بلاوي الشباب .. وما أدراكم ما الشباب!!

بسم الله الرحمن الرحيم:

من فترة كتبت موضوع (الحريم ناقصات عقل ودين!!) في الرابط التالي:
http://www.alrams.net/forum/showthread.php?t=667

ووعدت بكتابة موضوع عن الشباب (على الرغم من أن البعض قال : تحملي لاتغلطين علينا !!
والبعض الآخر تمنى المصداقية ) >> لا تحاتون أنا وايد أقدر الرياييل :)

عموما أبدأ موضوعي:

بعض المشاهد التي نراها في حياتنا اليومية تخلي الحريم يقررون بعدها أن الرياييل
(عقولهم عقول يهال!!) >> هذا وأنا أقدركم :sm121: !!

وإليكم بعض المشاهد:

بـــلوتــــــــوث

الولد أول ما ينولد يقول ( وااااء أبا موبايل) !! :sm117:

تلاقيه قاعد بحضن أمه والسماعة بأذنه (يقول واحد من هوامير الأسهم) وعنداله ولد عمه
(يطرشون لبعض بلوتوث) ..

يكبر (شوي) يدخل المدرسة بعده بالابتدائي (يطرش لصاحبه في الصف اللي يمه بلوتوث
هكونا متاتا!!) ..

يكبر( شويتين) يصير بالاعدادي يطرش لربيعه في (حصة الانجليزي) بلوتوث (هيفاء وهبي
ونانسي عجرم )

لا والمصيبة انهم يستهبلون بالصف (رقص معلاية.. ضرب أساتذة.. حركات هبله ) >> قال
يصور بلوتوث من إنتاجه الشخصي وينزله في (YOUTUBE) ..!

يكبر (ثلاث شويات) ويصير الأخ بالثانوي يقوم يستفيد من هالتقنية صح (كبر وعقل) >>طبعا
الأخ (ما يفهم شي) قاعد ورا (زلمة) يغش منه الامتحان ويطرش الإجابات بلوتوث لباقي الصف
(الأستاذ مش لازم يصحح كل الصف إجابتهم وحده!)..

يكبر ويصير ريال (أبو عيال) .. وهو في الدوام.. المراجعين واقفين صف وهو قاعد يستقبل
بلوتوث من زميله (معاه في المكتب) >> والمقاطع للأسف (خارجة عن حدود الأدب واللباقة)..
يوصل البيت .. بالغلط المدام تفتح الموبايل تتفاجأ بالفيديو (يطيح من عينها)... والأفظع لما
يلعب الولد بموبايل أبوه ويشوف هالبلاوي (فينهار المثل الأعلى!!)

ولأني (مثل ما قلت سابقا) وايد أقدر الريايل ما راح أوصفهم بـ (....)!!


راهـــــــــــــــــــــــــــي

وأنت ماشي بالشارع… تطالع يمك تلاقي شاب (19 سنه) راكب مرسيدس S600 ورقم
هالموتر ثلاثي.. مسوي غترته (شرات كوبرا).. لابس نظارة عليها شعار كارتير!! .. بخاطرك
تقول أكيد هذا ولد تاجر.. لكن أذكرك (ليس كل ما يلمع ذهبا) ..

وشي علامات تقدر منها تميز الراهي صج من المسترهي (يعني اللي مسوي روحه راهي) :

1)تلاقي الشاب راكب موتر راهي وشال المخفي >> يعني شوفوني أنا فلان وعندي فلوس
(ما جنه الصبح يصيح عند أمه يبي بيزات عسب يترس بترول!!)
2)دايما يمشي على السيد اليمين (أبطأ) وإذا السرعة 80 يسوق 30 >>عسب يشوفونه
أكبر عدد ممكن.

3)أول ما يوقف عند الإشارة تلاقيه يتلفت يمين ويسار (يطالع إذا الناس يطاعونه ولا لأ) وإذا
كان (بصير) ما بيتلفت لكن يحاول انه ايود ابتسامته >> مستانس الأخ مصدق عمره راهي.

4)عند محطة البترول (إذا المحطة زحمة) يفول سيارته من (الأزرق) ويأشر للهندي (ما يبي
الجينج) >> وبطنه تعوره عالبيزات! وإذا مافي أحد في المحطة يترس بـ (50 درهم) من
الأحمر >> ويشرد بسرعة..

5)إذا صار عطل مستحيل يجيك بالوكاله يروح لـ (أقرب وأرخص كراج) .. وعشان يملك
هالسيارة يروح يتسلف من (راع الدكان).

وبعد كم شهر ولانه ما يقدر على المصاريف يبيعها ويشتري موتر ثاني وثالث ورابع...

ويوصل عمره 30 والاخ بعده ما عرس وإذا سألته ليش قال (غلاء المهور!!)>> وحق
المظاهر والخرابيط ما قلتوا غلاء!!!!

ومع ذلك ولأني مثل ما قلت وايد أقدر الريايل ما راح أوصفهم بـ (....)!!


بـــــــلاي شتيشن وكـــــــــرة قـــــــدم..


إذا (كنتي ) ملانه وتبين تشوفين (مسرحيه ببلاش) أقعدي شوفي أخوج وهو يلعب بلاي شتيشن
أو يطالع كرة قدم!!>> أشكالهم عجيبه الصراحة..

بلاي شتيشن:

ينش من ارقاده الظهر وقبل لا يغسل ويهه على طول صوب البلاي ستيشن ويقعد 10 ساعات
متواصل (لا صلاة ولا دين!) .. واحلى مشهد لما يلعب (سيارات) في بداية اللعب يكون الوضع
هادي.. دقيقتين.. يبدأ (يترنح) يمين ويسار .. دقيقتين.. يوقف على ركبته و(يترنح) ..دقيقتين ..
يعض على شفايفه (خخخ).. دقيقتين .. يفز من مكانه ويعض لسانه و(يترنح) .. دقيقتين .. إما
تشوفينه ينط ويصارخ يقول فايز بالرالي.. ولا يفر الجير و(يتحطم جدامج) ويرفس البلاي
ستيشن ويقول (غشاشين!!) .. :sm102:

(نصيحة : إياني وإياج تضحكين .. ولا تراج بتحصلين لج كف على ويهج عمرج ما جستيه!!)


كرة قدم:

شباب الامارات عندهم طبايع (غير شكل) تسمعين الأخ يوصف نفسه بأنه (شخص رياضي)
وهو عمره ما لعب رياضه !! كيف رياضي؟؟ قال أتابع كرة القدم >> يعني رياضي بالنظر !!

والضحية الأولى بهالموضوع (الحريم) كل المشاوير مهما كانت مهمة راح تتأجل عشان الأخ
(ياضي) يتابع المباراة ..

بو فلان بنتك مريضه يرد اصبري لغاية ما تخلص مباراة (سيلان وباكستان) << الظاهر يدور
على مزارعين يشتغلون بالعزبة!!

بو فلان أغراض البيت ناقصه يرد اصبري طالعة مباراة (البرازيل والأرجنتين)!!<< وجان زين
لو يعرف ينطق أسماء اللاعبين!

بو فلان بروح بيت أهلي يرد بعصبية طالعة مباراة المنتخب (حبكت) ألحين تبين تشوفين أهلج!!!
>> يقول عاد المنتخب بيفوز من الله دوم خسران!

وأول ما يسجل الفريق اللي يشجعة الجول تسمعين (جووووووووول :sm109: ) لغاية ما تنطر طبلة أذنج
وجان فاز المنتخب صاروا لاعبيه أحسن لاعبين بالعالم والمدرب أحسن مدرب أما إذا خسر
اسمعي السب والشتم باللاعبين والمدرب ونصيحة إذا كنتي قاعده معاه في بداية المباراة
وحبيتي تنتقمين من ريلج أقعدي وشجعي الفريق الثاني (واتحملي اللي بييج هذيك الساعة!!)
وقبل لا تخلص بدقايق وبالذات إذا كان فريقه خسران (أدخلي غرفتج وسكري عليج الباب لأنه
أعصاب ريلج الرياضي تالفة عالآخر!)

ومع ذلك ولأني (مثل ما قلت) وايد أقدر الريايل ما راح أوصفهم بـ (....)!!


مـــــــــــــــــــــــــغازل

للأسف ظاهر لمغازل انتشرت في الفترة الأخيرة بشكل غير طبيعي ..

ياهل (يغازل).... مراهق (يغازل).... عزوبي (يغازل)..... متزوج (يغازل) >> ولو ان الحريم
هالايام ما يستحن ويغازلن عيني عنك.. لكن موضوعي عن الشباب وراح أرمس عن
الشباب فقط ..

تلاقي الشاب من الصبح (والناس مالها خلق تجابل بعض) وهو يدور بالشوارع يبا يغازل!! يفر
رقمه لأي وحدة لابسة عباة << و تطلع فلبينية .. :sm11:

وبعد المغرب على طول يطلع من البيت ومرته فقيرة اتعطره واتدخنه عبالها رايح اجتماع والاخ
رايح المول ولا يقعد يشيش بالكوفي وجدام مرته يصير (شريف مكة)!! ويتعمد يقعد بالطرف
(إما مجابل الدري أو عند باب اللفت) وإذا كان المول زحمة (يقعد عند الممر) يطالع فلانه
وعلانه ويعلق مع ربعه ..>> ما يدري ان اللي ماشيه أخته!!

وإذا كان كاشخ كل شوي يعدل بالغترة ويتحرى كل البنات معجبات به وإذا بنت سرحانه وتطالع
صوبه تسمعه ايقول لربعه : طالعوا هالبنت تباني أرقمها ..من مساعة تطالعني.. وانا لا
بسنها !!!!! >> أونه الريال ثقيل و(البنت مسكينه خبر خير) .

وإذا يا بيغازل وحدة يرمس يقول ولد (شاه بندر التجار) وهو ياخذ مصروفه من أبوه 300
درهم.. يروح يشتري بها (كروت تعبئة) يعطيها لرفيجته وتروح هي ترمس غيره >> انت قبل لا
تشتري أضمن :sm142: !!

ومع ذلك هذا كله ممكن يهون ولا تشوف ريال معرس يرقم وحدة ويصرف لها راتبه كامل
كروت وهدايا ومطاعم وسينمات وأول ما يدخل البيت يركض له ولده لصغير يقوله (بابا أبا دفتر
للفن) يصرخ عليه (طلبات المدرسة ما تخلص!! ما عندي فلووووووووووس!!!)

ولأني (مثل ما قلت سابقا) أنا وايد أقدر الريايل ما راح أوصفهم بـ (....)!!


هـــــــــــــــــــــمسة

ما أكثر الرجال الذين كانوا خير مثال لحسن الخلق.. ورجاحة العقل.. وطيب المعيشة ...

يبقى الرجل سندا تحتمين به إذا جار عليك الزمن... وقلبا حنونا يخفف عنك همومك وآلامك..

ويد دافئة تطمئن قلبكـ...

تذكري أنه يتعب ليحقق لكـ رغد العيش.. ويلبي لك مطالبك واحتياجاتك..

كم مرة أسعدكـ وهو يحمل بيده هدية لتفرحي...

كم مرة بكى عندما كنت طريحة الفراش...

كم .. كم.. ؟؟ لا نريد أن نحصي...

فالرجل والمرأة مختلفان..

لا مقارنه بينهما... وكل منها يكمل الآخر...

يكفينا بحثا في عيوب بعضا البعض...

يكفينا بحثا واجتهادا لنبرهن أن كل منا أفضل من الآخر...

فقط لنكمل المسير في هذه الدنيا الفانية.. يدا يدا .. نطبق شرع الله ..

لنلتقي بالآخرة كما قدر لنا أن نلتقي في الدنيا...

بقلم: الأغين
4/11/2007

هههههههههههههههه

الواقع الواقع الواقع هذا هو الواقع

بعض ما ذكرتيه شفته جدامي ولمسته والبعض توني اسمع فيه

سلمت يمناج ع هالموضوع المتعوب عليه ،،

تسلم أيدج أختي ع الموضوع الي صدق متعوب علية..

::لا تعليق::

هذا الواقع

والسموحة

^^

السلام عليكم ورحمة الله وبركاته...

ليش عندي اي تعليق على ماقد كتب لان هذا هو ما يحصل بالفعل من بعض الشباب هداهم الله...

ما شاء الله عليك يا الاغين وعلى قلمك المبدع سواء في هذا الموضوع او في موضوعك السابق عن الحريم ...

تمنياتي لك بالتوفيق والاستمرار على هذا النهج ..

وسلامتكم ..

موضوعج واقعي الصراحة وللأسف هاللي حاصل

بس هب كل الرياييل بهالصفات

ويعجبني فموضوعج حسن الخاتمة هع هع

أسأل الله للجميع حسن الخاتمة

شكرا على الموضوع الصريح جدا...

ولكن أملي أن ترجع أمور رجال الامة الاسلامية بفتوحاتها في كل أنحاء العالم...وهذه الاشياء التي تحصل من البعض يا أختي الفاضلة ما هي إلا نوع من العولمة لإلهاء الشباب ونقص في الدين خاصة فيما يتعلق بالبلوتوث...

والصراحة بيني وبينكم أنا ما أحب أحد يكلمني وقت المباراة..

تحـــــــــــــــــــــــياتــــــــــــــــــــــي...

اقتباس:

---

المشاركة الأصلية كتبت بواسطة دبلوماسي الرمس

والصراحة بيني وبينكم أنا ما أحب أحد يكلمني وقت المباراة..

تحـــــــــــــــــــــــياتــــــــــــــــــــــي...

---

أنا بعد نفس الشي

هع هع

بس أقولك هاردلك عالخسارة الثالثة خخخ

رمسيه دوت كوم

وتلسم يمناج عالمرور الكريم..

دمت بأحسن حال..

أختكـ:
الأغين

تنفعين اتكونين مؤلفة مسرحيات
الاسلوب المتبع في الشرح والتقديم
اسلوب مميز مشووق يسحر القاريء

سريع الفهم قوي المفعول سريع الدخول الى العقول
احترامي لكم
اتمنى الاستمراريه

بصراحه حطيتي ايدج على الجرح

"بس الأصابع مب سويه"

و إلي تكلمتي عنه هو إلي صااير حاليااا

يعني واايد شبااب تحصلينهم يتدينوون عشان يتزينون "اتدين و اتزين "بس آخر شي شو الفايده ؟؟
ما شي فايده غير ديون فوق ظهره و ندم
اما عن كرة القدم صدقتي وايد يتابعون كرة القدم .. بس ما ينلامون الشباب لي يتابعون الكره .. ترا كافين خيرهم شرهم
احسن من الهياته فالمولات و الشواارع .. يشغلون عمرهم بالكره احسن عن يشغلون عمرهم بالهياته و جي
و ما ننسى الصلاااه .. يعني الكره ما بتنسيهم الصلاه " إلي يبي الصلاه ما تفوته "
..
ولا عن المغازل عاد حدث ولا حرج
بكل مكاان المغازل .. و الحينه المغازل لكل الاعمار
استغرب من اليهال يوم يروحون المولات .. كاشخين و حالتهم حاله .. كله عشان المغازل .. واذا سأله ابوه او سألته امه .. وين ساير ؟؟ يقولهم طالع مع ربعي رايح السينماا
ولا بعد عشان يسوي عمره ريال لازم يدوخ عشان ما يقولون عنه ياهل
ترا هالايوم يقولون الدواخه للرياييل بس


شو بنقول غير الله يهديناا و يهديهم إن شاء الله
و أسمحيلي اختي طولت :S
تراني تحمست مع الموضوع
تسلمين على طرحج الغاوي اختي
ربي يعطيج العافيه
نترياا مواضيعج بأحر من الجمر

عالي الشان
الطنيـ 1 ـجي
JetaimeO
دبلوماسي الرمس
احتج اشجب استنكر
أسير الاعياني

شكرا لمروركم..وتشجيعكـ...
واحترامي لآرائكمـ وأقلامكمـ ..

أختكم الأغين

هذه العبارة دائما أسمعها "اما عن كرة القدم صدقتي وايد يتابعون كرة القدم .. بس ما ينلامون الشباب لي يتابعون الكره .. ترا كافين خيرهم شرهم
احسن من الهياته فالمولات و الشواارع"

بصراحة والحق يقال فقد بلغ السيل الزبا بشأن كرة القدم، اعرف بعض الأسر يشتكون من إدمان ازواجهم على متابعة المباراة للاخرى ، وحظهم فقط بين أصحابهم أثناء اللعب ﻷنهم يقدرون المباراة أكثر من زوجاتهم ، وإن كان بداخل البيت فهو على أعصابه مع المباراة ناسيا زوجته ... أهذا حق ، أو كان اللهو اهم من واجبنا تجاه أسرنا؟!!

ثم ما هذه المقارنة مع الوضع الأسوا بدلا من المقارنة مع الوضع الأفضل فمن الممكن قضاء الوقت مع الاهل او التنزه معهم أو حل معضلة أسرية.... الخ، المشكلة ليتها كانت مرات قليلة فهذه الفئة لا تلام ولكن من أدمنها هو من يحتاج لتعديل نظام حياته والنظر فيما هو أفضل له

http://www4.0zz0.com/2007/11/14/15/91564252.gif

صح لسآانج .. كل الموآقف اتصير لنآا وانشوفهاآ ..

الله يهديهــــــــــــــم ..

تسلم أياآديج اختي ..

^^

http://www4.0zz0.com/2007/11/14/15/45777982.gif

موضوووووووووووع صريح وجميل
اسلوب مميز وممتع

صح كلامك اخوي شفت كل هاي بالأولاد
وخاصة في اخوي الكبير.......

شـكــ وبارك الله فيك ـــرا لك ... لك مني أجمل تحية .

الصراحه اسلوب ممتع للقراءه سلمت يمينك ...

هههه
و الله تبين الصراحه
ف البداييه كنت بسبج خخخخخخ
و بطيييييح فييج

بس زين يوم كملت الموضوع خخخ

هع
تسلمين ع الموضووع