ترسم ملامح فوضوية شاعر وروح وبدن
وحدك وفيك من الثلاث اللي تمناها السعيد
الماء والخضره وثالثهاانت يالوجه الحسن
لو قلت لك مشتاق لك ماجبت لي شي جديد
ولو قلت لك مااشتقت لك ( كل المشاعر ذي لمن .؟)
بغداد لو تنكر ملامح وجه هارون الرشيد
في وجهها باقي من آثاره مية قصر وحصن
ياللي غديت لي ابعد قريب وكنت لي اقرب بعيد
صدقني إني رغم كل اللي حصل ما كنت أظن
إنك تكون أكبر من الحرمان في وجه الشريد
وابخل على من الفرح وأقسى علي من الزمن
شفتك وموج الذكريات أغرى مجاديف القصيد
وأبحرت أدور فيك عن منفى وضيعت الوطن
المشكل اني كل ماغامرت والغبه تزيد
وإن الوطن ماهو وطن لازل والمنفى سجن
ابحرت بك من شاطيء الشريان لاعماق الوريد
وابحرت بي في غبة النسيان واحرقت السفن
والهجر في عينك رساله والنظر ساعي بريد
والرمز والعنوان في ظرفين من رمش وجفن
مافيه داعي للكلام العين قالت ماتريد
والصمت خير من الكلام اللي بلا سعر وثمن
وحيد جيت من العدم وأغادر الدنيا وحيد
حتى لو أحبابي كثير نهايتي قبر وكفن
يارب أنا عبدك وابن عبدك مثل باقي العبيد
خلقت لي عقل ولسان وقلب يشتاق ويحن
والقلب من مضغه خلقته ماخلقته من حديد
يشعر ويتكلم ويتألم ويلتاع ويئن