[align=center]
قصيدة يديدة . .

ما أفتخر بإني كتبتها . .

لأني بصراحة ما كنت أبا أكتبها ف يوم . .

بس الحمد لله ع كل حال ~

قصيدة في أمي [ وافتها المنية يوم الخميس صباحاً ] . . الله يرحمها و يغفر لها و يسكنها الفردوس الأعلى من الجنة . . ~



..

يا اللي جعل من هالتراب رْداها
يا كيف قلبك طاوعك تدفنها

تبغي الزمن يفقد جميل ضْياها ؟
اللي الضيا تسكنْه او هو يسكنها

نامت ؛ و لكن ما أبي يغشاها
هذا التراب الي غدا موطنها

يا ليــــــتني دايــــــم أنا وياها
و أصد كل شيٍ شديدٍ عنها

يا ليته الي كم سقته دْفاها
و يا ما تناول ما يحبه منها

يمها ؛ يدفيها إذا ما جاها
في قبرها بردٍ جهول بسنها

بجسمه لا حل دودها يفداها
و أدري بإن الدود قد يفدنها
لأنها الكريمة و من عرف يمناها
يشهد بإنها و إنها و بإنها

ناح النجم و الكون قد عزاها
و أشوف أنا كل شي مفتقدنها

قلوب يا ما من منابع ماها
شربن حياةٍ ما أظن ينسنها

و ورود كانن لا نظرن لخطاها
يتفتحن ؛ و طيور ما تركنها

مال الجدار بكل حزن ينعاها
و حاجات غرفتها بكن ينعنها

عطورها و سريرها / مصلاها
وثيابها و الساعة و مدخنها

تلفازها و عباتها و دواها
و نعول ياما بالرضى شلنها

كل شي فاقد نورها / ما أغلاها
حتى الليالي يا الملا يغلنها

ما تنسى فيها من هو قد سواها
كانت تقوم لأجله كل ما جنها

و لأجله جبهتها سجدت ف ضحاها
و لأجله تتبع كل فروض سننها

الله يا ريحة زمن خاواها
الله يا تربة انسقت من فنها

الله يا ريحٍ تهب جداها
الله يا أرضٍ غدت مسكنها

محظوظ يا اللي حولها و يلقاها
كل يوم و آنا ماني بلاقنها

اللي زمن يمي هنا بقاها
خذها و نفسي هالأمر يحزنها

لكن و ربي راضية ببلواها
و لا قوة إلا بالذي مسونها

نفسي ضعيفة بس من قواها
وقت الرخا في شدتي مقونها

يا اللي خلقها و م التقى آتاها
و برحمته في كل جزع طمأنها

سواها و حاشاه بإن ينساها
حتى و لو قلوب البشر يجفنها

أسألك تغفر يا الإله خطاها
أمي بشر ، يا ربي تعفو عنها

يا ربي ارحمها و خل سكناها
فردوسك اللي يا هنا ساكنها

و اسقيها من أنوارها و ضياها
اللي ينور قبرها ، و آعنها

يا رب ما أبي أشعر بإن فاها
صابه الظما ، أو جوعها مشقنها

يا ربي أمي ما حدٍ وياها
آنسها يا رحمانها ف موطنها

و افسح لها في قبرها ، و مثواها
والطف بها يا اللي قريبٍ منها

أمي ارحلت ، يا اللي رضى ينعاها
و يا اللي رضى في ضعفها يكفنها

و يا اللي جعل من هالتراب رداها
و يا اللي غسلت من هالحياة بدنها

لو كان بيدي عمري كله فداها
بس ش اللي بايدي \ يا الذي تدفنها

غيّبت عن عيني جميل ضياها
وشلون قلبك طاوعك تركنها


ليلة الأحد 18\10\2009


دعواتكم لأمي . . ~

،،،

،،

،
[/align]