:::إمــــــــــــــــــــــارتي:::

[صدى الحرمان]

بسم الله الرحمن الرحيم


هذا أصله عيمي ..وهذا يمني..وهذا بلوشي…هذا عماني …وهذا أصله من قوم فلان بن علان اللي حاربونا سنة سكتوا بسبة ناقة …وهذا من قوم الفلاني مايندرى وين أصله.!! وهذ مايندرى من وين ياي!! عيل ما بنزوجهم بناتنا ولا نريد نسبهم

أنا من بوظبي هل الظبي…وأنت من الإمارة الثانية هل النخي…وأنت من إمارة البواليع وأنت إماراتك كلهم اجانب وهنود..وانتم يا حليلكم متخلفين قوم هيه لا..


نحن عندنا جواز دبي..ونحن عندنا جواز بوظبي.وهم عندهم جواز الشارقة….وهذيلاك عندهم جواز الفجيرة عيل عليهم السلام!!

أنت وصلاوي…انا أهلاوي وافتخر..سيروا لا أنا عيناوي ..أنا شرجاوي..وأنا وحداوي…وهات ضرابة وشتم بين اللعيبة

على الرغم من اننا تعدينا عصر الجاهلية بقرون…لكن مازلنا نفتخر فيها ونعلمها لعيالنا…وعلى الرغم من تعلمنا وثقافتنا واطلاعنا على العالم لكن مازلنا ننادي بالتخلف والرجعية!!


نحن شعب واحد…لكن محد عنده مشكلة التفاخر كثرنا…بلد طيب لكن للأسف التعالي من شيمنا..تعلمنا هالشي من اهلنا..وبنورثه لعيالنا…رابعوا عيال فلان لأنه معروف ولو عيالهم محطوطين في الليستة السودا وتربيتهم مب شي مع ذلك رابعوهم لأنهم اصل ولا ترابعون قوم فلان اللي ناجحين في المدرسة والمتوفقين في حياتهم بس لأن مايندرى شو أصلهم….


هذي حياتنا..تخلف في تخلف…الكل يتفاخر بإماراته وشيخه وناديه المفضل..والباقي ما يسوون بيزة في عينه…ولا كأن عايشين في ارض وحدة ووطن واحد..ولا كأن شعب واحد شعب إماراتي..!!


صارت قلوبنا سودا وكل واحد يحقد على عيال الإمارة الثانية بالأخص يوم يشوف رقم السيارة!!وكل واحد يكره الثاني لأنه عايش عيشة مترفة في امارته وهو كأن ولد البطة السودا لا ارض ولا بيت ولا معاش شرات الخلق!!


هذي بلادنا لو جارت علينا..هذي بلادنا وطنا…نحن عيال زايد يا ناس…لين متى هالتخلف؟؟ لين متى بنحط ايدنا على خدنا ونقول نحن عيال هالامارة والرزق بيينا لين بيتنا…ونحن عيال الإمارة الثانية لو كدينا مكدة بعير ما بيتغير شي في حالنا.أتمنى ايي يوم وكل هالعصبية تنتهي اتمنى اسمع اللي يقول أنا اماراتي وكفى..اماراتي مايهم من أي امارة..ماتهم أصولي…ماتهمني ميولي…يهمني اني اماراتي…وقلبي على كل اماراتي


أتمنى اسمع ان هالتخلف اندثر من مجتمعنا وماله رجعه..اتمنى نتفاخر بشو سوينا وشو حققنا..خلونا نتفاخر بإنجازاتنا..بإختراعتنا…بأسلوبنا الحلو مع الناس…خلو اللي يشوفنا يقول ياعيني على عيال زايد ايدهم وحدة وقلوبهم على بعض..خلوا اللي يسألكم انتم من وين وشو اصلكم..اتمنى الرد واحد..انا اماراتي وكفى!



منقول للافاده

[بلادي]

موضوووووع جميل جدا ومهم في نفس الوقت وزااااد في الآونه الأخيره

فمداخلتي في هذا الموضوع

من يسأل الناس عن أصلهم وفصلهم يدل انه لاعنده أصل ولافصل

يعني اللي يتفشخر على الناس يدل أنه عنده مرض نفسي

شكرا عزيزتي على النقل

[omkhalid]

صدق مرض نفسي

[عشِـِـِقـِـِـۓ الرمـِـِس]

.. هي والله كلامج صح اختي ..


.. كل حد فـ هذا الزمن يقارن الناس بهذي الطريقه ( الـاصل و الـامارهـ و النادي الي يشجعه ) ..


.. و تسلمين اختي ع الموضوع و ولـآ هنتي ..