أشياء من الماضي


يا النَّيْمه المَعْلومه

يا اللى عَلَى الاغْوَاقْ

السَّد أنا ما اسومه

إِلاَّ عَلَى لُوْثَاقْ













أظِنّ لى ضَلِّني ما يغْتِره بَنْدي

لي رايةٍ في شموخ العِزّ مرفوعه

لازَمْني الحَظّ واسْتَاصَلْت بِ(السَّعْدي

نازَلْت سِعْد السعود وْلان بالطوعه

النايفه يوم رُوْس الغِيْد تِنْعَدِّ

والراتعه يوم تِدْلَخ كلّ مَرْعوعه

إن غارَت الصِّرْف ما ذَلَّيْت مِرْتَدِّي

أجْبِر كسور (العليمي) وارأب صْدوعه

بديت أعِدّ الجدى بالعَزْم مِتْجدّي

مغزاي لِلّى فشَلْ في العَرْض مَشْروعه

يا (نَبْنِبه) قِدْ وَرَثْت الشِّعْر عن جَدِّي

مِبْطي على ضِفّة الإلهام مَزْروعه

خَذْته من الرُّوْس لا شَحْذه وَلا نَقْدي

يَكَّات ما هي بمَشْرايه وْمَبْيوعه

الشِّعْر مِلْكي وْسِيْد القاطبه عَبْدي

والراي لي دامني في الشِّعْر موسوعه

الشِّعر عَسْجَد وْحِبْري عَنْبَر وْبرْدي

مَرْمَرْ.. وْمِسْك اليَراع تْضَوَّع بْفَوْعه

والعِدّ (هَدَّاجْ تَيْمَا) وان ذِكِرْ عِدّي

عميق ما يِنْسِبِرْ بالهَيِّنِهْ قوعه

والبَزْر لى ما يعَرْف (الشَّلّ) مِ (العَدِّيْ)

أرْيَاهْ ما هي بمقبوله وْمَسْموعه

وْقصايدي يوم نَبَّنْ ذَبَّنْ النَّجْدي

والاَّ على مِثْلِكْ وْشَرْواك مَمْنوعه

مَا انْتِه بتِرْزَى أحاجي فيك واحْتَدِّي

هاك الدّوا لى تعَذَّرْ عوقِك نْجوعه

(اللاحي) آخر دوا والكَيِّهْ تْسِدِّيْ

تتوب شِعْر النِّسّا ما تِيْب مَوْضُوعه

لى كَوِّخَوا لِلْحَرار تْلاَكَشْ الرِّبْدي

ما هو بموسِمْك هَدّ الطير وِطْلوعه

هوب انت لى في شِعِر غِيْد الوطن تسدي

الدار محكومه وْالاقوال مَتْبوعه

إقْبَضْ رسون الدماثه يا (السَّمَرْقَنْدي)

الطَّلْقه اللى خِطَتْ اْلاهداف مَرْجوعه

ما يَحْسِدْ (طْويق) غير (الرِّجْم) و(النَّدِي)

عِجْزَنْ عن القِمَّه وْتَاجَتْهِنْ ضْلوعه

شِعْر النسا من (عُمَانْ) لْعَارِضْ (النَّجْدِي)

وِمْن (اليَمَنْ) لين (بابل) طايلٍ بُوْعه

من (بِنْت بِنْ ظاهر) وْ(عوشه) وصَل عِنْدي

وفي عَهْدِيه كَم بَرَتْ لي كلّ مَتْلوعه

يدوْفِنْ الشِّعْر دَوْف الشَّهْد بالقَنْدِي

ما هي بْأسامي على الصَّفْحات مَلْموعه

أمَّا أمثالك (رجال البُوْدَرْ الوَرْدي)

فالرَّجْل قَبْل الجمال يْجَمِّل طْبوعه

ما تْشوفني حرْمه وْنَاموسي مْعَدِّي

أرقى شموخ العلا واخامِسْ صْبوعه

بَرَزْت ما نَوَّفْ بْيِهْ قَدّي وْخَدِّي

ولو شِيْت في ذِمّتي ما هوب مَصْروعه

لكنّي أدرى على والنعِمْ واجِدِّيْ

واللاش ماني بحاجَة قَطْش يَنْبوعه

أوْرِدْ على مَنْهَل (المَكْتوم) و(الكِنْدي)

أنْهَلْ (فرات الشِّعِر) وايَرِّيْ فْروعه

لو شِفْتني يوم وَقْع الخَطْب مِتْحَدّي

حرْمه ولكن على الشِّيْمات مَدْفوعه

يدْفَعْني الشان والطوْلات والمَجْدِي

ناموس راسي يطيب بْفَكَّةْ الصّوعه

ماني بزيني على الخَفْرات مِعْتَدِّي

لا شَكّ قَبّاض رسْن الحَقّ وِشْروعه

أتاجي بحَبْل فكري لِيْن واشِدِّيْ

ما ابَلِّلْ الموسِده من نادم دْموعه

آزَهِّبْ (البَوّ) قبل آزايِمْ الفَرْدِي

ما اخَلّي أمّه تحِنّ الليل مَفْجوعه

بالحَقّ ماني على الأشعار مِتْعَدِّي

قمراي تَبْلِج دجاه وْتَطْفي شْموعه

جَمْرَكْت والنِّعْم مبذولٍ لها جِهْدي

طريفها والتلايد مَعي مَوْدوعه

وْسَخَّرْ لي الربّ من رُوْس العَرَبْ جندي

وِمْلايكة خالقي لي حِرْز ودْروعه

بْفَضْل رَبّي عن التبعات مِسْتَدِّيْ

من ساس بيت التَّرَفْ والأصل مَنْسوعه

بْرُوحِيه راس ماني تابِع لْحَدِّيْ

بْعِزْ رَبِّي بروس المجْد مَتْبوعه



شعر: أنغام الخلود