسلسل فكرته هو التوعيه بمشاكل المجتمع بالمجمل العام في اطار كوميدي خفيف و المسلسل قبل ما ينعرض يمر على الرقابه التلفزيونيه

احب اضيف
اللي يتابعون مسلسل دروب المطايا بيشوفون انه فيه انه الرمسه هب عدله وانه فيه اشياء ماصارت والا استوت عندنا وتعتبر منقووووووود في عاداتنا وتقاليدنا
هل هذا معناته انه هذا تراثنا !!؟؟ وهالمسلسل يتكلم عن تراث البدو والحضر في الامارات والمسلسل يعرض على تلفزيون العاصمه .. يعني بعد كل العالم يشوفونه ..

ومثال ثاني ..

بالنسبه للمسلسلات الكويتيه اللي تصور البنات العاريات والميك اب واللبس الفاضح والاشكال اللي اعوذ بالله منها وانه لازم في كل مسلسل انه هم اهل شركات وخير وما اعرف شو ..
هل هذا معناته انهم جيه ؟؟ انا بصراحه اللي شفته فالكويت وفالمولات تحديدا انه تقريبا كل البنات محجبات ولا قصص ولا كشش والسفر منهن عددهن اقل من القليل

المسلسلات القطريه
تصور دايما الفقر والبهدله والجبروت واللي تستوي طقاقه والبخيل والسكير العربيد زهالشي يتكرر في كل المسلسلات .. مع انه الواقع عندهم انه نسبة الفقرا قليله هب شرات الامارات والسعوديه والكويت
والموظف القطري يعتبر اغنى موظف خليجي ..
هل ازعلوا من هالشي؟؟!!

ليش نحن نستهين بعمارنا ونزعل من اعلام وشاشه وناس تمثل !!
نحن كمجتمع متحضر عندنا وعي بواقعنا وما نتريا تقييم من حد
ومثل ما ذكرت مسبقا واثق الخطوة يمشي ملكا × واللي على راسه بطحه يحسس عليها
يعني يا 1 يا 2

وارد واقول المسلسل عادي حاله حال غيره وبالعكس فيه اشياء حلوه وتقيمي الخاص انه هالمسلسل
اعتبره افضل مسلسل اماراتي لهذا العالم ^__^

عالعموم السموحه عالاطاله

واختلاف الراي لا يفسد للود قضيه

المسلسل ماياب شي يديد
مشكلة الناس ماتحب الصراحة
الرجاء النظر بواقعية للموضوع

انا ارشح مسلسل (((((((((((((((((((((((((((((((((((((((((((((((((((((عجيب غريب)))))))))))))))))))))))))))))))))))))))))))))))))))))))))))) )))))))))))

شكلكم نسيتو زوجة أحمد شو قالت له

و غريب ليش معصب من أحمد ؟
لانه ما يقعد وياه ف دبي

ايي راس الخيمة



على شو يدل هالكلآم ؟؟؟

و بعدين أي بلاد هاي اللي مافيها فقارى ؟؟؟؟؟؟؟؟



ع الاقل راك تحس انك مواطن
مب ف دبي
هندي يتمصخر علييك ولا زلمه يغلط علييه

مع احترامي للكل


و السموووحة

مسلسل رائع وما عليه غبار و العيال حبه اكثر من شعبية الكرتون

أعتقد الموضوع أخذ حيز كثيرا ومن خلال قرأتي للردود أرى النصف مؤيد والأخر غير مؤيد ومعنى ذلك بأن كل عمل لا يخلو من السلبيات ، وهنا أحب أن أشير إلى كل من تعصب على العمل بإنة يسئ إلى أهالي رأس الخيمة نعذرهم جميعا وأن دل على شي فأنة يدل على الحب الكبير الذي يكنونة إلى رأس الخيمة الحبيبة .

انا ما أقدر أقول شي لا أني ما تابعت ولا حلقه
بس أحس ان كبرتوا السالفه
يمكن في شي زين وشين

لا اتكبرون المسائل بارك الله فيكم كلنا من دوله وحدة ....
وكل اماره فيها ناس غنية وشبعانة وناس فقيرة ومحد داري بحالتها......
لا اتخلون ابليس يضحك علينا ونحن قاعدين نحط بهذا ونمدح بهذا.....
والسموووووووووووووحة بالنهاية

شكرا عــ الخبر

اقتباس:

---

المشاركة الأصلية كتبت بواسطة !! الــعــنــيــد !!

هندي يتمصخر علييك ولا زلمه يغلط علييه

مع احترامي للكل


و السموووحة

---

وهذا اللي حاصل
على آخر حياتنا وفي بلادنا يجيك زلمة يتمصخر ويتكبر عليك
أعتقد نسوا المثل اللي يقول
إذا أكرمت الكريم ملكته وإذا أكرمت اللئيم تمردا
يحقدون علينا وكأننا نحن اللي عايشين في بلادهم مش هم
مع احترامي للمحترم منهم

المسلسل جميل ويعطيهم العافية