يا الحوطي الأسهم يننت ناس كبار .. أقول دش السوق وشوف الميانيين
من زحمته شروات سوق السمك صار .. يوم بتمشي خطوة دست بريولك أثنين
حتى الحريم بسوق الأسهم لهن كار ..دشن وقامن يرمسن بالملايين
البيت متكفل به اليوم بشكار ..والريال ميت يوع في البيت مسكين
وعند العيايز وضع الأسهم والأسعار .. والسوق واصل لين دار المسنين
يتنافسن جنهم وكالات الاخبار .. هاذي خذت عشرة وهاذيج عشرين
في السوق عقلي طار يا صاحبي طار ..شفت الذى ما شافته من قبل عين
جنه الأوادم صابها يا خوي زار ..هذا يدق وذاك يصفق باليدين
واحد على البروكر يزاقر يبغي إعمار .. والثاني يبغي يشتري سهم تأمين
واملاك والواحة والتبريد والــدار .. والاتحاد وأسهم دبي والعين
وأنا بهادوشة مضيع ومنهار ..ما عندي في هالجيب غير عشرين
وأسعار الأسهم ولعت يا خوي نار ..محد عطاني ويه لازين ولا شين
لاقيت واحد من الربع واسمه ضرار .. وأزقر عليه وقالي بعدين بعدين
وأخر لقيت انسان مثلك وفيّ وبار .. قال بلاك قلت محتار يا حسين
قال اتحره فيك يا خوي بوصفار .. مصفّر وتحاوط بهالسوق يومين
قلت له أباه منك النصيحة والأشوار ..وابغي مثلهم اشتري سهم زين
قال اترك الأسهم وخلك بالاشعار ..وارتاح واكتب لك من الشعر بيتين
لاتفسفس فلوسك على القط والفار ..ان جان لك داخل البنك قرشين
بوحميد في هالوضع يا خوي محتار .. دربن مشيناه ولا أدري على وين
نبغي مثلهم نصبح اليوم تجــــار .. ونعيش في راحة ونفتك من دّين
نحن العرب ننجــــر مع كل تيار ..ما نفتكر لو كان راحت ملايين
من قبل ألهونا بصالات القمــــار ..يا لين راحت من إيدينا فلسطين ..
للشاعر الكبير : علي الخوار
رد مع اقتباس
ضوابط المشاركة
