طلاب ثانوية التكنلوجيا يعانون الأمرّين

[c.r7]

احين ماعندي وقت اكتب شي

ترقبوني الفليل راح اكتب المعاناه والظلم الي نعيشه

وحاله النفسيه الي نعيشها

وحقائق المدرسين و الادارين خلف الكواليس


واشكرك عمر الحبسي ع طرحك للموضوع

[c.r7]

والاداري الي يقول اذا مب عايبنك المعهد اظهر .

انا حبيت اوصلك معلومه اذا تبه عمر يغلق الموضوع ولا يظهر من المعهد تراك غلطان
لانه مستحيل انسكر الموضوع ومابنسكت عن حقنا والظلم الي نعيشه و اذا تبه عمر الحبسي يظهر من المعهد انا راح اقولك مب عمر الوحيد الي بيظهر طلاب الهندسه كلهم راح يظهرون

اما تغيرون نظامكم الفاشل اما نرفع المووضوع لبو خالد الله يحفظه



واتمني الكل مايدخل قاعات الامتحان التخصص
يا امتحان ف يوم واحد او محد راح يدخل القاعات





ومثل ماقتلكم احين انا مشغول الفليل بحدر وراح اكتب عن المعاناه الي نعيشها
والسموحه منكم ع الاطاله

مع السلامه *

[brave heart]

وصلني قبل شوي الجدول ما تغير غير شيء واحد
(الدين والعربي بنفس اليوم ) »» ما كدينا خير
السبت الي كنا فاضيين فيه علينا امتحان رياضيات ادفانس »»» الكيميا اصعب من الرياضيات ادفانس بس ما حطوه بيوم واحد !!!
الفيزيا ادفانس خلوه بيوم واحد بعد
ومادة الانسترمنتيشن مع العربي في يوم واحد

الصراحه مبين التغيير العجيب في الجدول !!!
ما زلنا مستمرين بالموضوع حتى وجود حل وسط و يكون منصف لنا
*

[mr. shamsi]

السلام عليكم مرة ثانية ..

بخصوص كلام الاخ dewdrop

لما سال : بَس سؤال / كيف نطلع و نحن أساس المعهد؟

كلامك منطقي 100% يعني لو كل طالب اشتكى او رمس بكم كلمه او متضايق من الوضع خلاااص لازم يطلع؟؟


يعني لاااااااااااازم يطلع ؟؟؟؟؟؟؟


قووووووولووووووووووووووووووووووو لاااااااااااااااااااااااااااااززززم يطلععععععععععععععع؟؟؟؟





بيموووتوون اذا رمسنا يبونا ندرس ونحن ساكتين .. ترا سلبياتهم اكثر من ايجابياتهم لا ينسون هذاا الشي


انا ربعي بالمدارس الثانية كل خميس يطلعون منار والكورنيش ونحن تامين جدام اللاب توب نلحس الشاشه

هاذم ها الوزراء والسفراء والمهندسين من وين متخرجين ؟؟؟ ولا واحد منهم طالع من تكنلوجيا ما تكنلوجيا كلهم طالعين من ثانويات عادية ووصلو لمراتب لاااا يعلى عليها

ويقولون لا انتو شغلكم بيكون احسن وارقى .. كيف يعني ارقى .. ليكون بتخلوني مدير شركه ماك وانا مادري!! قالو ارقى قال


يبون يسكتونا باي طريقة اونه اغلقو الموضوع ... السالفة وصلت للاعلام وأي تعرض من ادارة المعهد لأي طالب من المعهد بنرفع عليهم شكوى

الموضوع 6000 واحد شافاه بيومين وان شاالله يشوفونه اكثر واكثر


اللي قارهني ان ربيعي كل يوم يطلع ويلعب ويسوي كل شي يباه واخر شي نسبته قريب التسعين
وانا اتفل على عمري واكفخ عمري وحتى قيام الليل قمت اقومه من كثر الضيق .. لا وما ارقد بعده .. اسير اكمل المشاريع عشان ((ما ارسب)) وربعي بالمدارس الثانية بارده امربده نسبهم عااالية تعور القلب .. وحتى انهم يقولولي محمد اذا تميت على ها الحال اسمحلنا بنحذف رقمك >> هاا اكبر دليل على ان طالب معهد التكنولوجيا ( كائن ) منعزل عن العالم من اجل ((نص درجه))




و اذا تكلمنا و اشتكينا يقولون اللي مب عايبنه يطلع
و يوم بنيي نطلع تسوولنا قضية فلسطين



ياخي انا مراااهق ابا اسير السينمات ابا اعرف كيف شكل الكورنيش اللي كل حد يتكلم عنه ابا اسافر ويا اهلي بالاجازات ما اباهم ينطروني ببيت يدتي عشان دراستي


حرام عليكم والله حرام افهموووني

[Doblomase]

مالنا غير البث المباشر

[S.ALBLOUSHI]

السلاآم عليگم
گلاامك آخوي صحيح ٪100
انا طالب من المعهد و عارف هآي الاشياء
و صوتي معاگ

[c.r7]

بخبركم عن المعاناه والظلم والقهر والا مبالاه من الاداره و قوانينهم ونظامهم الفاشل والكراف وحالتنا النفسيه والارهاق الشديد .


اول شي قبل عن ندخل المعهد اغرونا

١- الدراسه سهله جدا والكل راح ينجح و راح تحصل ع درجات عاليه وبتحصل ع نسبه عاليه بسهوله و سوف تحصل ع خمس شهادات.
٢- المواد اقل بكثير و والكميه الي راح تاخذها جدا بسيطه ولا سوف تنضغط .
٣- الدراسه ممتعه جدا حيث اغلبها ع اللاب و الدراسه ليس فقط كتب واوراق سوف يكون نظري وعملي !!!!
٤- وسائل الترفيه سوف يكون هناك صاله كبيره للبولنغ و ملعب كره القدم و ملعب الطائره و ملعب اليد و ملعب للتنس وملعب للسله و حوض سباحه و صاله لرفع الاثقال + الراتب .
٥ - واهم شي مابعد التخرج الوظيفه مضمونه ١٠٠٪ او تكمله الدراسه بارقى الجامعات داخل اول خارج الدوله .


اوكيه



دخلنا المعهد و تفاجئنا انه كل كلامهم عباره عن كلام لا اكثر ولا اقل

الآجازه :

الثانويات الاخري بعد الفصل الاول ٣ اسابيع اجازه اما نحن اسبوعين وبعد الفصل الثاني هم اسبوعين ونحن اسبوع واخر السنه هم ياجزون قبلنا باسبوع

سكتنا وقلنا معليش بنصبر شو بنسوي

االفصل الواحد :

يتكون من ١٢ اسبوع تقريبا

لازم نمتحن اقل شي ٤٤ امتحان
و غير ال ١٠ مشاريع الي لازم نخلصها ف شهر
وغير الواجبات الي ماتخلص .
وغير اللاب ريبورت الي لازم نحضره ف البيت والي ياخذ منا ساعه
وغير ايام السبت الي لازم نداوم السبت اذا كان عدنا رفجن ولا تكمله الدرس ولا نسوي المشروع

مع كل ها الارهاق سكتنا وقلنا بعد معليش بنصبر

الغياب :

يعقل طالب ف فصل كامل الحد الاقصى للغياب يكون يومين و اربع حصص !!!!!!
يومين و اربع حصص و ثم يعطونك انذار و عشر نقاط
اذا بتحسبها ع ثلاث فصول يعني ٣٠ نقطه

والفصل النهائي من المعهد ٤٠ نقطه
يعني بتبقالك ١٠ نقاط والمعهد مشددين كثيرا يعني ف اي لحظه بتستلم ١٠ نقاط وراح تنفصل.

وسكتنا وقلنا بعد معليش

حياه الطالب :

الواحد لازم ينش من الساعه ٦ عشان يتجهز وجي ولين مايوصل المعهد المهم نظهر من المعهد ٣ والمعهد وايد بعيد ف نوصل البيت ٤ ولا ٤ ونص
نوصل البيت نريح نسبح نتعبد نتغدى الساعه وصلت ٦ !!
انزين شي اكيد اليوم الي بعده عندك امتحان يعني يباله ساعتين مذاكره و امتحانين ٤ ساعات يعني مرات لين ٨ فليل بنخصل ومرات لين ١٠ فقط لمذاكره االامتحان

غير اذا عندك واجبات وتحضير لدروس وغير تحضر اللاب ريبورت والي ياتخذ منك ساعه وصلت الساعه ١٢ !!!

بعد ككل ها الارهاق والتعب اكيد بترقد


يعني لين متى جي بنتعب لين متى جي بنكرف المهم سكتنا وقلنا بعد معليش


الويكند :

الواحد يوم الخميس فرحان بفتك شويه من الدراسه ومن عوار الراس والمعهد

ونتفاجئ انه يوم السبت لازم نحضر + امتحان يوم الاحد + تسليم واجبات يوم الاحد <

يعني مابنريح غير الخميس

والجمعه مذاكره والسبت دوام

الشهر يتكون من ٤ اسابيع ٦ ايام ونص دراسه وكراف والراحه فقط نصف يوم هذا ف الاسبوع !!!!

يعني ٢٦ يوم دراسه وراحه يومين من اصل ٢٨ يوم اي عدل هذا اي انصاف

والله يتنا حاله نفسيه وارهاق شديد وتعب وكرهنا المعهد والدراسه وتعبنا بكل غير طبيعي


وبعد كل ها سكتنا وقلنا معليش <


الدرجات :

والله وثم والله

النص درجه تظهر من عينك لين مانحصلها
المشاريع الاساتذه ماتعيبهم كذا مره لازم تعدل
الامتحانات نصها اخطاء في اخطاء تخلينا نرتبك غير ايبولك سوال ولا سوالين وكل واحد عليه ٣ ولا ٤ درجات يكون صعب جدا فقط الي يحله واحد او اثنين من كل شعبه

الواحد طول السنه يكرف ويذبح عمره واخر شي نسبته ٨٥٪

والمدارس الاخري ربع جهد الي انسويه ويحصلون ع نسبه فوق ٩٠٪ براد

ع كل هاي الضغوطات سكتنا وقلنا بعد ملعيش <

المدرسين :

اول ماتدخل الكلاس ع طول يتم يشرح بسرعه بسرعه عشان يخلص الي عليه واذا واحد مافهم مستحيل يقعد يعيد ويفهمه يقوله تعال ف البريك <

المناهج :

صعبه جدا و وكميه هائله وحفظ كثير ومضغوطين اقوى شي .


الاداره :

حدث ولا حرج مستحيل مستحيل يسمعون لطلاب الي يبونه يسونه وبكيفهم مايهمهم راحه الطالب <


وسائل الترفيه :

كل الي خبرونا عنه خرط ف خرط ولا شي جفنا <

الراتب :

خصمو النص عشان يرضون ناس وناس <

الملبس :

ماشي قياسات الي فالحين فيه اكس اكس اكس اكس اكس اكس لارج ولا شخص يحصل قياسه
وكنا شهرين كل يوم نلبس نفس البنطلون والقميص

كذا ماده ماشي كتاب اسمع الدرس واكتب نوتس


ع كل ها الضغوطات والارهاق والتعب الشديد وحالتنا النفسيه والجسديه سكتنا وقلنا ٣ سنوات وتعدي وبنفتك



بس الي ماينسكت عليه
انه امتحانين ف يوم واحد ياخي انا ابي اعرف الي حاط الجدول عاقل ولا شو سالفته ولا كارفينه ف حياه و مقهور ويبانا ننكرف

يعقل انه ولا يوم يعطونك اجازه للمذاكره ولا قبل الامتحانين يكون عندك دوام لين ٣

وغصبن عنك تخلص المادتين

اذا الماده الوحده جدا صعبه وكميتها كبيره ويبالها تركيز كبير و ساعات طويله للمذاكره ويمكن مايكفينا نخلص
يقومون ويحطولنا ماده اخري معها لا والمشكله اصعب المواد حاطينها ف يوم واسهلها ف يوم

كيف بنركز بذاكر هاي الماده ولا هاي


وكيف بنحصد درجات عاليه قول اصلا كيف بننجح

اذا الطلاب المتفوقين لا يستطيعون التركيز ويحلون عدل فمابالك بطالب ضعيف او قدراته اقل و استيعابه بطى

اكيد راح يرسب واذا رسب !!!
بيضيع سنه كامله من حياته بسسب شو ١!! نظام وقرار فاشل


نطالب بمتحان فقط بكل يوم

وذا ماغيرو الجدول لن ندخل قاعات الامتحانات


واتمنى رسالتي توصل ل بو خالد

[حسافه ما تفاهمنا]

شباب هذا توتر الشيخ محمد بن زايد @mohbinzayed
يارييت حد يسوييله فولو و يعطيه رابط الموضوع
لأنه صدق نبا الموضوع يوصل للشيخ محمد بن زايد الله يحفطه
لأنه طويل العمر معتبرنا امانه عند المعهد و يبا يطلع ريايل للمستقبل و ما قصر
و عندي تعليق ثاني بعد:-
بخصوص انهم يقولون اللي مب عايبنه المعهد يطلع
اووك تقريبا ٩٥٪ من اللي ف المعهد مب عايبنهم نظام المعهد
اووك ال ٩٥٪ بيطلعون
يا الاساتذه بدرسون ٥٪؟؟!!
الاخصائي بيحطونك اخصائي على نسبة طلاب ٥٪ بسس؟؟
المدير و غيره بعد نفس الشي؟؟
يعني المعهد بيفضى
نحنا مب مجبورين نتم ف المعهد
كنا نقدر نتم ف المدارس الحكوميه او الخاصه و نكمل ف الثنويه و نتم على درجاتنا العاليه و نسبنا العاليه
بس للأسف انغشينا ف المعهد لأنهم قالو الدراسه اسهل و جييه يعني بتقدرون تيبوون نسب اعلى من اللي كنتو تيبونها قبل
والله خليتونا نكره الدراسه

ننتظر الاجابه من سموه
و نحنا واثقين انه ما بيرضى ب اللي يستويي فينا
و بيشوفلنا حل
((املنا فيكم كبير يا شيوخنا و انا بتكلم ب لسان كل الاماراتيين)):-
قسم بالله انه كل فرد ف هاي البلاد يعتز و يفتخر انه عدنا شيوخ نفس شيوخنا
((تحرق الشعوب نفسها ل عزل حكامها و نحن نحرق انفسنا لجل يبقون حكامنا))
الله يحفظ حكامنا

[AHMED 0000]

رسالتكم وصلت للمسؤولين مثل مابغيتوا

لكن بنجووف شو التغيير اللي راح يصير

والدكتور عبداللطيف بيكون في اجتماع يوم السبت بخصوص النظر في الشكاوي

ونحن نتمنى يتم التغيير من الوضع ولو شي بسيط يخدم الطالب مع ان المعهد يرفض تغيير الخطة اللي حاط الاهداف عليها لانهم على ثقة تامة من نجاحها

واهم الشي الطلاب طلعوا اللي فخاطرهم ووصلوا رسالتهم ولكن ،،،

مثل ما ابديتوا شكاويكم نبا اقتراحاتكم لعل يتم دراستها وتطبيقها

[BrokenHeart]

الامتحانات نصها اخطاء في اخطاء تخلينا نرتبك غير ايبولك سوال ولا سوالين وكل
واحد عليه 3 ولا 4 درجات يكون صعب جدا فقط الي يحله واحد او اثنين من كل شعبه

أمّا هذي صدقت فيها! و الله أحس إنّا مظلومين بَ هاي النقطة
يعني تخيلوا سؤال الإختياري كل سؤال عليه 3 أو 4 درجات؟ و أذا قلنالهم ليش
هالتوزيع في الدرجات قالوا عاطينا فورم للإمتحان و نحن نسوي نفسه!!

يعني مستحيل يخلونك تييب درجة كاملة في أي الإمتحان ،
تخيل أنك حال كل شي صح و عندك غلط في الإختياري يعني ناقص 3 درجات
> تماماً مثل ما حصل معاي في أحد الإمتحانات "27/30"



بخصوص إمتحان السبت
" مُعارِض"