يا ويلهم من الله (( بكتني هالقصة ))

[ولد المطر]

بسم الله الرحمن الرحيم الحمد لله رب العالمين والصلاة والسلام على خير الخلق اجمعين سيد الاولين والاخرين نبينا محمد صلى الله عليه وسلم اما بعد
هالقصة حقيقية وحصلت معاي شخصيا
كنت ساير في يو دبي وانا طالع من البيت متوجه الى دبي حصلت وحده عيوز نعرفها ويعرفها كل اهل راس الخيمه والمعريض بالذات لانها تشتغل في البيوت ايام زمان وربت عيالها الخمسه من صدقات الناس المهم سلمت عليها وهي تعرفني زين سالتها وين سايره ام فلان ؟ ردت سايره المستشفى منو انت قلت لها فلان ولد فلانه ؟
هييه شحوال امك ابويه وشحوال اخوانك انشاء الله بخير
الحمدلله بخير الله يعافيك انتي شحوالش وشو اخبارك
قالت الله يعين يا بوي شوفت عينك حرمه عيوز وعمياء وعايشه بروحها ويا خدامة
وقفت وسرحت شوي وقلت لها ليش وين عيالج انا اذكر عندج ماشاء الله رجال كبار
وينهم ؟
قالت العود في بوظبي واخوانه اثنين وياه وواحد في دبي والاخير في الجيش
قلت لها ليش ما يمرون عليج
قالت اخر مره شفتهم كان يو م عيد الاضحى اللي طاف يعنى قبل سنتين من كتابة هالقصة
وصلتها لين المستشفى وبعدين روحت وكلامها ما غاب عني ابدا
وبدل ما اسير دبي كملت لين بوظبي وتميت اسال عنهم لاني اعرفهم زين المهم وصلت للكبير منهم وعرفت بيته ويوم شفته وشافني الحقيقه ما انكرني ورحب بي خير ترحيب
تميت اسولف وياه واسحبه في السوالف لين عرفت تقريبا كل اموره وامور اخوانه
اللي عقيد واللي مقدم وهو عميد متقاعد والحاله 100%
فسالته شحوال امك ؟ وشخبارها
رد علي وجنه شي قرصه امي امي امي بخير الله يعافيك
قلت من متى ما شفتها قال امس انا عندها هي بخير بخير
قلت له وليش عيالك ما يمرون عليها ويسلمون عليها قال ترا امهم ما ترضى انت تدري انا متزوج من بنت كباريه وما ابغيهم يعرفون انه امي ساكنه في خرابه
قلت تحيد يوم طحت من فوق البري العود ونكسرت ريولك ؟ كم تمت امك تشلك من مكان لين مكان
وكم كانت تحط الاكل وتترياك لين تقوم من نومك علشان تاكل
شفته دمعته في عينه بس كابر نفسه وقال لى بزورها جريب جريب
طلعت عنه وقصدت اخوه سلمت عليه بس كانت نفسه خايسه وايد وما عطاني فرصة اقول له عن امه
اما الثالث قال لي بصريح العباره امي ماتت وابغي اعرف شي عنها
رجعت للبلاد
وقبل رمضان 2009 سلمت الام الروح الى بارئها وفي عزاها ما شفت حد من عيالها
في العزا
حسبي الله ونعم والوكيل وين بيسيرون ولين متى بيعيشون وكيف بيربون عيالهم واخر كلام امهم
حسبي الله ونعم الوكيل فيكم من عيال

[%غمـــازة%]

[align=center]
لا حول ولا قوة إلا بالله


هالمواقف و القصص تعور القلــــب،، ما اعرف ليش احس الأم غير عن الأب

يا الله امـي لو يعورهـا شـي احس نفسي بموت كيف لو ما اعرف عنها شـي لمدة سنتين


الله يرحمهـا و يغفرلهـا،، و يسامح عيالهــــا.. ...


تسلم اخوي عالقصة المؤثـرة و إن شاء الله الكل يتعظ.. ....


[/align]

[حلو الاطباعي]

صدق ياخوي
حسبي الله ونعم الوكيل فيهم الى يوم الدين
وين بيسيرون من رب العالمين
الجنة تحت اقدام الامهات
رجال اخر الزمان اونه متزوج من بنت كبارية اللعيبن اللي مافيه خير ومايبا مرته تشوف امه بالخرابة
لكن الله عز وجل يمهل ولا يهمل
وين بتسيرون من غضب رب العباد... كل واحد رتبة عالفاضي
وين الله بيوفقهم هذيل
لا حول ولا قوة الا بالله العلي العظيم

[▌║ℳř Ŏบị ~♛]

ان لله وان اليه لراجعون
...............................................
.........................................
...........................
............
....
بدون تعليق.......اتقطع قلبي من الأسى عليها
اللهم تغمدها برحمتك

اتركم مع الرابط
http://www.youtube.com/watch?v=zcNDdyk2u7k

http://www.youtube.com/watch?v=zcNDdyk2u7k

[مزايين الرمس]

مشكور اخوي على القصة الرائعة وان كانت حقيقة مرة

فعلا الام هي اساس البيت وهي السدره اللي الكل يلتم حواليها .

الله يهديهم بس الحين غارتنهم الدنيا وبعدين بيحسون بحقيقة جريمتهم .

زين يوم ان حرمتك تستحي ان امك عايشسه في خرابه جان سكنتها في قصر .

للاسف شبابنا وااااااااااااااااااااايد وبناتنا من يروحون بوظبي ودبي ويختلطون هناك بالناس يتبرون من اهلهم وانتماءهم لراك اونه فشيله .

افتخر بامك اللي ربتك وتعبت عليك وافتخر بابوك اللي طلعك ريال حتى لو كان فراش او صياد سمج او حتى مزارع يعني هذولاك من وين .

نسال الله العافية ويعطيك العافية على القصة اخوي

[فديت عمري]

قال تعالى " وقضى ربك ألا تعبدوا إلا إياه وبالوالدين إحسانا"

وين بيروحون من الله ،،، كما تدين تدان ،، شكلهم نسوا أن أمهم سبب وجودهم ونسوا سهرها وخوفها عليهم

بييهم يوم ،،، حسبي الله ونعم الوكيل على كل واحد ينكر معروف والديه