سأستعيد ومثل ما قلت سابقا الذكريات الحلوة كثيره
وبرمس باللهجه العاميه تراها حلوة ولها مذاق خاص
يوم كنت صغيرة مره من كثر الشردات من عند لمطوعه
جان تقول هاتوها وكنت وايد صغيره وجان تزخنى وعندها
خشبة كبيرة وعليها عارض من الحديد والخشب له فتحات حق لريول على طول لخشبه أسمها الفلقه تحطي لريول الثنتين وتقفل عليهم حق التأديب ومن قايل لها عاد يدتى حتى يخوفونى ما أشرد وأدرس القرآن وجزء عمّ
وطلعت وقت الغداء كل ربيعاتي وخلتني متمغطه وسارت تتغداء داخل الخيمه أنا يوم إني شفتها يالسه تتغداء جان عاد يالله دوروني أفتر راسى وأنا يوعانه وكانت أريولي صغيرونه وكنت أحركها وجان أطلعها من داخل لحطبة وسيده ركض على الباب وبطل الزلى الخشب من الباب من دون حاسية وركيض مسوى غبره ورايه الين وصلت البيت وشفتهم يتغدون لما شافتنى أماية ويدتى وهم ياليسن يحطون الغدا على السفرة جان يضحكون قالوا شقا طلعتى إلا شوية وصلت مطوعه ما في عينها القطرة تدورنى بعصاها جان أندس ورا يدتى
لا بعد أقول لها لو تموتين ما يت عندج ولا بتحصلين الخميسى
من عندي كل خميس أربع آنات ولا بشترى من عندج لبان ونخيجان تضحك ضحك قالت تعالى وما بقول لج شيقلت ما بيى وبسير المدرسه عنج الحول جان تقول حق يدتى صدق بتخلينها هذى تسير اللى يسمونها مدرسه وبتكتب قالت لها هيه ترى بتخلص الست سنين وسووا مدارس يتعلمون فيها
لو في هذا الوقت جان قامت القيامهمن الأهل والشكاوي مالها حد على لمطوعه
والسنه الثانية دخلت المدرسة وكل يوم يزقرون على الطالبات الموجودات فى الصف ويقولون الموجود يقول نعم واللى ما موجوديسجلونه غياب أول ما سمعت فلانه غايبه جان أصرخ وأتمغط على الأرض
والمدرسات فلسطينيات
تدرون شو السبب تعلمنا من لكبار يوم يتوفى حد ما يقولون فلان أوفلانه توفى يقولون غاب فلان وإلا غابت فلانه أنا يوم إنى سمعت كلمة غايبه قلت ماتتوجان يرشون عليه ماي قلت متى غابت ولدموع أربع أربع قالت لى الأبله مين اللى مات قلت اللى زقرتى عليها وجان تضحك ضحك وربيعاتى قالو لها أبله ترى اللى يموت نقول عنه غابقالت بعيد الشر اليوم ما حضرت وبكرة بتيجى وجان أيلس والأبله تبغى تخوز عنى الروعه كانت هاذيك الأيام الدراسة والمناهج على دولة لكويت وكانوا صناديق من الوجبات تحضر وكل واحد ياخذ اللى يبغيه من الكمية قالت لى الأبله ولك روحى خدى لك سندويشات انا ما صدقت كان عمرى سبع سنين وجان أركض سريعوخبر الفراشه قلت تقول لج الأبله عطينى سندويشات اللى أبغيهاوكانت طيبه جان تقول تعالى وفتحت الصندوق وشليت خمس من الرغابه والهلاعهجبن ومربى ومربى وزبده و ما سرت الصف جان البس الباب وأركض أبين السكيك والفرجان إلين وصلت البيت
ودخلت جان تقول يدتى شو رادنج من الضحى قلت لها ربيعتى غايبه بعد اليوم مايتجان تقول وحليلها متى صارت هذى السالفه تفكر ماتتقلت يدوه ما ماتت يعنى أبله تقول الغايب يعنى اللى ماييى المدرسهجانه تقول هيه وحليلها الله يخليها
والذكريات كثيرةوبقول كل مرة شي
رد مع اقتباس