ابي احد يساعدني

اول شي ارحب فيكم
والسموحه لاني مب دوم على المنتدى انا الود ودي اتم دوم على المنتدى بس اشغال الدنيا وظروف
حبيت اقول لكم مشكلتي
انا يوم كان عمري 15 جي 16 ابوي مات وامي يوم ولدت اختي بعد سنه وشي ماتت عشنا انا واختي بيت خالتي
وانا كنت ادرس والله يوم كنت ادش بيت خالتي اجوف خالتي تضارب اختي تخليها تشتغل والله يوم اجوف هاا المنظر كنت اصيح قلبي يتقطع حق اختي بعدين والله ودرت دراستي عشان اختي
لان خالتي كل يوم كانت تضاربنا وتخلي اختي تشتغل عندها وانا من يوم اشتغلت خالتي طلعتنا من البيت
بس الحمدلله كنت اشتغل انا واجرنا لان بيت وصرفت ل اختي لين ماتزوجت اختي الحمدلله لانها الحين مرتاحه بيت ريلها والله انا كل ها سويت عشان اختي والله حتى لي هم اهلي محد يسال يوم اسير بيت خالتي عشان اسال عنها واسلم لها والله ماتسوي لي سالفه وحتى عمي من يوم مات ابوي تغير وعشنا بروحنا والله مع مرور الوقت اختي تغيرت لي يوم اسير لها البيت تقول لي وهي اتصيح انت حرمتني من كل شي حتى دراسه مادرست اختي بس لصف ثامن وانا زوجتها واليوم تشتكي مني تقول انت سويت وضيعت مستقبلي بس والله انا كنت ابي استر حق اختي اليوم تشتكي من اخوها والله حرمت عمري من اشياء وايد عسب اسعد اختي لانها هي الوحيد لي بقت لي من بعد موت ابوي وامي وحتى اهلي تخلو عنا وحتى احيانا اتصل لاختي ماترد لي يوم اسير البيت لها تقول لي ليش تي بعد ماضيعت كل شي الحين تسال عن اختك والله عايش بروحي وكله اكل برع ولاتسال عني ولاشي والله من 7 شهور هااي سالفه بيني وبين اختي والله حالتي النفسيه تعبت كل يوم تفكير ذبحني التفكير مادري اشكي لمنو محد يفهم ف هاي الدنيا والله حتى اختي هي متزوجه واحد من راك وانا ساكن ف بوظبي والله اضرب خط عشان اسلم لها واسال عنها واخر شي تقول لي كلام تقول لاتي لي الله كريم
والسموحه اخوني لاني طولت عليكم وايد
ادعو لي الله يفرج همي
تذكروني ف دعواتكم اهوك ف الله
ولدراك :(:sm78::sm78:

يالله انته تستاهل كل خير اخى الكريم انته ضحيت بأشياء وايده بس عشان اختك بس المصيبه اختك هب فاهمه ها الشي وللأسف الشديد الله يسامحها ..
هذا بدل ماتشكرك لانك طلعيتها من البيت الى تنظرب فيه ..
صدقنى اخى الكريم أجرك عند رب العالمين ولاتنسي انه لك رب ماينسى عباده صدقنى .. بى يوم بتندم اختك على كل شي قالته لك ..
والله يفرجها عليك أخى الكريم.

غمضتني والله بعد ماضحيت بكل شي أختك تقول لك ها الكلام والله حرام عليها جي تسوي المفروض تفتخر فيك لانك سويت اشياء وايده عسب اختك والله ها الزمن مستحيل تلقي اخو يتكر الدراسه عشان اخته ويدور لها الصح بس اخوي اجرك عن رب العالمين اختك بتندم ف يوم بتحس
وماتدري ف ايام لي بتي شو كاتب لك الله عسى ايام تكون كلها افراح بفراح وتشوف السعاده انت واختك
وعسى ربي يفرج عليك وجميع المسلمين ^^

تسلمين اختي نبض انسان وشحيه وكلي فخر
على الرد والله يسمع منكم وسى ربي يوفققكم دنيا واخرة مشكورين

إجلسوا مع بعض جلسة مصارحه كل واحد يطلع كل إلي في قلبه قولها يا تقنعيني يا أقنعك وإشرح لها كل شئ من وفاة أهلك الله يرحمهم حتى هذه أللحظه ولا تخبي عنها أي شئ وكون صريييييح معها حتى لو كان الكلام يجرحها وتقبل منها أي كلام تقوله وخلها تفضفض وتبكي وتطلع قهر السنين كله علشان ترسون على بر وتنتهي المعاناة صدقني راح ترتاحون وتفهمون على بعض وينتهي اللوم بينكم
هذه ألطريقه ماشين عليها بالبيت إذا شفنا على بعض شئ على طول نتكلم ونوجه بعض بأغلاطهم والحمد لله القلوب صافيه ......

الله يرحم هلك وانت تستاهل كل خير ما قصرت ويا اختك الله يهديها ليش تعاملك جي اكيد في شي لو تيلس وياها وتصارحهاا تحاول تفهم ليش تقولك درمت حياتها هي الحمد لله متزوجة ومرتاحه وانت ليش ما تفكر تزوج عسب زوجتك تهتم فيك الله يفرجها ان شاء الله

الله يعينك بحياتك صدقني مشكلتك هاي بسيطه مقارنة بمشاكل الناس الثانيه .
الحمدلله عالي انت فيه وانك اسست لنفسك وكبرت نفسك وكبرت اختك معاك وزوجتها ومن اهنيه مسوليتك عليها خلاص تنتهي وترجع ل زوجها .
وبعدين لو هي حابه تكمل دراستها ترا البلاد مب مقصره تقدر تكمل دراستها باي مكان ..
الدوله معطيه للمواطن وللوافد حق الدراسه باي عمر من الاعمار .وتنادي ابناءها بالعلم..
المجال ما وقف انها تكمل ولا لها حق انها تعاتبك على الحب الي عطيتها اياه..
خبرني شو بييدنا نساعدك وانا ان شاءالله من بعد الله بحاول اساعدك بالي فيه الخير ...

لاحول ولا قوة

ربي يعينك و يفرج همك ويرزقك علٌـِـٌِۓ قد نيتك يارب

مشكورين على الرد والله
بس اناا تقدمت حق بنات بس معضم البنات مايبون مادري ليش الله كريم
اختي احسهاا من تزوجت خلاص نستني ولاتسال نفس قبل دوم تتصل فيني تقول لي وين انت كليت ولا بعدك كانت تخاف حقي واليوم لاتسال ولاشي
الله يكتب لي بنت الحلال ان شاء الله

ان شاء الله الله يفرجها عليك ان شاء الله

لا حول ولا قوة الا بالله

قلبي عورني...صدق الام والاب ما يتعوضون....بس غريب امر خالتك....الخاله مثل الام...

واختك شو اللي غيرها مره وحده عليك؟؟؟؟....الله ييسر امرك ان شاالله.....

كثر من الاستغفار والله بيحلها من عنده...ولا تيأس من رحمة ربك...وشوف حد من معاريفك يشوف لك بنت ناس طيبين...

هونها بتهون لو في مجال اتواصل معاك لان مب انت الشخص الوحيد اللي صار له هالشي

ها الزمن كل شي لاخاله اومي ولا خال اوكي ولاعم ولاعيال عم واقول حق منو انه يدور لي بنت الحلال ترا انا مااسير ل الاهل ولاهم يسالون اسير اقول لهم والله سير دورو لي بنت الحلال ترا محد بسمع كلامي وانا عارف ها شي لاني عشت معهم وعرفت كيف اسلوبهم ف الكلام اذا الله كاتب ف نصيبي ان شاء الله ربي برزقني مب لازم اسير اقول والله ابي بنت والسموحه

الجرح ارحم
كيف تبين ياتواصل وياك اذا حبيت رمسني خاص وان شاء الله نتواصل

السلام عليكم ورحمة الله وبركاته ،
أولاً ونعم التربيه لان والله مافي حد به الزمن فيه خير أنا اعرف ناس. يوم توفوا أهلهم
صاعوا وخربوا حياتهم ولا مفتكرين بخواتهم سبحان الله خوفك على أختك صار شي نادر وقليل ما نسمع عنه
وصدقني هذا إبلاء من رب العالمين وكثير من البنات يتمنون واحد مثلك مثل ما خفت على أختك بتخاف عليها والله يرزقك بنت الحلال
البنات كثار ، وإذا عقولتك عيال العم والخاله مافيهم خير ترى حتى الإخوان مافيهم خير لبعض والله أيسر لك أمورك وقول الحمدلله ،
الله يفرج همك ويحنن قلب أختك عليك ويصلحها اللهم أمين

تحياتي ،،،

والحل ؛ شي واحد تتقرب من ربك وتكثر من الاستغفار والله الاستغفار معجزة سبحان الله أنا جربت والله سبحان الله ربي فتح لي وهون علي وخفف عني وكل إنسان ربي كاتب له الخير به الدنيا والله يسعدك يااارب واكثر من قيام الليل لانه فيه سبحان الله من الراحه شي مب طبيعي والدعاء بين الأذان والإقامة تكون الدعوه مستجابة ، أتمنى أني أكون قدرت أخفف ولو بشيء بسيط

الخاص ما اقدر ارسل الا للاداره للاعضاء هذي الميزه غير متوفره ودي اتواصل معاك واساعدك

قطعت قلبي اخوي ولد راك الدنيا جدي تكلم ويااختك وفهمها لوتمت عند خالتها ولا عمها شومصيرها وزين انك سكنتها بعيد عنهم لوكنت ماتشتغل شوبيصير فيها جان زوجوها واحد كبير بالسن وبهذلوها وليش وافقت ع الزواج مادامها هي ماراضية وتقول هي الحين سعيدة بالزواج وتقدر تكمل دراستها فالمدرسة او فالمنزل اخوي ماعليك منها الله بيهديها وعمر الأخوان مايقدرون يصبرون عن بعض الله يجمع مابينكم على خيريارب والله يوفقك وصدقني بتلقي من يسعدك في حياتك لونعرفك مابنخليك جدي بنحاول نصلح مابينكم الله المستعان وقول دائما لاحول ولا قوة إلا بالله 3 مرات مع بعض الله بيسر امورك اخوي العزيززنحن كلنا فالمنتدى اهلك بارك الله فيك

الله يفـرّج همـك و يحنن قلـب أختـك عليـك

تسلمون والله مشكورين مادري كيف اشكركم
والله يوفقكم يارب ويسعدكم
بس اتمنى منكم شي بسيط انكم تدعون لي وتذكروني بل الخير وبدعواتكم

السلام عليكم ورحمة الله وبركاته ..

أخي الكريم ..

إن كانت القصة حقيقية .. عندما تقرر شيء بنية صافية ..الأكيد انه رب العالمين بيجازيكـ عليها كل خير ولو بعد حين ..

وبما انه ما سمعنا الطرف الثاني ، ما نقدر نحدد شو السبب الرئيسي من زعلها .. قد يكون مشاكل زوجية تسقط أسبابها عليك .. (( هذي حركات الحريم ^_^ ))

الموهم .. ما أظن فيه شي يزعل .. الحل ترووح تقعد مع اختك قعدة مصارحة هادئة ، وإن زادت حدة المصارحة غير الموضوع لأنه الشيطان ما بيقصر بيشحن فيكم ..

أما باقي الأهل .. فصلة الرحم واجب .. والخير بيرجع لكـ بيوم من الأيام في عيالك ..

والله يوفقكـ .. ولا تكدر بخاطرك .. مافي شي يستاهل .. ^__^

نورة

الله يفرج همك اخوي وان شاء الله تحصل بنت الحلال وتتوفق وياها^^
نصيحه مني حتى لو اختك تمت اتصدك لا اتبعد عنها مصيرها بترجعلك لانك سندها فهالدنيا حتى لو معرسة
تم حاول وياها واتواصل وفهمها وجهه نظرك وانك كنت خايف عليها من هالدنيا وبلاويها
وخبرها اذا عندها عزيمة واصرار تقدر تكمل دراستها مافيها شي..
وان شاء الله اترد علاقتك بأختك شرات قبل واحسسن

ربيي يحفظك ويوفقك
عساك ع القوة

أخي الكريم / أولا : بارك الله فيك وجزاك خيرا على ما قدمت

ثانيا / لا تؤاخذ اختك بما تقول , فالنساء عادة ما يغلب في تفكيرها عاطفتها , فعليك بالتواصل معها ولا تقطعها فهذه اشارة إلى أنها بأمس الحاجة اليك

ثالثا / ادعوك أخي الكريم بأن لا تنتظر من خير فعلته أجرا , وأحتسب الأجر من عند الله , فالله هو الذي بيده قلوب العباد وهو سبحانه يصرفها حيث يشاء , وبهذا لا تنتظر محبة الناس , فاذا احبك الله احبك الناس

رابعا / تأسى بنبينا محمد صلى الله عليه وسلم و تذكر أنه ابتلي بلاء شديدا

خامسا / اصبر و اعلم أن مع العسر يسرا و امتثل قول الله تبارك وتعالى : يا أيها الذين آمنوا اصبروا و صابروا و رابطوا و اتقوا الله

سادسا و أخيرا / عليك باتشارة من هم أهل للاستشارة مثل المستشارين الأسريين و غيرهم حتى تحصل على الإستشارات الصحيحة

أسأل الله لك التوفيق والسداد في الأمر كله إنه جواد كريم

يزاج الله خير

الله يسامحها في ميزان حسناتك واختك انشاءالله
تندم في مابعد وترجع لك
الله يكون في عونك