ما الذي يقصده محمد سعيد حارب من حلقة (هيه يا بلادي) في مسلسل فريج؟؟؟!!!!

السلام عليكم ورحمة الله
خواتي سبب كتابتي للموضوع اليوم وهو اني من خلال متابعتي لمسلسل فريج وعلى مدى حلقاته المكررة في هذا العام

اكتشفت انه محمد سعيد حارب قد اوقع نفسه في مشكلات اجتماعية وسياسية ومنها دينية للأسف واستغرب انه الاغلبية العظمى عندما انتقدت تلك الحلقة بشكل خااص بأمر واحد فقط
وتغاضت عن امور اهم واشد الصراحة بالنسبالي

اكيد الكل عرف بسالفة الاعتذار الي قدمه محمد سعيد لسكان امارة رأس الخيمة

وتم تعديل الحلقة من يديد بسبب انه وجه اهانة شديدة في حق الامارة كونه استهزئ بمدى العمران والحركة السياحية والمعالم الرائجة في امارتنا ,,معنه راس الخيمة تتمع وتتميز بكثير من الانشطة السياحية منها البرية والبحرية والجوية !!!!

ونشكره على هذا التعديل الي يانا في وقت متأخر ^____^معني استغرب كيف رقابة التيلفزوون مرت عليها هالحلقة بشكل عادي بدون اي تعديل!!!!!!

خلوونا فالامر الاهم والادهى والامر يلي الكل طنشه وانا استغرب كيف انه الكل ما لاحظه!!!!
وهو لمن يا السااايح صوب حوض السمج وكان يبا يصور الحووض ويته الفلبينية على عجل و قالت له لألأ ممنوع تصوير الحريم !!!!

بعدها قربوا الصووورة

والا هم فالنهاية بطاااريق؟؟!!!!!!!

فيا ترى شو الي يقصده محمد من ورى هالحركة؟؟؟

يعيب على الخوات الي يلبسن الحجاب الشرعي؟؟!!!!!

هل عبااة الرااس على الحرمة اتخليها شرات البطريق وهي تمشي؟؟!!!!

ولا الحرمة ما اتكون حرمة الا اذا اتبرجت وطلعت سااافره!!!
يمكن الكل غض الطرف عنها
الا انه نحن لازم ما نسكت

لأن هالامر يمس الدين قبل ما يمس العادات والتقاليد

ومووول مب حلوة الحركة من صووب محمد فهالحلقة
اتمنى اتردوون اتشوفون الحلقة وتتأكدون بنفسكم اذا كان كلامي فيه تبلي على محمد او غيره...

أنا شفت هاللقطه بسس صدفه
الله يكون في العون

وعليكم السلام ورحمه الله وبركاته ..

بصراحه انا مب متابعيين هالمسلسلات مب لأنها اقل جوده
ولكن ماعندي وقت اتابعها وللامانه بس اشحفان جفت ..

باختصار وصلت وايد برودكاست عتاب وتحريض لهذي الحلقه ..
الي خلت البعض يتنرفز بشكل غير طبيعي وبالاخص جنوني ..

مع اني جفت المقطع وحاولت الاحظ هالنقطه ولكن عدت بسلام ..

الي قعدت افكر فييه شي غريب وما وصلت لإجابته ..

يعني انتو ليش متنرفزين لهذي الدرجه هاا ؟؟

الكل يدري ان راس الخيمه اتطورت ببنيانها وحضارتها ولكن هذا ما غير
على عاداتها وتقاليدها واخلاقها وهذا اهم شي الواحد يحافظ عليه ..
بس لو حط شوارعنا العمرانيه جان الكل قاام وصفق وثنى عليه بعد ..

مب يعني الواحد غلط او خانه التعبير او ما كانت عنده خلفيه بالأصح
تتهجمون عليه بكلام سئ وما يوصل لمستوى اي عاقل ..

كيف البعض يقول انه المسلسل فاشل وانه الريال قاعد يخسر فيه بيزات ع الفاضي
مع انه وصل كم جزء والكل كان ومازال يمدح هالعمل الكرتوني ..!!
ولا تنسون كلامكم الي يتردد ادعمووا الشاب الإماراتي ..

كل هذا تنسونه بزله بسيطه ..

ليش اتخلون عقلكم محدود ونحنا البشر مميزين فيه عن كل المخلوقات ؟؟
ليش تتطالعون النقطه السودا من المحتوى كله ..؟؟
ليش تحبون تخلقون المشاكل من لاشي .؟؟

مع ان الريال اعتذر عن الحلقه بس مازال البعض يكرر هالزله كأنها شي مقدس ( استغفر الله )

ومثل هذي المسلسلااات اتوقع انها تنعرض بشكل فكااهي وجميل ,,
واليهال والشباب وحتى عيايزنا يحبونها ويتريوون وقتها .. !!
فماله داعي للحساسيه هذي ..

انا اعتقد انه لو كل واحد بيقعد وبيزعل من الشي الي بينعرض جان طارق العلي قعد بيته ..!

اسمحي لي اختيه يمكن ظهرت من صلب الموضوع الي تتمنين حط يشاركج فيه ..
لكن انا واقرا البيسيات كان بخااطري هالرمسه وكتبتهاا اهنيه .. !!

والسموحه منج .. !

اتمنى اتردين تقرين الموضوع اختي عقب اتعقبين

لأن كلامي شي وردج شي ثاني!!!

ولا كان هذا صلب الموضوع؟؟!!!!


ردج كان جديم ,,ولو هو فعلاً ما حس بالغلط جان ما رد اعاد صياغة الحلقة حبيبتي


كل همي من هالطرح ويلي انتي غفلتي عنه

هو المساس بالدين الاسلااامي ولباس المرأة المسلمة!!!!


نحن من سعى وراااء تطريش البرودكستات عن هاذي الحلقة

والاكثرية غفلت عن موضوع العبااااة وركزوا عموضوع السياحة فرأس الخيمة ,,,

أنا شفت الحلقه هاذي واستغربت صراحه يعني أغلب الامهات في الامارات يلبسون عباة الرأس معناته أنهم بطاريق صراحه مسلسل فريج قبل كان حلو اما الحين لا تعليق

هيييه والله صدقج يا ام محمد

مادري شيااه هالمحمد ..

يتطمز عاللي يلبسوون عبآة الراس .. ويشبههم بالبطآريق

يعني هو اكيد كل لقطه مسوينهـ لهآ شي ..

يعنيـ هالحلقه لو يمحيهآ احسن ..

مبـ عشان مال آخر شي مال رأس الخيمه

عشان مال عبيـ الرااس بعد

أم محمد من راك

انا وياج 100% في صحة كلامج

ولا تعليق أكثر

و الله يكون بالعون يا أختي

ماعرف لو ماأدلي بدلوي .. أنا هالمسلسل بالذات ماأستظرفه وأشوف كل الفكاهه فيه باهته ومصطنعه .. ويمكن نعم بالموسم الأول كان متميز كونه عمل اماراتي خالص وأفكار غير مسبوقه .. واعتمد على موضوع الإبهار لكن شيأً فشيأً فقد بريقه وتلاشى من ثاني موسم .. ولو لا دعم الشركات والشيوخ حفظهم الله لكن ذهب ادراج الرياح .. والسبب .. النمطيه وعدم التجديد والإعتماد على الرأي الأوحد .. لذا تجد كاتب السيناريو والمؤلف والقصه والمخرج وال وال .. شخص واحد .. إذاً رؤيه واحده وخلفيات ثقافيه ودينيه ومجتمعيه واحده وأسلوب واحد .. ولك أن تكمل .. فمابالك إن كل ذلك لشاب لم يتجاوز الأربعين من العمر .. وقضى جل وقته للدراسه في الخارج .. فإن اجتمعت كل هذي الأمور فأي نص تنتظر في خدمة السياسه المجتمعيه وإيجاد الحلول للمشاكل فيها وأي فكره ممكن أن تتبلور غير أسلوب التهريج وانتزاع الضحكات بالقوه ..

أما أنا بصراحه .. فماروم أيلس حذال التلفزيون وهذا المسلسل يشتغل .. صوت أم خماس ينرفزني وأحس بحجه بينبي أتقول يربان .. عطول أعفد عالريموت وبنده .. أحس صاحبنا اللي يمثل أم خماس اول مايخلص دوره سيده لوز وبلاعيم .. الله يعينه ..

ام محمد اشكرج شكر خاص ع الموضوع وكلامج والله عين الصواب بس محمد سعيد حارب ماعارف نفسه
والاميره الناعسه
تدافع عن محمد سعيد كنه معتذر لها وانا اول مره اسمع انه معتذر لهاي الذرجه عايبنج فريج ابصراحه مسلسل بنسبه لي فاشل ومافالح الا يطنز
واتمني يا الاميره الناعسه تكتبين رد محترم وموثوق ولاتطلعين اشاعات من عندج

وعليكم السلام ورحمه الله وبركاته

في البدايه اشكرج اختي ع طرح الموضوع

واوافقج الراي وحبيت اوصله رساله " مهما اتطورنا بنتم نحن ك مواطنين نعتز بحشمتنا وعاداتنا وتقاليدنا "

انا خير شر ما اتباع هالكرتون وبعدين ليش طايحين بالريال اللي اعرفه الكرتون حق الصغاريه كل ما سوا عمل طحتو فيه شوفوا المسلسلات اللي تعرض تطلع اشياء العن عن المراه وعن حجابها وهذا في النهايه كرتون ولازم في اخطاء بسيطه الانسان مب كامل الكمال لله وحده

[align=center]الشكـر موصول للأخـت أم محمد على الطرح المتميز والغيره التي تتملكها

مع إحترامي لمحبي ومتابعين هالمسلسل إلا انه سطحي وملل وفاشل

يعتمد في اساسه صراخ ام خمــاس

لا نقبل الإهانه على الحشمه والحياء اللي تتميز فيه نساء مجتمعنا

والتشبيه اللي ظهر بالمسلسل شي معيب والله وخصه من شخص كونه إماراتي
[/align]

الله يكون في العون

ليش حنا دائما نركز على النقطه السوداء في الجدار الابيض
أعتقد وايد عاطين الموضوع أكبر عن حجمه
ودرتوا المسلسلات الخليجيه مثل بنات الثانوية وكريمة وبعض البرامج وغيرها من المسلسلات الهابطه
قعدتوا تعلقون على الكرتون ..

افيقوا من جهلكم وكبروا عقولكموخلكم أكبر من هالسوالف

السلام عليكم ...
حمدالله ع سلامتج ياختي ام محمد راك فتره طويله ماشفنا مشاركاتك... نورتينا
امممم اسمحولي ع كل كلمه اكتبه ... بس حسيت في لف ودوران من بعض الرود ... راس الخيمه ع عيني وراسي ... بس نحن شايفين الحاله من الشوارع والمباني المهجوره وبعض الانظمه ال....... و وو و
اللف والدوران في الموضوع اذا نزلنا موضوع ع اماره راس الخيمه الكل بينتقد مابيسكت الشوارع المكسره المباني المهجوره وووووو وبيكون بنفس من الاعضاء الي ردوا عن المخرج محمد سعيد حارب ...ويامااااا كتبنا انتقداتنا عن امارتنا في المنتديات او ع البلاك بيري وصار اللي مايعرف يعرف ويتفرج صح ولا لاء ؟
واذا نزل موضوع عن حادث الكل ينتقد الشارع والشارع واذا موضوع فشل عمليه في احدى مستشفيات راس الخيمه ننتقد ونقول فاشلين ومستشفى فلان في اماره فلان اروع المستشفيات واذا كتبنا عن المدارس نفس الانتقاد ... واذا واذا واذا
المخرج محمد مب الوحيد اللي انتقد وبس حتى من اهل راس الخيمه الي عاش وتربى فيه انتقد اذا طلع من راس الخيمه لاماره اخرى والامارت اخرى نفس الانتقاد ولا كانا من ضمن الامارات السبع ....
انا ماادافع عن المخرج انااكتب الحقيقيه ومهما قالو وانتقدو عن راس الخيمه يكفي اهلها وناسها من اطيبهم وان شاء الله تتطور اكثر واكثر ونسكت حلوقهم

اقتباس:

---

صوت أم خماس ينرفزني وأحس بحجه بينبي أتقول يربان

---

ههههههههههههه

الله المستعاان

وااا أسفي بس على بعض الردوود


كيف تعتبرونها زلة؟؟!!! ولا نقطة سوودة؟؟!!!


صحيح الكمال لله بس هاذي مب زلة هينة؟؟؟ولا غلط انروم نسكت عنه!!!!

اذا المواطن الاماراتي المسلم هو بنفسه مادافع عن دينه وعاداته وتقاليده وظهرها بالشكل الصح والمرموق والي يليق

بمستوى الدولة المسلمة الي ظاهر منها منووو بيشل هالمسؤوولية؟؟!!!!!


ومسلسل فريج مثل ما الكل يعرف انه يحاكي واقعنا الاماراتي بنوع فكاهي ساخر ولكن حذاري حذاااري والبعد كل البعد عن المساس بالدين والحشمة ووقار المرأة المسلمة!!!!


كيف يعني زلة؟؟!!!

كيف يعني نقطة سووده؟؟!!!!


اذا اتجاهلنا الحينه عن نقطة مثل هاذي ويلي انتوا يا اخوان تعتبرونها زلة ومب من اي شخص (من مواطن اماراتي مسلم) تربى على القيم والعادات والتقاليد


باجر بتتجاهلوون امووور الله العالم شو هي ,,جان ما تنخسف فينا الارض بسبب اخلاقنا وسكوتنا عن المنكر وتأييده


عيل ما ينلامون الاجانب يوم انهم بيغلطووون فالبلاد بلبسهم وحركاتهم

تراهم كفااار ومب عارفين عن دينكم شي ولا عن عاداتكم وتقاليدكم؟؟!!!


هذا مواطن وجي سوى


مابالكم بالغريب!!!!


ماقول غير الله يهديكم ويفتح امخوخكم هاذي وينورها ويريها الحق حقاً والباطل باطلاً

يا أختي أم محمد حتى لو تكلمنا من اليوم لين مليون سنة فأعتقد ما شيء فايدة
العتب كل العتب على إعلامنا اللي يعطي لأشكال ولد حارب وغيره إنهم يغلطون على رأس الخيمة

إمارتنا شامخة كالجبال ولا تهزنا شعره لا من ولد حارب ولا من مليون حارب

ولكن يكفيه ما حصل له من كلام والدليل إنه اعتذر لأبناء رأس الخيمة وقام وعدل في الحلقة اللي غلط فيها علينا والتلفزيون بث الحلقة مرة أخرى مع التعديل لأني شفت الحلقة أمس وكانت مختلفة عن الحلقة اللي انعرضت في المرة الأولى لأنه حذف المقطع اللي يسيء لإمارة رأس الخيمة


إذا عن السلبيات فكل إمارة فيها الصالح والطالح
ليش ذكر الأشياء الحلوة في كل الإمارات إلا إمارة رأس الخيمة ذكر الحيوانات البرية والجبال يعني رأس الخيمة ما فيها غير الجبال والحيوانات

وإذا عن الكوميديا فأعتقد الكوميديا عمرها ما اعتمدت على الاستهزاء والسخرية بالوطن

ولد حارب ما أساء فقط لرأس الخيمة بل أساء للإمارات كلها
لأن رأس الخيمة جزأ لا يتجزأ من الإمارات العربية المتحدة

وأتمنى من ولد حارب مرة ثانية يقدم أسلوب راقي بعيد عن السخرية والاستهزاء بالناس


أما عن البطريق والبطاريق فأعتقد هاي إساءة أكبر من إساءته لأولى
يشبه المسلمات العفيفيات بالبطريق
ما أقول غير
حسبي الله ونعم الوكيل لكل من أساء للدين والوطن



وأقول لولد حارب شو تسمي اللي يقلدون أصوات وحركات الحريم ويتشبهون بالحريم أمثال
أم خماس وأم سلوم والثالثة ما أدري شو اسمها

كان الأحرى بك تعالج مشكلة الجنس الثالث
اللي في مسلسلك

سلامي

إخواني …. خواتي

قال تعالى: { ولا يغتب بعضكم بعضاً أيحب أحدكم أن يأكل لحم أخيه ميتاً فكرهتموه واتقوا الله إن الله تواب رحيم} [الحجرات:12]

بسم الله الرحمن الرحيم

{وَيْلٌ لِكُلِّ هُمَزَةٍ لُمَزَةٍ(1)الَّذِي جَمَعَ مَالا وَعَدَّدَهُ(2)يَحْسَبُ أَنَّ مَالَهُ أَخْلَدَهُ(3)كَلا لَيُنْبَذَنَّ فِي الْحُطَمَةِ(4)وَمَا أَدْرَاكَ مَا الْحُطَمَةُ(5)نَارُ اللَّهِ الْمُوقَدَةُ(6)الَّتِي تَطَّلِعُ عَلَى الأَفْئِدَةِ(7)إِنَّهَا عَلَيْهِمْ مُوصَدَةٌ(8)فِي عَمَدٍ مُمَدَّدَةٍ(9)}

الغيبة لغة: من الغَيْب "وهو كل ما غاب عنك" , وسميت الغيبة بذلك لغياب المذكور حين ذكره الآخرون.

اللي في خاطره كلمه أو انتقاد على محمد حارب يتصل فيه ويكلمه أو يتصل التلفزيون بس تتكلمون من وراءه وهو ما يعرف منو ينتقده اعتقد انها غيبه وإحنا في شهر فيضل سواء في رمضان اوغيره

اممممممممممممممم
الصراااحه شفت حلقات فريج ومثل ما قالت اختنا كان الموسم الاول احلى بوااااايد من ها الموسم
ها المسلسل حلووو وفكاهي وكل حد يحبه من صغير او كبير
بس اتفاجأت من ها الموضوووع !!!!!!!!!!!!!
شو ها انا افتخر بعاداتنا وتقاليدنا وافتخر ببلادي !!
انا شفت الحلقات احسه ما يبالها ها المشاااكل كلها اشششوها اشوووها
من راااي ان محمد سعيد حااارب ما قصده يطنز على الحريم بس انتو الحريم تحبون تسببون المشاكل ........للاسف
يا ما شفت اشيااء ومشااكل والحريم هم السبب انا ما ادافع عن محمد بس انتم تبون المشااكل ......... الله يهديكم

اختي الكريمة

أنا عندي اقتراح انج تدخلين على صفحته على موقع التويتر وتحطين ملاحظتك بكل موضوعية والأخ ليجاوب على ملاحظتك

وانا اؤيد اخوي "الفجر الصادق"

وين الغلط
حرام تتهجمون عللا الريال بداعي انه يقصد المتحجبات
الريال ما قصر وناقش ضايا وطنيه والان يدور نقاش مشكله العنوسه في الامارات
التي وصلت الى اكثر من 200 الف عانسه في الدوله

انا من رايي انه عادي يعني هو ماتمادى

ويوم بيغلط تراه بيغلط عـ بلاده وماظن هو يرضاها انما هو افكاره خلصت

وماحصل شي ويمكن قصده شي ثاني وانا ماسمعت انه مصرح بهذا الشي انه يقصد العبيي عـ الراس ..

وكل واحد له وجهه نظر .. >

شكرا عـ الطرح

السلام عليكم .
أولا استانست واايد لما قريت موضوعج اختي مراايم
عساج ع القوة ومن طول الغيبات ياب الغنايم ..
وبخصوص الموضوع أنا مااتابعت حلقات فريج السنه بس وصلني
برودكاست ع البي بي .. والكل كان معصب ومب راضي عن هالشي ..
ما احب أصدع راسي بهالاشياء وايد ..
وتسلمين غلايه ع الطرح .

الله اكبر؟؟!!!!

انا فوادي والناس فواادي


اي شوارع وسوء تخطيط ترمسوون عنه!!!

الكل ماسك اغلاط الامارة ,, لو فعلاً انتوا تقروون كلامي عدل وشايفين الحلقة جان ما كان هذا ردكم من جذا نوهت للي ما شاف الحلقة انه يدخل ويشووفها قبل لا يحكم

محمد في هاكِ اللقطة الي قلتوا عنها عادية وماله داعي يعتذر عنها..تراه بين فيها اهم معالم كل امارة من بوظبي لي اقصى الفجيرة عدى راس الخيمة طلع فيها تيووس وصحرا!!! ومن بعدها حط صورة اعلانات الثلج الي عشارع الامارات,,معنه المدينة الثلجية صارت واااقع مب خيااال,,اذا كنتوا تطروون انها عادية!!!!


اما انا فما كان هذا مبتغاي من الطرح كم مرة بقوول وبردد !!!!!

شو هالتفكير السطحي الي عليكم!!!!

كل همي المساس بالدين ويلّي انتوا عادي عندكم صار الاستهزاء فيه

اي دعاء ترتجوونه من ربكم فكل صلاة من تراويح وقيام وغيره ,,وانتوا الدين ما همكم؟؟!!!!

ارد اقوول ما بنلوم الاجانب اذا اتفسخوا فبلادنا دام عيال لبلااد هذا تفكيرهم!!!

ردودكم جداً بااارده وأبد ما ظنيت هذا العشم فيكم ..

نحن دولة مسلمة ولها عاداتها وتقاليدها وقبل اي شي لها دينها الحنيف ويلي كلنا عارفين احدوده

وكان الاولى بمحمد انه يفخر بلباس امهاتنا وخواتنا الملتزمات مب يعيب عليهم ابهالطريقة المهييينة؟؟!!!
نحن ما ننكر انه محمد طرح قضايا وعالجها بإسلوب فكاهي ومحبب

لكن كله ولا الدين

واذا هو قصده صلاح الامة وتطويرها فالاولى انه يحبب البنات فلباس امهاتنا مب يشبهم بالبطاريق؟؟!!!!!

والي يقول نحن نغتاب ولا نلمز فالقول ,,أحب اقووله اني ما اغتاب

انا اوجه الناس لشي هم غافلين عنه ,,ويمكن الاكثرية ما انتبهوا وهذا الدين حثانا عليه اخوي بارك الله فيك!!!! وجان عطاري اني ارمس محمد عن طريق تويتر والفيس بوك ترى ماعندي مشكلة معنه مثل هالمواقع الي ترمسون عنها تحتاج لوقفة امّة مب واحد واثنين؟؟!!!!

انا افضل اني ارمسه دايركت ,,المواجهة افضل من الكتابة له او سرد تعليقات على انتاجه الفني

حطوا فبالكم شي واحد ,,

اذا اليوم نحن سكتنا عن شي صغير (بالنسبة لكم) باجر بنسكت عن اموور اعظم واشد الله يستر شو عواقب هالخذلان من صووبكم ؟؟!!!!

وين قول الرسوول عليه افضل الصلاة والتسليم عنكم,,يوم يقول من رأى منكم منكراً فليغيره؟؟!!!! وينه؟؟!!!

ولا صار همكم الضحك والتخفيف من ضغوطات الحياة بمثل هاذي الوسايل؟؟!!!

الله المستعان

عاشت ام محمد

بس شدراج إنه يشبه المرأة المسلمة المتحجبة " بالبطريق" ؟

اختي لكل شخص وجهه نظر وهو يوم بصرح انه قاصد انه يغلط فيه كلام ثاني ..

ومو من كل شي منتعصب يعني اللي غلطوا عن الاسلام كان فيه تحرك بسيط من البعض ..

ونحن نتكلم عن اماره وان بعض الظن اثم وان كان قاصد لازم يكون تصريح كان يبي يظيف الفكاهه >>

لكن اذا نحن بنعلق لككن زله او موضوع محد بيطلع ومحد بفكر بمشروع جديد ..

ولكل شخص وجهه نظر واظن اشياء تصير اشد عن حلقه في مجتمعنا >

وانا سمعت انه انتج حلقه مبادله للحلقه اللي عرضت وانه اعتذر رسميا وماكان قصده اي اساءه ..

مجرد راأيي~

السلام عليكم ورحمة الله وبركاته
كفيتي ووفيتي يا ام محمد وما قصرتي وانا وياكج ابهذي الملاحظه ولا اتعورين راسج ويا فئه ما اتغار على دينا ولا على عاداتنا وتقاليدنا وانا والله ما قهرني الا يوم شبه لبس العبي بالبطاريق صدق شي ما ينسكت عنه واذا هو انسان دارس بالخارج ومتعلق ابعاداتهم فيستحسن انه ما ايمثل عاداتنا وتقاليدنا ولا نبغيه بعد ايحل مشاكل الامارات والحمدلله نحن في غنى عن اخراجه وعن مسلسلاته اللي ما اتشكل عدنا اي اهمية ولا اتحل اي مشكلة واظن لو بعد رد اخرج المسلسل على السنه اليايه بيكون اتفه عن هالسنه ودربج خضر الغاليه

Unfortunately, to see all this envy and jealousy of the director famous Mohammed, who became a pioneer of production animation and now we come to condemn the attack unjustified on the director Mohammad and accused him of being unpatriotic, and throw false charges is no evidence in the foundation and you wish to be discussed is personally the subject sites social networking instead of gossip and I close the topic

وانا معاج اتباعا لسنه نبي محمد صلى الله عليه وسلم

عن أبي سعيد الخدري رضي الله عنه قال : سمعت رسول الله صلى الله عليه وسلم يقول : ( من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان ) رواه مسلم .

أبشرج ياأم محمد .. حوبات هل راس الخيمه الكرام وحريمهم .. بآخر إحصائيه تبين أنه هالمسلسل أخذ أقل نسبة مشاهدين .. ومحد صد صوبه .. وشكله بيتكنسل للأبد .. وجد عطوه فرصه أخيره وخبصها .. تجرأ على ثوابت وأساسيات وحصل الإستنكار وال ( أنجري فيس ) .

قسم بالله ناس فاضين وما عندكم سالفه ادققون على كل شي واذا تعتبرين نفسج بطريق هذا شي ثاني الريال امسوي برنامج تتسلون فيه وانتو طايحين انتقادات لوعتوا بجبودنا وهو صادق يوم طلع الغنم صدقه راس الخيمه شو فيها غير العنز في الشوارع الحينه استحيتوا ما استحيتوا يوم ربيتوا العنز وخليتوهم في الشوارع خلاص فكونا من انتقاداتكم السخيفه

هذى الأمور لا تصدر إلا عن طريق فكر جاهل

أولا شوه صورة رأس الخيمه ونسى إنها بلد الرجال الأكفاء والأكرام

وبلد التى أنجبت المثقفين منها السفير ومنها الوزير ومنها العلماء والدكاترة والكتاب والأدباء وفيها الكثير

وزاد الطين بله

سار يكحلها عماها

وسالفة البطاريق التى يشبه بها رمز الأصالة والفخر والستر

ركز محمد سعيد حارب على نقطة على حد مساحة فكره وبصيرته الضعيفه

إن الأعمال التى تنفذ إما ترفعك للأعلى أما تهوى بك فى مكان سحيق فلا تستطيع الإرتفاع منه مرة ثانية

إنك أنت من أحبطت ما بداخلك بسوء فكرك وإنتاجك

فهذا المسلسل الكرتون لا يهدف لشئ مفيد مجرد صريخ وإزعاج

والشئ إذا زاد عن حده ينقلب ضده

إى عمل وفكر يدخل فيه الأستهزاء سيطوق من قام به فى أمور من الأنتقادات والمشاكل ولن يجنى إلا الخسارة

فشكر لج أم محمد من راك على غيرتج

والي يقول نحن نغتاب ولا نلمز فالقول ,,أحب اقو وله أني مااغتاب

اذا كان الشخص غير موجود فهذه غيبه


وإذا أردتي التغير في وهناك أشياء كثيرة ليس في حلقة


عن أبي سعيدٍالخُدْرِيِّ -رَضِيَ اللهُ تَعَالَى عنهُ- قالَ: سَمِعْتُ رسولَ اللهِ صَلَّى اللهُعَلَيْهِ وَسَلَّمَ يقُولُ: ((مَنْ رَأَى مِنْكُمْ)) يامَعْشَرَ المُكَلَّفِينَ((مُنْكَرًا)): شَيْئًاأَنْكَرَهُ الشَّرْعُ وَمَنَعَ عنهُ، وَمَعْرِفَةُ المُنْكَرِ وَمَرَاتِبِهِوَمَرَاتِبِ الإِنْكَارِ عَنْهُ يَحْتَاجُ إلى عِلْمٍ كثيرٍ.
((فَلْيُغَيِّرْهُ بِيَدِهِ)) إنْ كانَ مِمَّايُمْكِنُ تَغْيِيرُهُ باليدِ؛ غَيْرَةً للهِ تَعَالَى

لا حول ولاقوه الا بالله... الريال مب قصده واعتذر قدام الكل ... شو تبغونه يسوي ؟ او شو نحن نسويله ..
اللقطات عرضت الاغلبيه تابعوه خلاص مابتغير شي ... والزمن مابيرجع للورا
غلط وتعلم من غلطه مابيكررها ثاني مره مافي حد في العالم مايغلط ويصحح من غلطه ...
خلاص لاتكبرون السالفه ...
الله يهديه ويهدي امثاله...

الله المستعان

مشكوره يا أم محمد وكلامج صحيح

بالنسبه لي اشوف الموضوع عادي ..

هذا رأيه و حب ينقله .. و ما اعتقد ان فيه شي يجرح او لا سمح الله

مثل ما الناس تنتقد تواجد الاجانب في دبي .. و تنتقد امور كثيره ..

يا على هالموضوع ..

و اليوم برر وجهة نظره على قناة سما دبي و قال ان فيه شركات سياحيه تستغل الامور و ذكر الحادثه

المهم الموضوع انتهى و أمارة رأس الخيمه غنية عن التعريف

العتيبي

كل عام وانتم بخير
انا قلت سابقا كل عذا الهجوم و التشهير بالرجل من خلال المنتديات ليس له داعي نهائيا واذا كان هناك خطأ فعلأ حدث المحاكم مفتوحه وليست المنتديات هي طريقه للتشهير وانا استغرب من الذين يدرجون شكواهم في المنتديات وخصوصا اذا كانت مشكله شخصيه او امر عام .. والحمد لله على كل حال .. واستغفر الله العلي العظيم والله يوفق محمد سعيد والجميع