قصيدة رائعة لشاعر إماراتي يشكي الحال
تو . . طين
وش عاد يا دار ٍ بها صار ( توطين )
و في مكتب التوظيف سوسن و ميسون !
مديرهم مدحت و نائبْته نسرين
و على الرسبشن حمّص و فول و زيتون !
كل ما اتصلت اسمع ( الو مرحبا مين ؟
بدّك وظيفه ؟ .. مين دلّك على هون ؟ )
أقول أنا لي أتصل صار شهرين
و انتوا وعدتوني متى بس توفون؟
إسمي ( مواطن ) ( جامعي ) طيب و زين
كني أبخطب عندكم و اتّغلون !
عندي شهادة طايحه بجبدي سنين
عشش عليها شي له ستة عيون !!
لو للشهاده لسان قالت ( على وين
ناوي توديني . . تلف فيني الكون ؟ )
من كثر ما صورتها غارق بدين
للهندي راعي المطبعه صرت مديون
لا ليلي ليل ولا نهاري نوى يبين
دقيت راسي لين ما صرت مينون !
مطلوب خبره عالأقل في مجالين
ولا
ّ تجينا بواسطه و سير مدهون !
ولا انثبر في بيتك . . افرك بكفين
يومك يشابه أمسك و عيش مغبون
تعدادنا ويّاهم أربع ملايين
و أهل البلد للحين ما صاروا مليون !!
ويلاه من باكر إذا وضعنا الحين
و احنا أقل من الربع حالنا شجون !
و اللي ابتسم له حظه والله مسكين !
حصّل وظيفه . . بس في وين .. تدرون ؟
اللي في راس الخيمه .. حطوه في العين !!
و اللي سكن في الذيد .. في السلع مدفون !!
يشوف أهله بس في الأسبوع يومين
و اذا حسبتوا الدرب كم ساعه . .. تبكون
يعني في كل أحواله ذاق الأمرين
شغّال محزون و بلا شغل محزون
و الأجنبي اللي راتبه فوق عشرين
فله و سياره و تذاكر . . و طاعون
عنده بدل كل شي عالراتب ألفين
حتى بدل معجون أسنان و صابون !
و من بعد ما يجمع من بلادي فلسين
و يربّي م القعده على الكرسي بطون
و يصير في بلاده غني و عنده برجين
يرحل و هو جاحد . . و كم مثله ملعون !
و حتى الجماعه قوم مدحت و نسرين
مردّهم لبلادهم لو يطولون
يرضون بشوية دراهم . . و شفتين
صبح و عصر . . لو حتى في الليل يرضون
بس لو سمعتوا همسهم بينهم بين
وسط القهاوي يلعنون و يسبون !
لا تحسبوني عنصري . . كلنا طين
و الخِـل لو عاتب محبينه يمون
داري و أنا أولى بها من الغريبين
ما يوصلون لحبها لو يموتون
و ( الأقربون أولى ) . . كلام ٍ من الدين
ما جبته من شعري مع الهام و ظنون
ولد البلد ما يبغي لبلاده الشين
بالروح بالدم يفتديها ولا يخون
لكن سؤاله يوم قلتوا له ( توطين )
يا كيف بيد الغرب توظيفه يكون ؟؟!!
شعا رهم معروف ( راجعنا بعدين )
و باين من التأجيل .. انهم يخافون
إذا معك خبرة .. يا أهلين و سهلين
و إذا شهاده بس .. عنك يصدون
ما عندنا شاغر . . و بطـّلنا تعيين
ولو تحرق الهاتف ترى ما يردون !
من وين أجيب الخبره ؟ من وين من وين ؟
دام الوظيفه عند سوسن و ميسون !
عندي بمطبخ بيتنا خبره سنتين !
تنفع إذا صاروا المطاعم يوطنون ؟؟!
ولاّ أهاجر و آخذ الخبرة في الصين ؟
صح العيون صغار . . لكن يقدْرو ن
سؤال يا دار ٍ ..صراحه بترضين ؟
اني أسافر و أطلب الغرب لي عون ؟
و سؤال يا ناس ٍ على الراس و العين
صدق الوظايف واسطه و سير مدهون ؟
إمّا الجواب الشافي يجيني الحين
أو هاتوا تأشيره . . إذا كنتوا ترضون !
رد مع اقتباس