حواطات سفير..!

العضو: سفير جلفار








حواطة 1

اليوم وأنا ناش الصبح الساعه 6، جفت الجو مغيم..وقلت وين كاميرتي سرت بسرعه للسيارة، وبدون ما أمشط كشتي خليتها منفوشة، لأني كنت مستعجل..بس شكلي مستوي مثل شاغي..ويلست أتحوط في وادي شعم، وأصور الأجواء، ومريت على راعي الكرك، وقلت له سوي له كوب كرك جلدي..جلدي كرووووووو..شكله مطر يجي..!

وحطيت الكرك وسرت بحر شعم أصور، وجفت منظر رهيب..غيوم ياية من تحت..الله..!
ويلست أصور..




حواطة 2

اليوم الظهر قلت بتويه صوب سوق الحمير..بناخذ كم صورة للمنتدى،وأنا داش الله يكرمكم جان أدوس الروث بنعالي المندوس..ياع..شو يابني هنيه..!

نظفوا لي نعالي وصورت كم صورة..!





حواطة 3

اليوم مواعد واحد من الربع، راعي عسل، قلت بنصور وياه كيف يصنع العسل..وأنا يالس أصور شكتني ذبابة عسل على عيني،،وابوكم..أسميها تعور..بيقولون بلاه سفير عينه وارمة..!!

وجفنا الطريقة وصورته ويه العسل ماله..تسبب لي في عوار عيوني..!






حواطة 4

اليوم بوديكم مكان غير..بيتنا في اليبل في وادي شعم.بيت مال القفل..قديم مصنوع من حجارة الجبل..البيت بعده في حاله الجديدة، ومرتب، بس الحوش شوي يباله تنظيف، قعدت أصور القفل والباب والغرف، وفجأة سمعت صوت..!!!!

شو هالصوت أنا بروحي هنيه..!!!

طلع واحد باكستاني من التهريب منخش داخل بيتنا..هذا كيف دش أكيد من فوق،،اتصلت لمركز شرطة شعم وزخوه..!!!

مسكين زخوووووووووووووه..!!




حواطة 5

اليوم المزكي عازمني على مكان، وين هالمكان..! أتصور مركز راقي بدبي،،

وألا أجوف منذر موقف حذال سوق السمك..!!!

منذر الله يخليك أنا توني متسبح وما أبغي ريحة زفر..!!!

منذر: أنزل لاه..تعال صور حق المنتدى..!

ودشينا أنا ومنذر والناس تطالعني..وشكلي قرفان من الريحة والزحمة والناس إلي محتشرة وتشتري،

صورت لكم أنواع من الاسماك..والهنود يوم يبيعون..والله يسامحك يا خوي منذر..!! مو مال طلعات..!







حواطة 6


اليوم سرنا السوق القديم في الشارع الكويتي، وعلشان أصور لكم أجواء الماضي، جفت ربيعنا في المنتدى قصاقيص البدري يالس في مقهى منور، سلمت عليه وعلى الربع وهذي صورة لمقهى منور..!!

رافقني البدري علشان التصوير ويقولي شو أصور بالضبط..حلوة الأشياء القديمة ..جفت شي عجبني قلت بشتريه حق الوالد..بس البدري سبقني ويبغي يشتريه بعد ..يا البدري بغيته هدية للوالد.!!

البدري: أنا من زمااان أدور هالشي نفسي أحتفظ فيه..حتى دورته ويه حمد المطوع في متحفه ما حصلته..سبحان الله اليوم جفته..صار من نصيبي..!

سفير: قهر والله..!!!


تريوني في الحواطات الياية بدون منذر والبدري ..!

بدر خماس الظهوري.!




أتمنى الحلقة تكون عجبتكم..
بو مشاري ..زعيم حارة الرمس..!