العضوة القديرة حرم علي على كرسي الاعتراف فأهلا بها بيننا

[حرم علي]

السلااام عليكم و رحمة الله و بركاته ...
وعليكم السلام ورحمة الله وبركاتة


اشكر المشرفيين على اختيارهم ل حرم علي للجلوس على كرسي الاعتراف ..


اشحالج عزيزتي حرم علي ...و ان شاء الله الصحه تماام التمااام ؟؟!!
الحمد لله بصحة وعافية ... بنشكر الله



اختي حرم علي ،،

سين 1/ نكج رسمي هل هااا يدل انج رسميه ؟؟
ابدا .. ما يخصة مووول


سين 2/ يقاال : انه الوقت كفيييل في جعل الانسااان ينسى حزنه او اي ذكرى حزينه مرت به ،، اذا كان في ذكرى حزينه مرت عليج هل الزمن او الوقت نساج ؟؟!!
الحزن ما انساه بسهوله , وخاصة اذا فقدت عزيز , بس احاول اطلع منه


سين 3/ حرم علي : انسانه مرحه .. طيبه .. صفاتج حلوه ...
من منو ماخذه هالصفات ؟؟!!
مادري والله .. هيك الله خلقني

سين 4/ طيبه القلب .. و المسامحه و التغاضي بعض الاحيان مو زينه ، يعني اتضر صاحبها او اللي يتصف بهاي الصفه ... انتي مع هالكلام ولا ؟؟
الطيبة مطلوبة ,, وهاي من صفاتي .. أحيانا اتجاهل , و أحيانا اتنرفز , وأحيانا اطنش
بس في النهاية ما اشلها في خاطري


سين 5/ : نفسج الحلوة للطباخ و المطبخ مني و الدرب ولا ماخذتنها من حد ؟!!
من ناحية المطبخ , ما كنت اعرف اطبخ شي موول , حتى قرص البيض ماعرف اسويه ... خلصت الجامعة , ويلست بطالية في البيت , لا شغله ولا مشغلة , واتولتني الوالده من الزين وهزبتني , مب عايبنها وضعي , الا رقاد . الا هياته , واسحبتني المطبخ , واتعلمت شوي اكلاتها , ربي يحفظها ,, ويوم تزوجت , غصبا عني وعن طوايفي , تعلمت أطبخ كل شي . بعلولي ما يحب الدلع , والهيازة , يباها راعية بيت وبس ,, عسب جي من اتذوق أكله , لازم اعرف شو مكوناتها , وكيف طريقتها ؟؟... ما استوعب من الطباخات اللي يطلعن في التلفزون , لازم اطبخ بنفسي عسب اتعلم ... والحمد لله , دووم نفسي مفتوحة للطبيخ والمطبخ ..



سين 6/ بناتج مريوومه و نوووفي ، منو اختار اسماءهن و على منو مسمايات ؟؟
مريم اختارتة الوالدة ... ونوف اختارته مرت أخوي .. واللي ياية في الطريج . بسميها حور
انا أحمل , و أربي , و أتعب ,, وهم يسمون عيالي على كيفهم ,, عالبارد والمبّرد


بكتفي بهالقدر من الاسئله .. و السموحه منج عالاطاله و هاي الاسئله ..
مسموووحة غاليتي


دمتي بخير حبيبتي