اللي ماعنـــــــــــدوش مايلزمـــــــــــــــــوش
السلام عليكم ورحمة الله وبركاته
نخش في الموضوع....
(اللي ماعندوش مايلزموش) مثل مصري احترمه واقدّره....جداً
تسير (المول) وتشوف وحدة ظاهرة من (كامري 2002) وشنطتها (لوي فيتون بـ 12 ألف)
واحد تعرف إنه (منتّف)....شوي وحط (الفيرتو) على طاولة الكوفي شوب...
و(بحركة مقصودة) رفع كم الكندورة إلا وهالـ(ـرولكس) الذهبية تعشيك وانته يالس على بعد 18 متر...
واحد يدوّر مرسدس موديل 2001 .. (G) كلاس.....ليش ؟
عشان يحط عليه كت 2010 وتحصله يسأل هذا وهذا عن أرخص مكان يبيعون فيه هالاكسسوارات..!الأخ يبا (يتمشيخ)....
وحدة ماخلّت محل تدور فيه على قطعة (بولغاري (تقليد طبعاً) ) عشان تغايظ ربيعتها ...
واحد (هرمون) الكشخة عنده مرتفع لابس غترة (بيربيرز)....هالحين (بيربريز) فاضين لشكلك عشان يخيطون لك غتر؟
وحده تسال ربيعتها عن العطر اللي ريحته شرات ريحة (توم فورد).....
زحام شديد قبل العيد على محل (نص كم) يبيع نعول (باشوتي).....
واحد ماخلا محل ولا حد ساير بانكوك إلا وطلب منه ساعة شال صورتها في مخباه.... لأنه مايعرف يقول اسمها...
واحد مسوي زوبعة في الدرجة السياحية يطلب من المظيفة Upgrade للتذكرة....
واحد سام وجهه عند اللي يسوى واللي مايسوى يبا رقم رباعي......
شهالحـــــــــــــالة.....؟
ياخي,عندك اشتر بدرهمك المنقوشي....ماعندك ياخي فكّ العالم من أذيّتك وحشرتك...
كل يوم عافد على محل تبا أي شي تقليد....
المحل الفلاني عنده بطاقة تفك تشفير الجزيرة الرياضية
المحل العلاني عنده مكياج (تقليد) ... يخرب بيت ابليس ماتخافين على عمرك؟
السكة الفلانية فيها محل يبيع شيل وسكارفات (جوتشي)
فلانة الفلانية توها رادة من تايلاند وتبيع جواتي (برادا)
فلان العلاني يتريّا (كونتينر) بضاعة تقليد ياي من الصين
وبعدين يعني ؟
قلنا (اللي ماعندوش مايلزموش)....
وشكراً
رد مع اقتباس
