انتبهت ريم ان حور مب يالسه عالدري نفس كل مره ... دقت ريم باب الصاله و دشت ...
ابتسمت ريم و هي اشوف ام احمد : السلام عليج عم ( وقفت شوي ) خالوه
كانت ريم بتقول عموه بس اذكرت ان الحين ما يربطها بام احمد اي علاقه غير انهم ييران ...
ردت ام احمد السلام و كلها الم ان ولدها الغالي احمد مب موجود و الي جدامها مب حرمت ولدها ...
ام احمد : هلا فيج الغاليه شحالج ؟
ريم : بخير خالتي و من صوبكم ؟؟
ام احمد : الحمدلله فديتج . حور يالسه في غرفتها
ابتسمت ريم و سارت ... دشت ريم على حور الي كانت يالسه على لابها و مب منتبهه ان ريم موجوده ... مشت ريم شوي شوي عشان ما تحس فيها حور ... تفاجأ ريم حور من جدام ... فتحت حور عيونها عالاخر و هي اشوف ريم جدامها و تاخذ مخدتها و تفرها على ريم ... ضحكت ريم على ويه حور و اشوف حور الي خذت فونها و يلست تكتب ... وصل كلام لريم عالبيبي بس ما شافته لانها تدري انه من حور ... بوزة حور بويه ريم و تلف ويها الصوب الثاني ... يلست ريم حذال حور و باستها على خدها ... شافت حور ريم و ابتسمت ...

تاشر ريم لحور " احبج مــــــــــــــــــــوت دبوتي "
ترد حور على ريم " وانا بعد بس حركتج موليه ما عيبتني "
ابتسمت ريم و تاشر " شو اسوي كنت ابا اشوف شو ردت فعلج "
بوزة حور ...
تاشر ريم " اسفه دبوتي "
ابتسمت حور بس استغربت لانه ريم تتعامل وياها بالاشاره لانهم نادرا ما يرمسن بالاشارات ...
حور " ريموه وين تعلمتي الاشارات حتى اني ما اتعامل وياج بالاشارات دوم ؟؟ "
تاشر ريم لحور " دشيت موقع يعلم لغة الاشاره و تعلمت عشانج "
استانست حور ان ريم تعلمت لغة الاشاره عشانها بس نفس الوقت كانت مضايجه لانها ما تبا لغة الاشاره محور حياتها ( يعني كله تتعامل بالاشاره ) ... صعبه الواحد يتقبل شي ما يباه خاصة ان كان هالخيار الوحيد الي عنده ...
تاشر ريم لحور " المهم شو كنتي اسوين ؟؟ "
حور " امممم كنت يالسه عالمنتدى و انزل قصايدي الايديده "
ريم " اونه عيل افتحيلي صفحة القصيده عشان اقراها "
حور" لاء عقاب علي سويتيه مابا "
بوزة ريم بويه حور على عكس حور الي ابتسمت ابتسامه عريضه ... فتحت حور الموضوع و تقرا ريم القصيده ...

من يمسح دموعي غير احبابي .. من يمسح دموعي غيرهم
هذي الدنيا خلتني بين اغرابي .. و ما اعرفت من احبابي امبينهم
كتبت وصايف المحبه في عتابي .. و عطيته للبحر الي يحبهم
هذا انا مكسور من الخاطر انادي .. و قلبي مكسور و ضايع امبينهم

ريم و هي تقرا حست بالم حور الي تخبيه عن الكل ... صح انها تبين جدام الكل انها مرتاحه ويا حالتها بس في داخها كانت مكسوره ... شافت ريم حور و عيونها متروسه دموع ... استغربت حور و اتضم ريم حور بقو ... حست حور ان عندها ناس تحبها و مستحيل بيوم من الايام يستغنون عنها مهما صار ... الحين انسير لشبابنا الي ردو البيت ... وصلو احمد و سلطان البيت بس قبل لا يدشون كان هالحوار فالسياره ...
سلطان : بو شهاب تحمل اتقول تغدينا ويا الوالده جدام ابويه
احمد : ادري و لا تحاتي
طلعو الشباب من السياره و دشو البيت ... اول ما دشو الشباب شافو ابوهم الي كان يالس عالغنفه يترياهم ...
احمد و سلطان : السلام عليكم
ما رد ابو سلطان السلام ...
سلطان : خير ابويه شو فيك شكلك معصب ؟؟
ابو سلطان : وين كنتو ؟؟
احمد : اممم كنا نتغدا فالمطعم
ابو سلطان : شو اسم هالمطعم و ويا منو كنتو تتغدون ؟؟
حس سلطان ان ابوه يعرف : كنا ويا الوالده
شاف احمد سلطان و استغرب منه لانه اعترف ...
ابو سلطان : اها يعني سرتو و شفتو امكم
سلطان : ليش حرام نتغدا ويا امنا ؟؟
عصب ابو سلطان : اشوفك بديت اطول لسانك عليه
انقهر سلطان : انا ما طولت لساني بس قلت الحقيقه
عصب ابو سلطان و قام من مكانه و ايود ويه سلطان من طرفينه ...
ابو سلطان : يعني انت بتي اخر الزمن تعلمني الحقيقه يا قليل الادب
حاول احمد انه يخلي ابوه يهد ويه سلطان : ابويه هدي
دز ابو سلطان احمد و طاح احمد ... كانن ام هنادي و بنتها يطالعن الي يصير ... بالنسبه لام هنادي كانت متشققه عالي يصير اما هنادي فكانت تحاتي اخوانها ... حاول ابو سلطان انه يسيطر على اعصابه و يهد ويه سلطان ...
ابو سلطان : اشوفكم الحين في غرفتكم فاهمين و ان عرفت انكم شفتو امكم لاحش ريولكم حش
سارو الشباب غرفتهم ... اول ما دش سلطان الغرفه يلس على شبريته و هو امفول عالي صار ...
احمد : هدي بالك بو مايد
سلطان : تعرف والله خاطريه اراويه بس اوووف
يسمعون صوت الباب و هو يندق ...
احمد : دشي هنادي
فتحت هنادي الباب و هي تبتسم لاخوانها ...
احمد : تبين شي ؟؟
هنادي : لاء بس حبيت اطمن عليكم من عقب الي سواه ابويه
سلطان : قصدج ييتي تطنزين علينا
انقهرت هنادي : انا في حياتي ما اطنزت على ناس غاليين عليه و بعد لو كنت بطنز جان قلت دواكم . شكلي غلطانه لاني ييت هني
سلطان يطنز: اوه توج انتبهتي . انا قايم اتغسل
قام سلطان و سار الحمام ... سار احمد عند هنادي و هو يشوفها بنظره حنونه ...
احمد : هنوده لا تهتمين لرمست سلطان تراه معصب
هنادي : ادريبه عفانا الله ما يدانيني . انزين انا شو سويت فيه عنبو ابويه الي هزبه مب انا
ضحك احمد : هههههههه تعرفين ها طبع سلطان يوم يعصب يكون جيه
هنادي : هيه بس انت عكسه اتعاملني عادي اما هو عفانا الله يحسسني اني ماكله حلاله
احمد : انزين شو رايج الحين اسيرين غرفتج عشان ما تهزبج امج تراها ان شافتج ويانا بتراويج
هنادي : اوكيه بسير بس عشان ما ايب عوار الراس لعمري هههههههه
احمد : هههههههههه خبله
طلعت هنادي من غرفتهم و يرن فون احمد ...
احمد : الوو اهلين بو عسكور
سعيد : ها وينك ما بتظهر ؟؟
احمد : لاء مالي خلق اليوم خله بعدين
سعيد : اوووف منكم دومكم اسوون فيني جيه
احمد : ليش شو سوينا فيك ؟؟
سعيد : انت دوم مالك خلق و رشود ان طلع وياي ايلس يرمس حبيبته
احمد : انزين ايلس عالمنتدى و اشغل عمرك فيه
سعيد : اوووف مابا . يلا باي
سكر سعيد و يضحك عليه احمد ... عقب ما مر الوقت و اذن المغرب ... طلعو الشباب للمسيد و عقبها ردو البيت ... في غرفة احمد ... كان يالس على شبريته ملان و ايب لابه و يفتح صفحة المنتدى ... اول ما فتح احمد المنتدى شاف رسالة حور ... فتح الرساله و كان المكتوب ...

[ السلام عليكم اخويه بو شهاب .. شحالك ؟؟ اول شي اهلا فيك فالمنتدى و حياك الله في بيتك الثاني بس بغيت اسالك اذا ماشي احراج .. امممم حبيت اعرف شقى تعرف اسمي ؟؟ ]

هني استغرب احمد من سؤالها و يقول في خاطره [ شو ؟؟ شقى اعرف اسمها ؟؟ هاي شو كاتبه ؟؟ اكيد كانت بطرش هالرساله لواحد ثاني و بالغلطه طرشته لي ]

ينتبه احمد على نكها الي هو حور العيون و يستوعب انه كان كاتب حور ( رده في موضوع القصيده ) ...

احمد في خاطره [ هيه صح انا رديت امس عليها في موضوع القصيده و كتبت بداية نكها الي هو حور . اها يعني اسمها حور . خلني ارد عليها احسن ]

رد احمد عالرساله و كتب فيها : [ السموحه منج اختي انا اصلا ايديد فالمنتدى و ما اعرفج و عن موضوع اسمج تراني كتبت بداية نكج و ما كنت ادري ان اسمج حور ]

عقب ما طرش احمد الرساله لحور وصلتله رساله ثانيه من حور و مكتوب فيها : [ اسفه اخويه اول ما شفت انك كاتب اسمي تحريتك تعرفني و انا اصلا ما اعرف الشباب لا داخل المنتدى و برع . المهم مشكور على ردك يالطيب و السموحه منك ]

استانس احمد و كان بيرد عليها بس ما رد ... طلع احمد للصفحه الرئيسيه و يشوف صندوق المحادثات ... كان يبا يكتب بس ما قدر لانه ما وصل 200 مشاركه ... سار احمد صوب قسم القصايد و شاف موضوع ايديد لحور ... دش احمد و قرا القصيده ...




هالبارت الثالث كامل و ان شاء الله يعيبكم



نبض القصيد